Isaías 28 - Bible in Tzeltal de Oxchuc y Tenejapa

Jultesbot stsa Samaria

¹ ¡Ya me yil swocol te Samaria! Toyol nax q'uinal ya yaiyic yu'un te mach'atic ay ta Efraín, scoronainej ta yo'tanic, ja'ic te mach'atic baem yo'tanic ta yacubele. Te Samaria, ja' yutsilal xch'alilic c'oem; ja'uc me to, nichim te taquejeme. Ay ta toyol ta bay slajibal moel te lequil stenlej xatal q'uinale; ja' lum yu'un te ants-winiquetic te u'uninbilic yu'un te yacubele.

² Te Cajwaltic sq'uejoj jtul winic te bayal yipe, jich me yip te bit'il ya xtal te bate, jich bit'il tulanil ic' te jinwaneje, jich bit'il stulanil yip te xchawuquil ja'ale, jich bit'il snojel ja' te ya xmal loq'uel ta sba lumq'uinal te xiweltic nax sbae. Ta sc'ab ya me xch'oj coel ta lum,

³ ta yacan ya me spech' ta teq'uel te lum te toyol nax q'uinal ya yaiyic yu'un, te scoronainejic te yacubel ants-winiquetic ta Efraín.

⁴ Te yutsil xch'alilic, te ja' nichim taquejeme, ja' te lum te ay ta toyol ta bay slajibal moel te lequil stenlej xatal q'uinale. Jich me c'oem te bit'il sc'ajc'alel sit higuera: Teme ay mach'a ya yile, ya stul ta sc'ab, jich ya slo' ta ora.

⁵ Te bi c'aalil ya cale, te Cajwaltic te Spisil ya xju' yu'un, jich me c'oem te bit'il corona te ay yutsilal stuquele, xch'alil te mero muc' yutsilal yu'un te mach'atic jilemic xan te lum yu'une.

⁶ Ja' ya yac' ta lequil chajbanwanej te juecetic te yich'oj yat'elic ta chajbajibal, soc ya yac'bey yip yo'tanic te soldadoetic te ya scanantayic te lume.

Jultesbot stsa Jerusalén

⁷ Ay yantic sts'eunaj ta beel yu'un te vino soc ya xchuc sba yacan yu'un te tulan uch'balil, ja' te sacerdoteetic soc te j'alwanejetique, ya spasic ts'eunajel ta scaj te tulan uch'balil. Ya xbolobic yu'un te vinoe; ma xtojob ta beel yu'un te tulan uch'balil. Mero sts'eunajic a te c'alal ay bila ya x'ac'bot yilique, ayic ta yacubel te c'alal ya yaiyic chajbanwaneje.

⁸ Spisil te mesaetic nojelic yu'un te xeiletique, mero ya quilaytic, ni ma'yuquix bay sac xujt'uc.

⁹ Ya yalbonic jc'oplal, jich ya yalic: —La', ac'botic bi ya jnoptic, albotic te bila yac'oj ta na'el te Diose. Jich me c'oemotic te bit'il ch'in alaletic

¹⁰ te xjajch'ibal to nax ya snop yilel te june, jich bit'il: ba be bi bo bu —te xiic ta labanwanej.

¹¹ Ja' yu'un, teme ma xyich'ic ta muq'ue, Dios me ya xc'opoj ta stojol te lume, ja' me ya xc'oponot ta chujc'ul c'op te yan ta aiyel stojole.

¹² Ja' stuquel te la yalbey yaiyic ta neelale: —Tey ay te lamal q'uinale, tey ay te cux-o'tanile; ac'a xcux yo'tan yu'un te jasjonele —xi'. Pero ma la sc'an yich'ic ta muc'.

¹³ Ja' yu'un te Cajwaltic jich ya sc'opon te bit'il ch'in alaletic te yacalic to nax ta snopel yilel te june. Ja' yu'un te c'alal ya xbeenique, ya xyal bael ta spatic, ya x'ejch'enajic, ya xyalic ochel ta pejts', tey ya stsacotic a.

¹⁴ Aiya awaiy stojol te bila ya yalbeyex te Cajwaltique, ja'ex te amen awo'tanic te ya xmandalajex tey ta lum Jerusalén.

¹⁵ Ya awalic te ja'exe: —Jpasojtiquix trato soc te lajele, soc te muquenale, swenta yu'un te c'alal ya xtal te bol jinwaneje, ma ba ya staotic. Jleojtiquix anjibal ta swenta lotetic, ya xc'opoj cu'untic te lo'laywaneje —te xaex yaiyele.

¹⁶ Jich yu'un ya yal te Cajwaltique: —Ya cac' jp'ij ton ta lum Sión, ja' te jp'ij ton te tsabil, soc te mero bayal yutsile, ja' te mero bayal sc'oplal yu'un spasel na, ja' te ya xtuun yu'un te yiptajibe. Te mach'a ya yac' smuc'ul yo'tan ta stojole, ma ba ya xiw yo'tan.

¹⁷ Te bi ya yich' ts'ajc'uyel a, ya jtuuntes ta plomo te toj-o'tanile; soc te bitic toj ta pasel, jich ya xc'ot cu'un te bit'il nivel —xi'. Te anjibal, ja' te lotetic aleojique, ya sjinbeyex te bat ya xyal tele; ya smesbeyex bael snojel ja' ta yawil te ya smaquexe.

¹⁸ Te trato awu'un soc te lajele, ya xch'ay ta jc'axel; te trato awu'un soc te muquenal, ma'yuquix yip ya xc'ot. Ya me xtal te tulan woclajel te xiweltic nax sba, ya me stenex te ja'exe.

¹⁹ Te jujun buelta te ya xtale, ya me stasex bael. Ya me xtal ta jujun sab, ta jujun c'aal soc jujun ajc'ubal. Te bi ora ya awaiybeyic stojol sc'oplale, tic' ya xcajex ta nijq'uel yu'un a.

²⁰ Jich c'oem te bit'il lot'ol xanix wayibal wayalat a, soc te comol pac' xanix amucoj abae.

²¹ Te Cajwaltic jich me ya x'at'ej te bit'il la spas ta wits Perazim, jich bit'il la spas ta stenlej xatal q'uinal ta Gabaón, ta swenta spasel te yat'el te yan sba ta ilel a, ta swenta sju'tesel te yat'ele, ja' te yat'el te jchajp nax a.

²² Jich yu'un yo'tic, ma me ayuquix labanwanej, swenta yu'un ma ba ya sut'at xan te cadena; melel caiyojbeyix stojol sc'op te Cajwaltic te Spisil ya xju' yu'une, chapalix yu'un te ya yac' ta jinel spisil te alumale.

²³ Aiya awaiyic ta lec, aiya awaiyic stojol te bi ya cale, tsajtaya abaic ta yaiyel stojol te jc'ope:

²⁴ Jich bit'il mach'a ay ta pas-c'altic te ya xba yaiy ts'unbajel, ma puro wuy-lumuc ya xc'ax c'aal yu'un, ta swuyel ta spajel te sq'uinale.

²⁵ Melel teme laj yo'tan ta spajel te sq'uinale, ya xcaj ta spuquel te yawalel eneldo o ja' te comino, soc ta ora nax ya xcaj ta sts'unel trigo ta jujun surco, te bay sti'il ti'il ya sts'un cebada soc centeno.

²⁶ Dios ya sp'ijubtes te bit'il ya sc'an ya spase.

²⁷ Melel te eneldo ma ba ya yich' teq'uel yu'un chambalam, ni ma spas ta tselel c'axel carreta ta sba te comino; te eneldo ya yich' sajp'uyel ta majel ta te', yan te comino wajch' ya yich' majel stuquel a.

²⁸ Te trigo ya yich' teq'uel ta chambalam, pero ma yu'unuc ma xcom ta pasel; ya yich' tselel c'axel carreta ta sba, jich ya xwuy loq'uel spat, ma'yuc ba ya stsacot ta juch'el te site.

²⁹ Jich nix me ya xchajban yat'el te Cajwaltic te Spisil ya xju' yu'une. Jchajp nax te bila chapal yu'une, ya me sc'otes ta pasel soc smuc'ul sp'ijil.