Isaías 26 - Bible in Tzeltal de Oxchuc y Tenejapa

Sc'ayojil tsalaw

¹ Te bi c'aalil ya cale, ya me yich' c'ajintayel in c'ayoj to ta sq'uinal Judá: Ay tulan lum cu'untic; te Cajwaltic la sjajch'es ts'ajq'uetic soc tulanil anjibal ts'ajq'uetic, swenta yu'un ya scoltayotic.

² Jamaic te ochibaletic yu'un te ts'ajc', swenta yu'un ya x'och bael a te nación te toj ay soc te jun yo'tan ta stojol Cajwaltic spisil ora.

³ Cajwal, ma ba ya awac' xch'ay te lamal yo'tanic te mach'a toj aye, melel ja' smuc'ulinejat yo'tanic.

⁴ Ja'uc me smuc'ul awo'tanic spisil ora te Cajwaltique, melel ja' anjibal sbajt'el q'uinal stuquel.

⁵ Ja' ya yac' yaluc te mach'atic toybaetic; soc ya spejc'an te lum toyol ya yac' sbae. Ya me sjin coel c'alal ta lum,

⁶ swenta yu'un te mach'atic peq'uelic soc te me'ba ayic, ya me spech'ic ta teq'uel ta yacanic.

⁷ Te be yu'un te mach'atic toj yo'tanique toj nax ay; ja'at, Cajwal, ya apamanbey te sbe.

⁸ Cajwal, jun nax co'tantic ya caiytic ta banti te be yac'ojbotic quiltic te mandaliletic awu'une. Te bila ya sc'an te co'tantic, ja' te ayat ta na'el cu'untique.

⁹ Ta ajc'ubal spisil co'tan ya jic' co'tan ta awenta; ta mero melel ya jleat. Te c'alal ya awaiy chajbanwanej ta balumilal, te ants-winiquetic tey ya snopic a te bila toje.

¹⁰ Manchuc me ya ana'bey yo'bolil sba te mach'a amenique, ma yu'unuc ya snopic spasel te bitic stojile; ya spasic bitic amen ta sq'uinal te ants-winiquetic te lec yo'tanique, soc ma'yuc ta wenta yu'unic te smuc'ul awu'el Cajwal.

¹¹ Cajwal, chapalix awu'un te castigo; ja'uc me to, ma sc'an sna'ic stojol. C'alal ya yilic te yip xc'uxul awo'tan ta stojol te lum awu'une, ya me xjilic ta q'uexlal yu'un. Ayuc laj bit'il ya xlajic ta c'ajq'uel yu'un sc'aal te awilimbae.

¹² Cajwal, ja'at ya awac'botic cutsilaltic; ja'at atuquel, ta mero smelelil te ya awac' xbeen ta pasel spisil te cat'eltique.

¹³ Cajwal, Dios cu'untic, yantic mach'a la cajwalintic; ja'uc me to, ya me jna'tic te ja'at nax Cajwalticat atuquele.

¹⁴ Ja'ic lajemic stuquelic, ma ba ya xcha'cuxic xan; jc'axel nax ayic jich bit'il axinal, ma ba ya xjach'ic xan tel. Melel la awac'beyix castigo, la ajinix, la alajinix spisil soc te sna'jibale.

¹⁵ Cajwal, ja'at la awac' esmajuc te nacione; la ach'ijtes ta swenta yutsil ac'oplal atuquel, la awac' muc'ubuc spisil te q'uinaletique.

¹⁶ Te c'alal ayotic ta woclajel, Cajwal, la jleticat atuquel; te tojtesel la awac'botique, jich nax te bit'il sajsaj c'ope.

¹⁷ Tey ayotic ta atojol, Cajwal, jichotic te bit'il ants te yic'oj yal te nopolix ya x'ayine, ya xcaj ta najc'awetel te ya x'awun yu'un te xc'uxule.

¹⁸ La quic'tiquix alal c'oem, soc la caiybeyix xc'uxul te alajel yaiyele, utsubotiquix; ja'uc me to, ja' nax puro ic'. Ma'yuc bay wejt' colel cu'untic ta stojol te ants-winiquetique; ma ba x'ayinic ants-winiquetic te ya snojesic te balumilale.

¹⁹ Ja'uc me to, te animaetic awu'une ya xcha'cuxic stuquelic; te sbaq'uetalique ya xcha'cuxic. Te mach'atic wayalic ta lumq'uinal, ya xtijotic jajch'el, soc ya me x'awunic yu'un sbujts' yo'tanic. Melel jich ya aticun tel te luz awu'un ta stojolic, te bit'il ts'ujul ya xyal ta ajc'ubale; jich te animaetic ya me xcha'chicnajic loq'uel ta lum.

²⁰ Lum cu'un, baan, ochan ta ana, soc maca te ti'nailetic ta apate. Nac'a aba ajc'uc, ja' to c'alal ya xc'ax yilimba te Cajwaltique.

²¹ Melel te Cajwaltic ya xloc' tel ta bay palacio yu'un, ta swenta yac'beyel castigo yu'un smulic te mach'atic nainemic ta balumilale. Te lumq'uinal ma xju' ya smuc xan te ch'ich' malbile; ja'uc me to, ya me xchicnaj ta lec te mach'atic la yaiyic milawe.