Isaías 39 - Bible in Tzeltal de Oxchuc y Tenejapa

Ezequías la yic' ochel abatetic tal ta Babilonia

¹ Ja' jich sc'aalelal a, te muc' ajwalil Merodac-baladán snich'an te Baladán, te muc' ajwalil yu'un Babilonia, la yaiybey stojol sc'oplal te ay ta chamel te Ezequías, soc te bit'il bujts'najix q'uinal ya yaiye. Jich yu'un ta swenta abatetic la sticun bael cartaetic soc smajt'an.

² Te Ezequías bujts'naj yo'tan yu'un te c'otic, soc la yac'bey yil te sc'ulejale, te plata soc te oro, perfumeetic, t'ujbil aceite, soc te at'ejibaletic yu'un guerra, soc spisil te bitic stsoboje. Ta spisil la yac'bey yilic ta spalacio, soc ta spamal ta bay ya xmandalaje.

³ Jich yu'un bajt' te j'alwanej Isaías, ba yil te muc' ajwalil Ezequías, soc la sjojc'obey: —¿Banti talemic te winiquetique, soc bila la yalbat? —la yut. Te Ezequías la sjac': —Talemic ta c'ubul q'uinal ta yan lum, jajch'emic tel ta Babilonia —xi'.

⁴ Te Isaías la sjojc'obey: —¿Bi la yilic ta palacio awu'un? —xi'. Te Ezequías la sjac': —La yilic spisil te bitic ay ta jna soc ta yawil jc'ulejal —xi'.

⁵ Jich yu'un te Isaías la yalbey te Ezequías: —Aiya awaiy stojol sc'op te Cajwaltic te Spisil ya xju' yu'un:

⁶ “Ya me sta sc'aalelal te spisil te bitic ay awu'un ta apalacio, soc spisil te bitic la stsob te antiguo ame'-atat, ja' to c'alal ora yo'tic, ya x'ich'ot bael ta Babilonia. Ma me ayuc bi ya xjil.

⁷ Ay me ats'umbal ya x'ic'otic bael ta Babilonia, ya me spas ta capón, ya me x'ac'otic ta mosoil ta spalacio te muc' ajwalile”, xi' me te Cajwaltique —xi' te Isaiase.

⁸ Te Ezequías la yal ta yo'tan: “Te jayeb xan c'aal cuxulon lamal nax q'uinal, soc jun nax co'tan ya x'ainon”. Jich yu'un la sjac'bey sc'op te Isaías: —Te sc'op Cajwaltic la awich'bon tele, c'uxtayel ta jtojoltic yu'un —xi'.