Isaías 37 - Bible in Tzeltal de Oxchuc y Tenejapa

Cajwaltic la scoltay Judá te ay ta ochintayel

¹ C'alal la yaiy stojol te muc' ajwalil Ezequías, la xch'i' sc'u' yu'un, la slap ch'ixal pac' swenta seña xc'uxul mel-o'tan, soc bajt' ta templo yu'un te Cajwaltique.

² Soc la sticun bael te Eliaquim te mayordomo yu'un te palacio, te cronista Sebná, soc te sacerdoteetic te mamaliquixe, ba yilic te j'alwanej Isaías snich'an Amoz. Spisilic slapojic bael ch'ixal paq'uetic.

³ Albotic yu'un te muc' ajwalil: —Jich me xawalbey te Isaías: “Ta ora yo'tic ay tulan c'op ta jtojoltic, mel-o'tantic sba, castigo soc pejc'anel ta jtojoltic; jich me jwocoltic te bit'il ants te yorailix ya x'ayin yal, te ma'yuquix yip ya xjil yu'une.

⁴ Te Cajwaltic te Dios awu'une la yaiybey stojol sc'op te mach'a yich'oj yat'el te ticunot tel yu'un te muc' ajwalil yu'un Asiria, te tal yixtac'optay te cuxul Diose. Ayuc bit'il ya yac'bey castigo yu'un te bitic la yale. La nix yaiy stojol stuquel a te Dios awu'une. C'oponbotic Dios a te jich xan yipal jilemotic ta c'abale”, uta me —xi' bael sc'op te muc' ajwalil Ezequías.

⁵ Jich te mach'atic yich'oj yat'elic yu'un te muc' ajwalil Ezequías, ba sc'oponic te Isaías.

⁶ Te Isaías la sujt'es te aiyeje, te jich ya xju' yalbeyic te ajwalil Ezequiase: —Te Cajwaltic jich la yalbon: “Ma me xiwat yu'un te bitic bol c'opetic la yalbon ta jtojol te abatetic yu'un te muc' ajwalil ta Asiria.

⁷ Ya calbat awaiy te ay bi ya cac'bey yaiy stojol, te ya me sujot sujt'el bael ta slumal yu'un. Tey me ya xba cac' yich' milel a”, xi' me —xi' bael sc'op.

⁸ Te asiria-winic te tulan yat'ele, la yaiy stojol te la yijq'uitayix te lum Laquis te muc' ajwalil yu'un Asiria. Jich yu'un la yijq'uitay uuc te Jerusalén, ba sta te muc' ajwalil yu'un Asiria te yaquix ta yac'beyel guerra te lum Libná.

⁹ Tey la yaiy stojol a te muc' ajwalil yu'un Asiria te yac ta talel ta scontroinel te muc' ajwalil Tirhaca yu'un te Etiopía. Loq'uemix tel ta beel soc soldadoetic yu'un, te ya xtal yac'bey guerra. Ja'uc me to, yan xan buelta te muc' ajwalil yu'un Asiria la sticun xan bael abatetic te muc' yat'elic ta stojol te muc' ajwalil Ezequías yu'un Judá, te jich c'o yalbey:

¹⁰ “Te Dios awu'un te smuc'ulinej awo'tane, yalojbat te ma x'och ta jc'ab te Jerusalén; ja'uc me to, ma xawac' aba ta lo'layel ta stojol.

¹¹ Te ja'ate awaiyoj te bila spasoj te muc' ajwaliletic yu'un Asiria ta spisil te lumetic te la sjine. Ja' xan te ja'ate, ¿yu'un bal ya acoltay aba ta ac'op?

¹² ¿La bal yaiyic coltaywanej te diosetic ta stojol te yantic lumetic la sjin te antiguo jme'-jtate, jich bit'il te Gozán, Harán, Resef, soc te yajwal Bet-edén te nainemic ta Telasar?

¹³ ¿Banti ay yo'tic te muc' ajwaliletic yu'un Hamat, yu'un Arfad, yu'un Sefarvaim, yu'un Hena soc yu'un Iva?” xi' sc'op.

¹⁴ Te Ezequías la stsac te carta te la yac'bey ta sc'ab te abatetique, la yil te bila la yal tey a. Ta ora nax a bajt' ta templo, soc la slejch'an te carta ta stojol te Cajwaltique,

¹⁵ jich la yal ta sc'oponel te Diose:

¹⁶ —Cajwal te Spisil ya xju' awu'une, Diosat yu'un Israel te tey ay amuc'ul nactijib ta sba te querubinetic, ja'at nax Diosat atuquel, yu'un ay ta awenta spisil te mach'atic ya xmandalaj ta balumilal; ja'at la achicnantes ch'ulchan balumilal.

¹⁷ Aiybon awaiy, Cajwal, soc aiybon awaiy stojol te bila ya cale. Ac'a tel asit, Cajwal, soc ilawotic. Aiya awaiy stojol sc'op te Senaquerib te la sticun tel ta alel ta jtojole, ja' te sc'op spisil abolc'optayel yu'une, te cuxul Diosat atuquele.

¹⁸ Melel nix a, Cajwal, te mach'atic muc' ajwaliletic yu'un Asiria, sjinoj spisil te nacionetic soc te sq'uinalique,

¹⁹ soc la xchic'beyic te diosetic yu'unique. Melel nix a ma diosuc te bitic nax pasbil ta te' o ton te spasoj te winiquetique, jich yu'un la sjinic.

²⁰ Ta ora yo'tic, Cajwal, Dios cu'untic, coltayawotic ta sc'ab, swenta yu'un ta spisil nacionetic ta balumilal ya me sna'ic te ja'at Cajwalticat, te jip jtul Diosat a —xi' ta sc'oponel.

²¹ Te Isaías la sticunbey ta alel te Ezequías: —Jich la yal te Cajwaltic, te Dios yu'un Israel: “Te jo'one la caiy stojol te la ac'oponon yu'un te Senaquerib, te muc' ajwalil yu'un Asiria”, xi' me te Diose.

²² Ja' c'opetic la yal Cajwaltic ta swenta te muc' ajwalil yu'un Asiria: “Te lum Sión, jich c'oem bit'il jtul ach'ix te ya stse'luyat, Senaquerib. Te yajwal te Jerusalén ya sjimulay sjolic ta apat ta slabanbelat te c'alal ya xbaatix ae.

²³ ¿Mach'a la abolc'optay soc te la awixtac'optaye? ¿Mach'a a te toy ac'op ta stojole, soc te la atoy asit yu'un te toyolat la awaiy yu'une? Ja' la apas ta stojol te Ch'ul Dios yu'un Israel.

²⁴ Ta swenta te ajo'tac ta ajwalile, la awixtac'optay te Cajwaltique. Melel la awal: ‘Ma p'isbiluc yajtalul te carretaetic yu'un guerra te ay ta jwenta. Moon bael ta sba witstiquil, ta bay teq'uel moel yu'un Líbano. La jbojbey te cedroetic yu'un te toyolic ta jyalele, soc la jts'etbey te c'antajetic yu'un te bayal yutsilique. La jta c'oel te bay mero toyol witsetique, soc te ja'maltic te ts'unbil nichimetic yilele.

²⁵ Ta yan q'uinaletic la joc' pozoetic soc la cuch' te ja'e, soc stan cacan la jtaquintes spisil te ja'etic yu'un Egipto’, te xaate.

²⁶ ¿Ja'uc me to, ma ba ana'oj stojol te jo'on Ajwalilon la cac' c'otuc ta pasel spisil? C'alal ta namey q'uinal chajbanbil ta nopel cu'un, ta ora yo'tic c'otix ta pasel cu'un. Jich yu'un, ja' la ajin te lumetic te tulanic sts'ajc'ule, la ac'atp'un ta busulbus ts'ajq'uetic.

²⁷ Te yajwal te ma'yuc bi ya xju' yu'unique, ja' nax nojel xiwel ta yo'tanic soc q'uexlal; jich c'oemic te bit'il aquiltic ta q'uinal, jichic bit'il yaxal aquiltic, jich c'oemic te bit'il aquetic ya xchicnajic ta sba te na te ya xbacub yu'un ic' te ya xtal ta sloq'uib c'aale.

²⁸ Ya jna' spisil banti yacat ta beele, soc spisil te awat'ele; ya jna' te jajch'em slab awo'tan ta jtojole.

²⁹ Ya jna' te sc'ajc'al awo'tan soc te atoybaile, jich yu'un ya cac'bat staq'uinal ani' soc sfrenoil awe, ya cac' sujt'at bael ta abe te bay nix talate”, xi' te Cajwaltique —xi' te Isaías.

³⁰ Te Isaías la yalbey te Ezequías: —Ja' me señail te bila ya xc'ot ta pasele: ja' in ja'wil to soc te yan ja'wil, ya me awe'elinic ja'ex te trigo te jich nax ya xch'i stuquele. Yan te yoxebal ja'wile, ya me xju' ya ats'unic soc ya aset'ic loq'uel, ya ats'unic ts'usubiltic, soc ya yich' we'elinel te site.

³¹ Te mach'atic colemic jilel ta Judá, jich c'oemic te bitic ts'unbile; ya me yac' coel yisimic soc ya me yac' sitic.

³² Melel jteb xanix te mach'atic ya xjil ta Jerusalén; ta wits Sión ay me mach'atic ya xcolic jilel. Spisil me ya spas soc yutsil xc'uxul yo'tan te Cajwaltic te Spisil ya xju' yu'une.

³³ “Jich ay sc'oplal yu'un Cajwaltic te muc' ajwalil yu'un Asiria: “Ma xju' ya x'och ta Jerusalén, ma xju' ya st'imuy ta stojol ni junuc yat'ejibal st'im, ma xju' ya yac'bey guerra soc smajq'uilic, ma xju' ya sbut'beyic moel lum swenta smoibal sts'ajc'ule.

³⁴ Ta bay nix te be a talique, tey nix ya xcha'sujt'ic bael a; ma me xju' x'och ta lum in to. Jo'on Ajwalilon, ya cal te jc'ope.

³⁵ Ya xc'opojon yu'un te lume soc ya jcoltay ta swenta xc'uxul ta co'tan te cabat David soc ta swenta sc'uxul jba ta co'tan uuc”, xi' me te Diose —xi' te Isaías.

³⁶ Te ch'ul abat yu'un Cajwaltic bajt', ba smil jo'eb slajunwinic ta jmil (185,000) soldadoetic ta scampamento te asiriaetique; ta xchebal c'aalil spisilic lajemiquix a te sacub q'uinale.

³⁷ Jich yu'un te Senaquerib, te muc' ajwalil yu'un Asiria, la sjach sbiluc ta scampamento soc sujt' bael ta Nínive.

³⁸ Ay jun c'aalil c'alal yac ta yalel wocol ta templo yu'un Nisroc te dios yu'une, c'ot ta milel yu'un snich'nab nix, ja' te Adramelec soc Sarézer. Loq'uic ta anel, bajt'ic ta sq'uinal Ararat. Ta patil ja' la sjelolin ta ajwalil te Esarhadón, ja' nix te snich'ane.