Isaías 29 - Bible in Tzeltal de Oxchuc y Tenejapa

¹ ¡Ya me yil swocol Ariel, Ariel, te lum bay nain David! Ac'a c'axuc xan ja'wil yu'un te ya spasulayic te q'uinetique,

² patil ya me cac' xwoclaj yo'tan te Ariel. Ay me mel-o'tan soc ay me ajc'an yu'un. Te lum jich me ya xc'ot cu'un te bit'il Ariel.

³ Ya me jticun tel bayal soldadoetic cu'un swenta yu'un ya sjoytayat, ya me smacat ta ajoytayel te soldadoetic; soc ay bila ya jbusan ta swenta cac'belat guerra.

⁴ Peq'uel me ya xc'oat, limil me ya xjilat ta lum; te ac'ope, jteb xan meix ya xchicnaj yu'un te tane, te ac'ope jteb xan meix te ya xchicnaj loq'uel ta lumq'uinal.

^5-6 Pero ora nax ya xtal te Cajwaltic te Spisil ya xju' yu'une, ya me yac'bey castigo te acontrotaque, ta chawuc, ta nijq'uel, ta swenta te bila muc' sc'ope, ta tulan sutu-ic', ta tulan yic'al ja'al soc ta tojc'al jinwanejetic. Te acontrotac te ma p'isbiluc yajtalule, tan ya xjilic ta jyalel, bayalic te mach'atic ya yuts'inexe ya me yich'ic wilesel bael jichuc taquin ac.

⁷ Spisil me lumetic ma xju'ix ta ajtayel te ya yac'bey guerra te Ariel, spisilic te mach'atic ya yac' sbaic ta guerra ta stojole, soc te ya yac'bey guerra ta bay ts'ajq'uetic yu'une, soc nix te mach'atic ya xtenawanic ta uts'inwaneje, jich me ya xc'otic te bit'il waichejel, o jich bit'il te ay bila yac ta yilel ta ajc'ubale.

⁸ Jich ya xc'otic te bit'il mach'a ay ta wi'nal te ya swaichin te yac ta we'el ta sc'ope; ja'uc me to, te c'alal ya xwijc' sit, ya yaiy te jochol te xch'ujt'e. O jich bit'il mach'a taquin yo'tan te ya swaichin te yac ta yuch'el ja' ta sc'ope, pero taquin yo'tan a te ya xwijc' site, soc bacuben ya yaiy te sbe yiq'ue. Jich ya xc'ot ta stojol spisilic te lumetic te ma p'isbiluc yajtalul te ya yac'beyic guerra te wits Sión.

⁹ Pasaic bael te ma xtojobexe. Pasaic bael, jich bit'il ma'sit te xujt' ma xyil q'uinale. Pasaic te sts'eunajex jichuc jyacubeletique, manchuc me ma'yuc awuch'oj te tulan uch'balile.

¹⁰ Melel te Cajwaltic sticunejbeyex tel ta atojolic buen sc'ubulil wayel. Te j'alwanejetic ja' me sitic c'oem te lume; ja'uc me to, te Cajwaltic smacojbey ta pac' c'oem te sitique.

¹¹ Spisil bila ac'bil ta ilel jich c'oem awu'unic te ay bila ts'ibubil ta lejch'el jun te balbil soc te yich'oj sello. Teme ay ya awac'bey yil jtuluc te mach'a ya sna' yilel jun te jich ya awalbeye: “C'opona te june”, teme ya awute, ya sjac': “Ma xju' cu'un, melel yich'oj sello”, xi' me.

¹² Soc teme ja' ya awac'bey te mach'a ma sna' yilel jun te jich ya awalbeye: “C'opona”, teme ya awute, ya sjac': “Ma jna' yilel jun”, xi' me.

¹³ Te Cajwaltic la yalbon: —Te lume ya yac' sba ta abatinel ta jtojol ta sc'op; ta ye nax ya yich'on ta muc', pero ma'yucon ta yo'tan ta jyalel. Te ya yalbonic wocol ta sc'opique, ja' te bitic wejt'em yu'unic te snopojic nax ta sjolique.

¹⁴ Ja' yu'un ay me señailetic soc jchajp at'eliletic, ya me cac' xch'ay jilel q'uinal yaiyic yu'un te lume. Te sp'ijil sc'op te mach'a p'ijique ya me xch'ay ta jc'axel; te sp'ijil sjol te mach'atic ay sp'ijil yo'tanique ya me xch'ay —xi'.

¹⁵ Ya me yil swocolic te mach'atic ya snac' sbaic ta stojol te Cajwaltique, swenta yu'un ya me snac' te bila xchapoj ta yo'tane. Ya spasic te bitic amen ta ijc' q'uinal, soc jich ya yalic: “Ma'yuc mach'a ya yilotic, ma'yuc mach'a ya sna' stojol”, xiic ta yalel.

¹⁶ Yan a te yo'tanique, ya sutp'in te bitic aye, jich bit'il pajal soc ajch'al te mach'a pac'ot yu'une. Te bi pasbil ma snujp'in te jich ya yalbey te mach'a pasot yu'une: “Ma ja'ucat la apason”, ma me xiuc; ni xujt'uc ajch'al ya yalbey te mach'a ya xchajbanot yu'une: “Ma x'ana' bi yacat ta spasel”, ma me xiuc.

Jamal albil scolel Israel

¹⁷ Ma ba jalix c'aal te ya xc'atp'uj ta utstesbil q'uinal te ja'male, yan te bay utstesbil q'uinaletic ya me xc'atp'uj ta ja'mal.

¹⁸ Te bi c'aalil ya cal ya me yaiyic stojol te cojq'uetic c'alal ay mach'a ya xc'oponbot yaiyic te june; soc te mach'atic ma xyilic q'uinale, ya me xjam sitic, ma'yuc ijc' q'uinal, ni ajc'ubal ta stojolic.

¹⁹ Te mach'atic peq'uelic ya me xcha'bujts'naj bael yo'tanic ta stojol te Cajwaltique; te mach'atic me'baetic ya me xbujts'naj yo'tanic ta swenta te Ch'ul Dios yu'un Israel.

²⁰ Ya me xlaj sc'oplal te mach'atic amen yo'tanique, te mach'atic ya x'uts'inwanic ya xch'ayic ta jc'axel, soc ya xch'ayic ta jc'axel te mach'atic ja' nax ya xbajt' ta yo'tanic spasel te bila amene,

²¹ jich nix te mach'atic tojol nax ya yac'beyic scuch bila amen ta pasel yu'un te yantique, soc te ya yaq'uic yaluc te juez, soc te ya xlo'laywanic te jich ya scombeyic chajbanel ta stojol te mach'a ma'yuc smule.

²² Jich yu'un te Cajwaltic te Dios yu'un Israel, ja' te mach'a la scoltay loq'uel te Abraham, jich ya yal: —Yo'tic bael ma ba ya yaiy q'uexlal te Jacob, ma ba ya stsajub yelaw.

²³ Melel te c'alal ya yil te sts'umbal te bila jpasojbey te slumale, ya me sna'ic ta c'axem to xan te Jo'on Ch'ul Dioson. Jich ya me xi'onic, jo'on te Ch'ul Dioson yu'un Israel.

²⁴ Te mach'atic jowejem q'uinal ya yaiyique, ya me snopic te p'ij ya xc'otique; te mach'atic ya scontroinonic ta c'ope ya me stsac yo'tanic te p'ijubtesel cu'une —xi' te Cajwaltique.