Isaías 3 - Bible in Tzeltal de Oxchuc y Tenejapa

Castigo ta stojol Judá soc Jerusalén

¹ ¡Ilawilic ta lec! Te Cajwaltic te Spisil ya xju' yu'un ya me sloq'ues ta Jerusalén soc ta Judá spisil te mach'atic ya sle te bitic ya xtuun, spisil ta jchajp we'eliletic soc te ja'e.

² Ya me yac' ch'ayuc ta jc'axel te mach'a tulan, te soldado, te juez, te j'alwanej, te mach'a ay bi ya sna' yalel, te mamal,

³ te capitán-soldado, te winic ich'bil ta muc', te jtojteswanej, soc te mach'a ay sp'ijil ta sc'op te ay bila ya sna' spasele.

⁴ Ja' me ya yaq'uic ta ajwaliletic yu'unic te queremetic, soc alaletic me ya xmandalaj ta stojolic.

⁵ Ja' me ta scajic te jich ya xc'ot te lume: Ya xjajch'ic ta guerra, manchuc me mero sjoy sbaic. Te ach'ix-queremetic ya me sjajch'ic ta yilbeyel yo'tanic te me'el-mamaletique; te mach'atic peq'uelic ja' me ya yilbeyic yo'tanic te mach'atic muc' sc'oplalique.

⁶ Te yermano sba soque ya me yalbey te mach'a ay ta sna te state: —Ja'at ay ac'u' ya alap atuquel; ja'at me ajwalilat cu'untic, mandaltesa ta stojol te lum te jinem sts'ajc'ule —xi' me.

⁷ Te yane ya sjac': —Ma xju' cu'un xpoxtayel te bitic amenique. Ma'yuc jwe'el ta jna, ni ma'yuc jc'u' ya jlap. Ma me xawac'onic ta ajwalil yu'un te lume —xi' me.

⁸ Ta smelelil ya xjin te Jerusalén, soc te Judá ya xjin jilel. Melel tey yaquic ta yalel soc ta spasel te bitic ya scontroinic a te Cajwaltique, ja' te bitic ya sbolc'optayic a te smuc'ul yat'ele.

⁹ Ja' nix ya xchicnaj ta yelawic te smulique; ma xju' ya smuquic. Ja' pajalic soc te lum Sodoma, ya xchicnaj smulic ta stojol spisil balumilal. ¡Obol me sbaic, melel stuquelic nix te ya xchajban castigo ta stojolique!

¹⁰ Bin nax yutsil te mach'a toj yac'oj sba, melel lec ya xc'ot ta loq'uel yu'un, soc ya me yaiybey yutsilal te sit yat'ele.

¹¹ ¡Obol sba te mach'a c'ax amen yat'ele, melel amen ya xc'ot ta loq'uel! Dios me ya yac'bey stoj, ja' chican te bit'il ay te yat'ele.

¹² Jtul ch'in querem te ya xmandalaj ta uts'inwanej ta stojol te lum cu'une; te mandalteswanej ta stojolic ay ta sc'abic antsetic. Lum cu'un, te j'ic'wanejetic awu'un ya slo'layex, ya sjowtesex ta be.

¹³ Te Cajwaltic chapalix yu'un te ya yich' ta c'op, chapalix yu'un te ya yac'bey castigo te lum yu'une.

¹⁴ Te Cajwaltic ya yic' te mamaletic ich'bilic ta muc' soc te jtsobwanejetic yu'un te lum ta yalbeyel ta jamal te smulique: —Ja'ex te yacalex ta sjinel te ts'usubiltic cu'un; yacalex ta yelc'anel te me'baetique, te bi ya awelc'anic ya aq'uejic ta anaic.

¹⁵ ¿Bi awentaic stenel ta yuts'inel te lum cu'une, soc te ya atec'beyic yelaw te me'baetique? —xi'. Ja' nix te Cajwaltic te Spisil ya xju' yu'un te la yal loq'uel ta ye.

Castigo ta stojol antsetic ta Jerusalén

¹⁶ Te Cajwaltic jich la yal xan: —Te antsetic ta lum Sión, te cajal yac'oj sbaique, te stoyoj sjolic ta beele, te yac ta c'abuywanej, te jxujt' ma'yuc q'uexlal ta sitique; c'alal ya xbeenic, yaquic ta beel ajc'ot, soc te yac ta yixlanel yacanic ta beele.

¹⁷ Jich yu'un ya me jt'axanbey jilel sjolic yu'un chamel ta swenta castigo, soc ya me jt'ananbey jilel sbaq'uetalic ta swenta q'uexlal —xi'.

¹⁸ Te bi c'aalil ya cale, te Cajwaltic ya xch'ay ta jc'axel spisil te xch'alilique: te xch'alil yacanic, te taq'uinetic lechajtic ta stibaic, te bitic pajal ta ilel soc te yach'il u,

¹⁹ te staq'uinal xchiquinic, te xch'alil snuc' sc'abic, te smujq'uil sjolic,

²⁰ te spejch'il sjolic, te scadenail snuc' yacanic, te xchujq'uil ch'ujt'ic, te limetaetic yu'un perfume, te bitic ya smaquic pucuj ta sc'opic a,

²¹ te ch'ocowetic, te xch'alil sni'ic,

²² te sc'u'ic te muc' yutsile, te snajt'il sc'u'ic, te srebosoic, te sbolsaic,

²³ te espejoetic, te t'ujbil paq'uetic, te sbejch'il sjolic, soc te xchujq'uilique.

²⁴ Te sbujts' perfume ya xc'atp'uj ta stuil; te xchujq'uil ch'ujt'ic, lazo ya xc'ot sjelol; te buen tesbil sjolique, t'axal ya xjil; te c'ax t'ujbil sc'u'ique, ch'ixal pac' ya xc'ot sjelol; te bit'il jelawen yutsil ta ilel te antsetique, ya me yich' marca ta c'ajc'al tan.

²⁵ Te winiquetic awu'unique ya me xch'ayic ta guerra, te soldadoetic awu'unic ya me xlajic ta yorail guerra.

²⁶ Te lum ya me x'oc', bayal me ya smel yo'tan, soc jc'axel me ya xpijt' jilel ta jyalel.