Isaías 25 - Bible in Tzeltal de Oxchuc y Tenejapa

C'ayoj ta yalel yutsilal Dios

¹ Cajwal, ja'at Diosat cu'un; ya jtoyesbat ac'oplal soc ya calbey yutsilal te abiile. Melel la apasix te bitic chapal awu'un te jchajbic nax ae, stalel ayic, ma xyanaj te bitic chajbanbil awu'un ta namey q'uinal tele.

² Te lumetic la ac'atp'un ta busulbus tontiquil; te lumetic tulanic sts'ajc'ule, jiniquix. La ajinbeyix te muc'ul naetic yu'un te mach'atic acontrotaque; ma xju'ix ta cha'pasel ta sbajt'el q'uinal.

³ Ja' swentail te lum te tulane ya yal te ayat ta ich'el ta muc'; te lumetic yu'un te ants-winiquetic te c'ax amen yo'tanique, ya xi'at.

⁴ Melel ja' anjibalat yu'un te me'bae, ja' ya xc'opojat yu'un te bitic ya xtuun yu'unic te mach'atic ayic ta wocole, anjibalat yu'un, ta bay tulan yic'al ja'al, axinalat yu'un te toyol sq'uixnal c'aale. Te bitic ya spas te winiquetic te c'ax amen yo'tanique, jich c'oem te bit'il tulan ic' ta yorail invierno,

⁵ o jich bit'il sq'uixnal c'aal te taquin q'uinale. Ja'at ya acombey yo'tanic te mach'atic jcontroinwanejetique, jich bit'il ya xlamaj sq'uixnal q'uinal yu'un yaxinal te tocale. Ja'at ya asuj te winiquetic te c'ax amen yo'tanic te ya slaman sbaique.

⁶ Ta wits Sión te Cajwaltic te Spisil ya xju' yu'un ya me xchajbanbey spisil te nacionetic, te buen muc' we'elil soc vinoetic te ayix c'aal pasbile, te buen bujts'anic te we'elile, soc te mero tsabilic te lequil vinoetique.

⁷ Ja' ta bay wits to, ya sjin Cajwaltic te pac' te smucoj spisil te lumetique, ja' te pac' spotsoj spisil te nacionetique.

⁸ Te Cajwaltic ya sjin ta sbajt'el q'uinal te lajele. Ya me scusbey loq'uel ya'lel sitic ta spisilic; ya me yac' xch'ay ta jc'axel ta spamal balumilal te bit'il boloben sc'oplal te lum yu'une. Te Cajwaltic ja' yaloj stuquel.

⁹ Te bi c'aalil ya xc'ot ta pasele, jich me ya yalic: “Ja' Dios cu'untic, ja' la smuc'ulin co'tantic melel ja' ya scoltayotic stuquel. Binuc nax me co'tantic, bujts'najuc me co'tantic, melel ja' la scoltayotic stuquel”, xiic me.

¹⁰ Ta sc'ab Cajwaltic ya scanantay te wits Sión; yan te Moab ya me spech' ta teq'uel stuquel, jich te bit'il ya yich' pech'el ta teq'uel ac ta yawil te bila amene.

¹¹ Te Moab ya me sjimulay sc'ab, jich bit'il ya sjimulay sc'ab te mach'a ya yaiy nuxele; ja'uc me to, te jujun buelta ya stij sba, yanyan ta ch'ayel bael te stoybaile.

¹² Te Cajwaltic ya yac' ch'ayuc coel te toyol tulanil ts'ajq'uetique; ya sjinbey coel, ya sliman jilel ta lum.