Isaías 40 - Bible in Tzeltal de Oxchuc y Tenejapa

Cajwaltic ya yac'bey smuc'ul yo'tan Jerusalén

¹ Te Dios awu'unic ya yal: —Muc'tesbonic, muc'tesbonic q'uinal yaiy te lum cu'une;

² c'oponaic soc yutsil awo'tanic te mach'atic ac'bot yijq'uitayic te Jerusalén, soc albeya yaiyic: te mosoinel ta stojole, lajix sc'oplal, la stojix te faltaetic yu'une. La cac'beyix castigo ta jc'ab, ja' te buen tulan castigo la yich' yu'un spisil te smulique —xi'.

³ Ay mach'a yac ta aw la caiy: —Chajbanbeyaic me sbe Cajwaltic ta jochol taquin q'uinal, tojlinaic c'axel ta swenta te Dios cu'untique, pasaic bael toj be ta taquin q'uinal.

⁴ But'aic spisil te lomajtique, pajaic ta bay witstiquil soc ta bay bujajtique, c'atp'unaic ta spamlej, t'ujbiluc ac'a c'otuc te sjuclejetic soc te witstiquile.

⁵ Jich yu'un te Cajwaltic ya me yac' ta ilel te jelawen yutsilal, spisil ants-winiquetic pajal me ya yilic. Te Cajwaltic ja' nix la yal —xi' me ta yalel.

⁶ Ay c'op la yich' alel: —Awunan —xi'. La jac' te jo'one: —¿Bi ya cal ta aw? —xoon. La yalbon: —Ja' te bit'il spisil ants-winiquetic, jichic nax bit'il ac, stalel ay yilel te nichim ta aquiltique.

⁷ Te ac ya xtaquinaj, te nichim ya xlubaj te c'alal ya xloc' sjab ye te Cajwaltique. Ta mero melel, jichic nax te bit'il ac te ants-winiquetique.

⁸ Te aque ya xtaquinaj, te nichime ya xlubaj; yan te sc'op Dios cu'untic, stalel ay sbajt'el q'uinal stuquel, xaat me ta aw —xi'.

⁹ Moan, yajwal Sión, ta bay mero stoylejal te witse, tulan xawal loq'uel tey a te ac'ope, swenta yu'un ya apuc bael ta alel te lequil c'ope. Yajwal Jerusalén, ma me xiwat ta yalel loq'uel te ac'ope, pucbeya ta stojolic te lumetic ta sq'uinal Judá: “Li' ay te Dios awu'unic te ja'exe”, xaex me.

¹⁰ Ya me xjulix tel soc yu'el te Cajwaltic, ya me xmandalaj ta stojol spisil soc te yip sc'abe. Ya yic' tel te lum yu'un te c'alal la sloq'uesix tele.

¹¹ Jich me ya xtal te bit'il jtul jcanan-chij te ya scanantay te xchije; te ya stsac jajch'el ta sc'ab te alal chijetic yu'une, ya spet bael ta stan, ya me yat'elin scanantayel te mero alaletic toe.

Smuc'ul yu'el Dios yu'un Israel

¹² ¿Ay bal mach'a la sp'is ta loch'el ta sc'ab te ya'lel te muc'ul mar? ¿Ay bal mach'a ya xju' yu'un sp'isel te sjamalul te ch'ulchane? ¿Ay bal mach'a la yac'bey sp'isol te jayeb slumil yich'oj te balumilale, o slicojbey yalal ta báscula te witstiquil soc te ch'in witstiquile?

¹³ ¿Mach'a tojtesot yu'un te Cajwaltique, mach'a p'ijubtesot yu'un?

¹⁴ ¿Mach'a ac'bot snop yu'un soc ac'bot sna' yu'un? ¿Mach'a ac'bot yil yu'un te bit'il toj ya yaiy chajbanwanej? ¿Mach'a la sp'ijubtes a te bitic ay ta nopele? ¿Mach'a p'ijubtesot yu'un a te p'ijil c'ope?

¹⁵ Te Cajwaltic, jich nax c'oem ta yo'tan te nacionetic te bit'il jt'ul nax ja', jp'ij nax tsubil lum c'oem ta báscula; te lumetic ta ti'ti'mar, jich c'oemic ta yo'tan te jp'ij sit ji'.

¹⁶ Ta spisil ta witstiquil Líbano, jich c'oem te ma tic'uc te chambalametic ta swenta yaq'uel ta majt'anil ta chiq'uel scojt'ol, soc ma tic'uc te te'etic te ya si'ilin te sc'aale.

¹⁷ Ta spisil te nacionetic ma'yuc sc'oplal ta stojol, mero ma'yuc sc'oplal ta yo'tan ta jyalel.

¹⁸ Te ja'exe, ¿mach'a ya apajic soc a te Diose? ¿Bi loc'ombail te pajal soc ta ac'opic?

¹⁹ Te mach'a ya spas loc'omba, neel ya yultes ta c'ajc' te taq'uine, yan mach'a ya spots ta oro soc ya spasbey cadenaetic ta plata.

²⁰ Te mach'a ya spas loc'omba, ya stsabey ste'el te ma xc'a'e, soc ya sle te mach'a p'ijuben ta spasel, te toj ya stejc'ane, swenta yu'un ma xyal.

²¹ ¿Yu'un bal ma x'ana'ic te ja'exe? ¿Ma bal awaiyojuc stojol ta alel sc'oplal? ¿Ma bal la yalbeyex awaiyic ta xjajch'ibal tel? ¿Yu'un bal ma c'oemuc ta awo'tan te c'alal chicnaj te balumilale?

²² Te Diose ay smuc'ul nactijib ta sba sjamalul te ch'ulchane; jich ta ilel yu'un ants-winiquetic te bit'il ch'in yaxal c'ulubetic. Jich ya slim bael ch'ulchan te bit'il paq'ue, jich ya sjam bael te bit'il nailpac'.

²³ Ma'yuc ya xbajt' ta yo'tan te mach'atic muc'ul winiquetic ta balumilal, soc ya yac' xch'ayic ta jc'axel te jtsobwanejetic ta q'uinale.

²⁴ Jichic te bit'il unin te'etic te ach' jts'unelic toe, te jteb to nax yac'oj yisimic ta lumq'uinale. Teme la sjabtay bael te Diose, ya xtaquej, te tulanil iq'ue ya slic bael jich bit'il taquin ac.

²⁵ Te Ch'ul Dios ya sjojc'o: —¿Mach'a ya apajon soc a? ¿Mach'a pajalon soc awaiy a te jo'one? —xi'.

²⁶ Toyaic moel asitic ta ch'ulchan soc ilawilic: ¿Mach'a la xchicnantes spisil? Ja' te mach'a ya spuc ta jujune, soc te ya yic' tel ta sbiile. Mero c'ax muc' te yu'el soc te yipe, ma'yuc junuc ya xch'ay.

²⁷ Israel, lum yu'un Jacob, ¿Bi yu'un ya x'ajc'anajat? ¿Bistuc jich ya awal: “Te Cajwale ma'yuc ta yo'tan te bit'il ayone; te Diose ma'yuc jc'oplal ta yo'tan te jo'one?” te xaate.

²⁸ ¿Yu'un bal ma x'ana'? ¿Ma bal awaiyojuc stojol? Te Cajwaltique, ja' te Dios te sbajt'el q'uinal aye, ja' te la xchicnantes spamal te balumilale, ma'yuc bay ya xcom yo'tan soc ma xlub; te bitic sna'oje, bajt' nax ta jyalel.

²⁹ Ja' ya yac'bey yip te mach'a ya xlube, te mach'a peq'uel yipe ya stoyesbey yip.

³⁰ Asta te ach'ixetic queremetic ya xlubic soc ya xcom q'uinal yaiyic; asta te mach'atic mero tulanique ya xyalic.

³¹ Yan te mach'atic ya smuc'ulin yo'tanic te Cajwaltique, spisil me ora ya x'ach'ub yipic stuquelic. Jich me ya xju' xwilic c'oem te bit'il águila; ya xju' x'animajic, mero ma xlubic, soc ma xcom yo'tanic te ya xbeenique.