Isaías 30 - Bible in Tzeltal de Oxchuc y Tenejapa

Ma lecuc sc'oplal mach'atic ya sleic coltayel ta Egipto

¹ Te Cajwaltic ya yal ta jamal: —¡Ya me yil swocolic te toyba alnich'anetic, te stuquel-o'tan ya xchap sc'opic, ma jo'ucon ya sjojc'obonic! Ya xchajbanic te bila ya sc'an spasic, te ma jo'ucon ya cac'bey sna' stojole. Jich ya stsob ta c'axem to xan te smulique.

² Animal nax ya xbajt'ic ta Egipto, yan te jo'one ma'yuc bila ya sjojc'obonic. Yacalic ta sleel coltayel, te yacuc xc'opoj yu'unic te faraón, ya xbajt'ic ta anel ta yaxinal Egipto.

³ Ja'uc me to, te coltayel yu'un te faraón ja' nax ya sta q'uexlal yu'un a; te anjibal te yaxinal Egipto, ja' nax spejc'anel ya xc'ot.

⁴ Manchuc me la sticunix bael abatetic te muc' yat'elic te c'oemiquix c'alal ta lumetic Zoán soc Hanes,

⁵ spisil ya me sta q'uexlal yu'un te nación te ma'yuc sc'oplal ta jc'axel. Ma'yuc coltayel, ma'yuc bila ya staic a, ja' nax ya xch'ay sbaic a, soc ja' nax ya sta swocolic a—xi' te Cajwaltique.

⁶ J'alwanej c'op ta stojol chambalametic te ayic ta Néguev: Ta lumq'uinal te nojel yu'un te bitic xiweltic sbae, tey nainemic a te león-chojetic ya x'awunique, te jti'awal chanetic soc te dragonetic te ya xwilique, ya yich'ic bael te sc'ulejalique. Ya yac'beyic scuch bael te sburroic soc te scamelloic c'alal ta Egipto te lum te ma'yuc sc'oplal ta jyalele,

⁷ te mero ma'yuc yip, ma'yuc bi ya xju' yu'un ta coltaywanej. Ja' swentail te jich cac'ojbey sbiilin: “Muc'ul chambalam te ya x'awune, ma'yuc bi ya spas ni jtebuc”, xi' me.

⁸ La' me yo'tic, ts'ibuya ta jpejch' ch'ujte', soc ac'a ta jun, ac'a ainuc tey a ta swenta sna'jibal bael, yu'un ya me yac' ta na'el sbajt'el q'uinal.

⁹ Ja' in ants-winiquetic to ja' te lum te toybae, te ma junuc yo'tan, te ma sc'an xyaiyic stojol te p'ijubtesel yu'un te Cajwaltique.

¹⁰ Ya yalbeyic ta stojol te mach'atic ay bila ya yilique: —Ma me ayuc bila ya awilic-ya yutic. Soc ya yalbeyic ta stojol j'alwanejetic: —Ma me ayuc ya awalbotic te bila smelelil te ac'bilex ana'ic stojole. C'oponawotic ta lequil c'op, ma me x'apojbotic te bila ay ta co'tantic.

¹¹ Ijq'uitaya jilel te be at'unoje, q'ueja abaic loq'uel ta bay te toj be. Ma xawac'otic ta stojol te Ch'ul Dios yu'un Israel —ya yutic.

¹² Jich yu'un te Ch'ul Dios yu'un Israel ya yal: —Te ja'exe ma x'ac'anic te ya yich' jultesel atsaique. Ja' ya awich' abaic ta muc' soc te uts'inwanej soc te bila amene, ja' ipajemat ta ac'op yu'unic a;

¹³ ja' yu'un te ja'exe ay amulic. Pajalex soc te toyol ts'ajc' te yac ta jatele, te c'alal ma'yuc bi ay ta sna'el a te ya xbusq'uej coel.

¹⁴ Jich ya xwuy te bit'il pac'bil oxom te ya xlaj ta jc'axel, te ma'yuquix xejt'elel ya xjile ni jtebuc te xejt'elel te ya xtuun ta sloq'uesel ac'al a ta yawil c'ajc', ni jtebuc xejt'elel te ya xtuun ta loq'uesel ja' a ta pozo —xi' te Diose.

¹⁵ Te Cajwaltic te Ch'ul Dios yu'un Israel ya yal: —Sujt'anic tel, soc lamal me awo'tanic, jich me ya xcolex. Te bit'il lamal nax awo'tanic soc te bit'il ay smuc'ul awo'tanique, tey me ay a te awipique —xi' te Cajwaltique. Pero te ja'exe ma la ac'anic,

¹⁶ melel la awalic: “Ja' lec ya x'anotic bael ta caballo”, xaex. Lec ay, jich ya x'anex bael abi. Soc la awalic xan: “Ya xmootic bael ta carretaetic, animal ya xbootic”, xaex. Lec ay, ja' animal ya xbajt'ic te mach'atic ya snutsex baele.

¹⁷ Jmil ta jtul ya x'anex bael ta swenta jtul nax winic te ya xiwtesexe, soc apisilic ya x'anex bael ta swenta jo'tul nax winiquetic, ja' to me chican jteb xanix ya xjilex jich bit'il te' ya xjil ta sba wits, o jich bit'il bandera teq'uel ya xjil ta bujul wits.

Jamal albil xc'uxtayel te lume

¹⁸ Ja'uc me to, te Cajwaltic ya smaliyex, yu'un ya sna'beyex yo'bolil abaic; mero toyol yo'tan te ya yac'beyex awilic te xc'uxul yo'tane, melel te Cajwaltic ja' Dios te toj yo'tan ta chajbanwaneje. Bin nax me yutsil q'uinal ya yaiyic spisilic te mach'atic ya smaliyic te Cajwaltique.

¹⁹ Lum Sión te nainemex ta Jerusalén, ma ba ya x'oc'atix. Te Cajwaltic ya sna'bat yo'bolil aba c'alal ya yaiybat awaw ta sc'anel coltayel yu'une, ora nax ya sjac'bat teme c'ot ta stojole.

²⁰ Manchuc me te Cajwaltic ya yac'bat we'elil c'oem ta swenta woclajel, soc jich bit'il ja' swenta mel-o'tan, te bit'il ja' jp'ijubteswanej awu'une, ma ba ya snac' xan sba; ya me awil soc asit ta jyalel.

²¹ Teme ya xjowejat bael ta wa'el o ta q'uexen, ya me awaiy c'op ta apat, jich me ya yalbat: “Tey ay te be, beenanic”, xi' me.

²² Soc ya me awilay te loc'ombaetic te apasoj ta plata, soc te apotsoj ta oro, jichuc me ya xc'ot ta asitic te bila mero c'ax bolobene. Ya me ach'oj bael, bolobuc sc'oplal awu'un, jich me ya xc'ot ta awo'tan te bila amene.

²³ Te Cajwaltic ya me yac'bat tel ja'al yu'un te awawal te ya awaj ta lumq'uinale, te lumq'uinal ya me yac' bayal trigo te lec ta tuuntesele. Jich c'aalil ya sta lec swe'elic ta c'axem to xan te chambalametic awu'unique.

²⁴ Soc ay lec swe'elic te jelawen sbujts' ya yaiyic te j'at'el-wacaxetic soc te burroetic te ya x'at'ejic ta aq'uinale.

²⁵ C'alal ya xc'ot sc'aalelal te muc'ul miltomba, soc te ya xjin coel te toyol ts'ajq'uetic, ay me ja'etic te c'ax tulan ya x'oquinic ta spisil te toyol witsetic soc te peq'uel witsetique.

²⁶ Te Cajwaltic ya xpoxtay soc ya spotsbey yejch'en te lum yu'une. Te u jich me ya yac' xojobil bit'il te c'aale. Te xojobil te c'aale juqueb xan buelta ya xtoy yip te xojobile, jich bit'il xojobil juqueb c'aaletic te jun nax ayique.

Castigo ta stojol Asiria

²⁷ Ya me awilic, ya xtal ta c'ubul te Cajwaltique; te sc'ajc'al yo'tan yac ta tilel soc muc'ul pimil ch'ail. Nojel yilimba ta ye, te yaq'ue, jich bit'il c'ajc' te ya xlajinwane.

²⁸ Te ic' ya xloc' ta ye jich c'oem bit'il ja' yac ta malel loq'uel te ya xc'ot c'alal ta snuc' te winique. Ja' ya xtal xchucbey yugo ta snuc' te nacionetic swenta yu'un ya yic' bael ta jinel; ja' ya xtal yac'bey sfrenoil ye te lumetic, swenta yu'un ya me yac' xjowejic a.

²⁹ Yan te ja'exe, ya me xc'ajinex jich bit'il ta ajc'ubal yu'un ch'ul q'uine; bin nax me awo'tanic, jich bit'il mach'a ya xbeen ta swenta sc'op te amay, te ya xbajt' ta wits yu'un Cajwaltic, ja' te anjibal yu'un te israeletique.

³⁰ Te Cajwaltic ya me yac' ta aiyel stojol sc'op te bayal yipe; ya me yac' ta ilel yu'el te ya x'at'ej soc yilimba te xiweltic sbae, soc c'ajc' te xpulpun nax ta tilel te ya xlajinwane, soc chawuc, ja'al soc bat.

³¹ C'alal ya yaiybey stojol sc'op te Cajwaltic soc te ya yich'ix a te castigo, te Asiria ya me xnoj muc'ul xiwel ta yo'tan.

³² Te jujun jyalel majel ya yac' te Cajwaltic ta stojolic, ya xtijot c'ayobetic soc arpaetic. Te Cajwaltic ya me yac'bey guerra te xiweltic nax sbae.

³³ Ayix bayal c'aal chajbanbil ta swenta Asiria soc ta swenta te muc' ajwalil yu'un, te yawil woclajel, te muc' sjamalul soc najt' coel. Ay tsumbil c'ajc' tey a, te yac ta tilel soc c'axem to xan bayal si'il. Ya me stiles c'ajc' a te ic' ya xloc' ta ye te Cajwaltique, jich me ya xtal te azufre te bit'il snojel ja'.