Isaías 4 - Bible in Tzeltal de Oxchuc y Tenejapa

¹ Te bi c'aalil ya cale, jteb xanix winiquetic ya xjilic. Juctul antsetic ya smaj sbaic ta swenta jtul winic, soc jich me ya yalbeyic: —Jo'otic ya jwentain jbatic ta jtuqueltic, soc ya jc'u'ultes jbatic a te bitic ay cu'untique. Pero ja' nax ac'botic quich'tic te abiile, jich me ya awac'otic ta libre yu'un te q'uexlale —xiic me.

Jelawen yutsil ya xc'ot ta patil

² Te bi c'aalile, ay bi ya yac' xpulin jajch'el te Cajwaltique, ja' me xch'alil yutsilal te jayeb mach'atic cuxulic ya xjilic ta lum Israel. Te bitic ya yac' te q'uinale, ja' smuc'ul yo'tanic ya yaiy soc ja' yich'el ta muc'.

³ Ja' te mach'atic cuxul ya xjilic ta lum Sión, ja' te mach'atic ayic to xan ta lum Jerusalén, te ya yich'ic xan permiso te ya x'ainic tey a, “Ch'ultesbilic yu'un te Cajwaltique”, xi' me sc'oplalic.

⁴ C'alal ya yal mandal Cajwaltic te ya x'ochic ta castigo, soc te c'alal ya xc'ot ta pasele, ya me spocbey loq'uel sbolil ta Jerusalén a te bit'il la smal ch'ich', soc ya spocbey loq'uel smul te ants-winiquetic te wentainbilic yu'un Jerusalén.

⁵ Ta spisil te witstiquil Sión soc te lum tey stsoboj sbaic ae, te Cajwaltic ya xchicnantes jajch'el tocal ta c'aaleltic, ta ajc'ubal ya xojobaj ta tilel c'ajc'. Ta sba ta spisilic tey me ya x'ain a te yutsil xojobil te Cajwaltique,

⁶ swenta yu'un ya me scanantay soc ya me scoltay; ja' ya xtuun yu'un yaxinal sq'uixnal te c'aale, soc ja' yaxib ya xc'ot yu'un te tulan yic'al ja'ale.