Isaías 27 - Bible in Tzeltal de Oxchuc y TenejapaYa xjilic ta libre israeletic 1 Te bi c'aalil ya cale, te Cajwaltic ya me yac'bey castigo te Leviatán, te chan te busul ta lume, ja' te Leviatán, te sbets'unaj ya xbeene; ya me smil ta spuñal te xiweltic nax sbae, te c'axem to xan smuc'ul te yu'ele, ya to sta ta milel a te muc'ul chan te ay ta mar. 2 Te bi c'aalil ya xc'ot ta pasele, te Cajwaltic ya me yal: —C'ajintayaic te t'ujbil ts'usubiltique. 3 Jo'on te Ajwalilon te ya jcanantay, spisil ora ya cac'bey ya'lel. C'aal ajc'ubal ya jcanantay swenta yu'un ma'yuc bi ya x'ac'bot swocol yu'un. 4 Ma ba ilinemon ta stojol. Te ayuc ch'ixetic soc te yaq'uenale ya me xloc'on bael ta yac'beyel guerra, soc ya me jchic' ta jc'axel. 5 Teme ya sc'an te ya xc'opojon yu'une, ac'a lamajuc yo'tan ta jtojol, jich, ac'a lamajuc yo'tan ta jtojol —xi' te Cajwaltique. 6 Yo'tic xan bael, te lum yu'un Jacob ya me yac' tulan slojp' c'oem, melel te Israel ya me xpulin soc ya me snichin, soc ya me xnoj balumilal yu'un te site. 7 Te Diose ma ba yac'ojbey castigo te Israel, jich te bit'il la yac'bey castigo stuquel te scontrotaque; ma ba yac'oj ta lajel te Israel, jich te bit'il la yac'bey lajel stuquel te jmilawaletic yu'une. 8 Dios la yac'bey castigo te lum yu'une, la sticun bael ta yan lum. Xiweltic nax sba ta jujch'iyel bael ta loq'uesel, jich bit'il ya xjujch'iwan tel tulan ic' ta sloq'uib c'aal. 9 Ja'uc me to, ya spasbey perdón yu'un smul te Jacob, ya yich' ch'ayel faltaetic yu'un teme ya spas in to: Ac'a swuy ta spisil te scajtijib smajt'an te lotil diose, jich bit'il tan ya xbajt' ta loq'uel; soc ma me ayuc sloc'omba Asera ya xjil tey a, ni scajtijib xchic'jibal pom te yich'jibal ta muc' te lotil diosetic yu'unique. 10 Jinix jilel te lum te joytaybil ta tulan ts'ajq'ue, jich bit'il na te pijt'emix jilele, jich bit'il muc'ul jochol taq'uin q'uinal te ma'yuc yajwale. Ja' te bay ya sta swe'el te alaq'uil chambalametique, ja' te bay ya swe'ic te yabenal te' soc te bay ya smejts'an sbae. 11 Te sc'ab te' ya yich' c'asel coel te c'alal ya xtaqueje; jich yu'un te antsetic ya stsobic, soc ya spas sc'ajq'uic a. Jich te lum te ma'yuc sp'ijile. Jich yu'un te Mach'a chicnantesot yu'une, ma sna'bey yo'bolil sba yu'un; te Mach'a pasot yu'une ma xc'uxtay. 12 Te bi c'aalil ya cale, te Cajwaltic ya x'at'ej c'alal ta Éufrates ja' to c'alal beja' Egipto, jich bit'il ya yich' wuyel tomoltom trigo; ja'uc me to, te ja'ex israeletic, juju-jtul me ya awich'ic tel tsobel. 13 Te bi c'aalil ya cale, ya me yich' oq'uesinel te muc'ul oq'ues. Te mach'atic ch'ayemic ta bay Asiria, jich nix te ayic ta Egipto, ya me xtal squejan sbaic ta stojol te Cajwaltic ta Jerusalén, ta bay ch'ul wits. |
Biblia en Tzeltal de Oxchuc y Tenejapa © Sociedad Bíblica de México, A.C., 2001.
Bible Society of Mexico