Isaías 36 - Bible in Tzeltal de Oxchuc y Tenejapa

Senaquerib la yochintabey sq'uinal Judá

¹ Ta xchanlajunebal ja'wil ay ta muc' ajwalil a te Ezequías, te Senaquerib, te muc' ajwalil yu'un Asiria, la yac'bey guerra spisil te lumetic te sjoyoj sbaic ta tulan sts'ajc' ta Judá, soc la yu'unin spisilic.

² C'alal ta lum Laquis la sticun bael jtul capitán-soldado soc bayal soldadoetic te tulanique, ba yilic te muc' ajwalil Ezequías ta Jerusalén. Tey la yac' sbaic ta nopol beja' yu'un estanqueil te ay ta cajale, ta be ya xbajt' ta sq'uinal te Sac'jibal Ach' Paq'uetique.

³ Tey loc' stabel sba soc te Eliaquim te snich'an Hilcías, te ja' ay ta mayordomo yu'un te muc' ajwalile; soc te jtul cronista Sebná; soc Joa te snich'an Asaf, ja' secretario yu'un te muc' ajwalile.

⁴ Te asiria-winic, te capitán-soldado te cajal yat'ele, jich la yal: —Albeya te Ezequías te sc'op te mero muc' ajwalil yu'un Asiria: “¿Bi yu'un te jun nax awo'tan ya awaiye?

⁵ ¿Ya bal acuy te pajal yip t'ujbil c'opetic te bit'il te yip ya xtuun yu'un yaq'uel guerra? ¿Bi smuc'ulinej awo'tan te ya atoy aba ta jtojole?

⁶ Te ya quile, ja' smuc'ulinej awo'tan te ya xc'opoj awu'un te Egipto. Lec ay, te Egipto jich bit'il jun jatbil jalal. Teme ay mach'a ya x'ipaj ta sc'op tey a, ya me xlowot yu'un, soc ya me solesbot c'axel ta sc'ab. Ja' me jich ya xc'ot te faraón, te muc' ajwalil yu'un Egipto, ta swenta te mach'a ya yac' smuc'ul yo'tan ta stojole.

⁷ Yan teme ya awalbon: ‘Ja' smuc'ulinej co'tantic te Cajwaltic te Dios cu'untique’, teme xaexe, ¿yu'un bal ma la slajinbey sc'oplal Ezequías te toyol ch'uunjibaletic soc te scajtijib smajt'an te Dios ya awale? Soc la yalbey mandal te winiquetic ta Judá soc ta Jerusalén te ja' nax ya yac'bey milbil smajt'an ta jun nax scajtijib smajt'an te Diose”, xi' sc'op te cajwale —xi' te winique.

⁸ Soc la yal xan: —Ja' lec pasa trato soc te cajwale, te muc' ajwalil yu'un Asiria: Jo'on ya cac'bat cha'mil (2,000) caballoetic te jichuque, teme ya atabey yajwal ta cajtibinele.

⁹ Te ja'ate ma xju' awu'un te ya awac' anuc bael ta xiwel ni te mach'a peq'uel xanix yat'elic te asiria-winiquetique. ¿Yu'un bal yacat ta smaliyel te faraón yu'un Egipto ta ac'op, te ya slebat winiquetic soc scaballoic ta Egipto?

¹⁰ Soc xan ¿yu'un bal ya acuy te jich nax talon ta guerra, te ma swentauc te Awajwalique? Ja' nix la yal mandal te tal cac'beytic guerra soc ta sjinel te lume —xi'.

¹¹ Te Eliaquim, Sebná soc te Joa la sjac'beyic sc'op te asiria-winic te ay yat'ele: —Wocoluc, c'oponawotic ta arameo-c'op, yu'un jo'otic ja' ya caiytic stojol te arameo-c'ope. Ma xac'oponotic ta hebreo, melel spisil winiquetic ta sba ts'ajc' yacalic ta yaiyel stojol —xiic.

¹² Ja'uc me to, te asiria-winic te tulan yat'ele, la yal: —Ma ja'uc ta swenta awajwal, ni ma ja'uc ta awentaic te ja'exe, te mandal la yalbon tel te muc' ajwalil cu'un ta Asiria; ja' me ta swentaic te winiquetic te ayic ta sba te ts'ajq'ue. Jich yu'un ja'ic soc nix te ja'exe, ya me xc'ot ta pasel te ya alo'ic te atsa'ic soc te ya awuch'ic te achuxique —xi'.

¹³ Jich yu'un te mach'a yich'oj tulan yat'el tejc'aj, soc tulan awun ta hebreo: —Aiya awaiyic te bila yaloj te mero muc' ajwalil yu'un Asiria:

¹⁴ “Ma me xawac' abaic ta lo'layel yu'un te Ezequías; ma me xju' yu'un scoltaybelat stuquel”, xi'.

¹⁵ Teme ya sc'an yalantesbat awo'tanic te Ezequías, te ja' ya smuc'ulin awo'tan te Awajwalique, soc teme ya yalbeyex: “Ta mero melel ja' ya scoltayotic te Cajwaltique; ma xju' ya yac'bey ta sc'ab Asiria te lume”, teme xie,

¹⁶ ma me xach'uunic. Te muc' ajwalil yu'un Asiria la yalbon tel mandal te ya calbeyex te yacuc bic'tajanic ta stojole, soc te jun awo'tanic ya awac' abaic ta stojole, jich me ta juju-jtul jun awo'tanic ya awe'elinic te sit ats'usubic soc te higuera awu'unic, soc te ya awuch'ic te ja' te ay ta apozoique.

¹⁷ Ta patil ya yiq'uex bael ta yan q'uinal te pajal nix soc te alumalique, ja' te q'uinal te ya yac' ta lec te trigo soc ts'usubiltic ta swenta spasel pan soc vino.

¹⁸ Teme ya yalbat te Ezequías te ya scoltayex te Dios te Awajwalique, ma me xawac' abaic ta lo'layel yu'un. ¿Ay bal jtuluc te diosetic yu'un te lumetic te la scoltaybey ta sc'ab te muc' ajwalil yu'un Asiria?

¹⁹ ¿Banti ay te diosetic yu'un Hamat soc te yu'un Arfad? ¿Banti ay te diosetic yu'un Sefarvaim? ¿Ju' bal yu'unic scoltayel ta sc'ab Asiria te Samaria?

²⁰ ¿Mach'a ta spisil te diosetic yu'un te lumetic te ju' yu'un scoltayel te nación yu'un ta sc'ab te muc' ajwalil yu'un Asiria? ¿Bi yu'un te ya awal ta awo'tanic te ya xju' scoltay Jerusalén te Awajwalique? —xi'.

²¹ Ch'abalic jilel, ma la sujt'esic jp'aluc te aiyeje, melel te muc' ajwalil Ezequías yaloj mandal te ma me sjaq'uic jtebuc.

²² Jich yu'un jajch'ic ta mel-o'tan te Eliaquim te mayordomo yu'un te muc'ul nae, te Sebná te cronista, soc te Joa te secretario yu'un te muc' ajwalile; la xch'i' sc'u'ic yu'un. Jich sujt'ic bael ta yilel te Ezequías, swenta yu'un ba yalbey yaiy te bi la yal te asiria-winic te yich'oj tulan yat'ele.