Isaías 34 - Bible in Tzeltal de Oxchuc y Tenejapa

Castigo yu'un Dios ta stojol Edom

¹ Noptsajanic tel, lumetic, aiya awaiyic stojol; nacionetic, aiya awaiyic stojol. Ac'a yaiy stojol te lumq'uinal soc bitic ay tey a, te balumilal soc spisil te bitic ya yaq'ue.

² Melel te Cajwaltic ilinem ta stojol te nacionetic soc ta stojol spisil te soldadoetic yu'unique, ya yac'bey c'axuc swocol ta castigo soc ta lajel.

³ Te animaetic ya me yich'ic ijq'uitayel, te sbaq'uetalique ya me xjajch'ic ta tuubel, te xch'ich'elic ya me x'oquin jichuc ja' ta witstiquil.

⁴ Spisil te bitic xlemlajan ta ch'ulchan ya me sjin sbaic. Te ch'ulchane, ya me sbal sba, jich bit'il balal jun; soc spisil te eq'uetic ya me xtup' xojobilic, jich ya xch'ayic te bit'il ya xch'ay coel yabenal te sts'usub o te yabenal higuerae.

⁵ Ya xchicnaj ta ch'ulchan spuñal te Cajwaltique; ya xch'ay coel ta stojol Edom, ja' te lum te ya yil swocol ta lajele.

⁶ Te spuñal te Cajwaltic ya me xmul ta ch'ich' soc xepuil, jich bit'il ya yich' milel chijetic soc tentsunetic ta smajt'an Dios. Te Cajwaltic ya spas milbil majt'anil ta lum Bosra, mero muc'ul miltomba ta sq'uinal Edom.

⁷ Jich me ya xyalic te bit'il ja'mal wacaxetic, ch'in wacaxetic soc muc'ul toroetic; te sq'uinalique ya me sts'ajic ta ch'ich', te xepuil ya me xtup' tan yu'un.

⁸ Ja' me sc'aalelal ya xc'ot yu'un Cajwaltic te ya yac'bey spacol te Edom; ja' ya'wilal ya xc'ot te ya x'ac'bot stoj, ta scaj te lum Sión.

⁹ Te beja'etic yu'un Edom ya xc'atp'ujic ta xuch'il cha'bec'; te stanil ya xc'atp'uj ta azufre; te slum-sq'uinale, jich ya xtil bit'il cha'bec'.

¹⁰ Ma me xtup' sc'aal ta c'aaletic ni ta ajc'ubal; spisil ora ya xloc' xch'ailel. Jc'axel me ya x'ijq'uitayot jilel ta sbajt'el q'uinal; ma'yuquix mach'a ya xc'ax bael tey a, ni jtuluc.

¹¹ Ja' tey ya xnainic a te ajc'ubal mutetic jich bit'il te xoch'-mut soc te toytoy-mute, soc ya spas spechechic tey a te joj soc te xcuj-mute. Te Cajwaltic ya sc'atp'un ta jochol taquin q'uinal, ma'yuc bi ya xjil ta jyalel.

¹² Ma me ayuc xan muc' ajwalil ya xmandalaj yu'unic; spisil te jtsobwanejetic yu'unic ya xch'ayic c'axel.

¹³ Te palacioetic yu'unic ya xch'i tel ch'ixetic tey a; soc te tulanil ts'ajq'uetic yu'unic ya xch'i chic-ch'ixetic soc tsujc'um-ch'ixetic tey a. Ja' me yawilic ya xc'ot te ja'mal ts'i'e, soc ja' me ta bay ya xc'o ainuc te mutetic avestruz sbiilique.

¹⁴ Te chambalametic yu'un jochol q'uinal ya me sjoin sba soc te ja'mal ts'i'e; te me' tentsunetique ya me yawtay sbaic juju-jcojt'. Tey ya xnain a te xoch'-mut te ya xiwteswan ta ajc'ubale, ya me sta yawil yu'un cux-o'tanil.

¹⁵ Te toytoy-mute tey ya spas spechech a, ya xtonin tey a, soc ya stojq'ues yalatac, soc ya me stsob ta scanantayel. Tey nix ya stsob sbaic a te xiquetique, jcojt' stat soc jcojt' sme'.

¹⁶ Ya me ale ta libro yu'un Cajwaltic te ya yal: Ma me spas falta jcojt'uc te chambalametic, soc ma me spas falta jcojt'uc te yantsilele. Melel te Cajwaltic ja' nix yaloj mandal stuquel, soc ya stsob tel ta yic'al ye.

¹⁷ Juju-jcojt' yac'ojbeyix yil te yawilique; ta sc'ab spucojbeyix te sq'uinale. Jc'axel me ya x'och ta swentaic; tey me ya xnainic a ta sbajt'el q'uinal.