Isaías 23 - Bible in Tzeltal de Oxchuc y Tenejapa

J'alwanej c'op ta stojol Tiro soc Sidón

¹ J'alwanej c'op ta stojol Tiro: Te muc'ul barcoetic swenta Tarsis yacal ta ajc'an; melel te bay ya xjul ta loq'uele, jinbilix. Te bay jul ta loq'uel te tal ta Chipre, la yich'ix jinel.

² Te ants-winiquetic ta lum Tiro soc te jchonbajeletic ta lum Sidón ma xc'opojic ta jyalel. Te abatetic yu'unic c'axic bael ta mar

³ ta bay bayal ja'etic yu'une. La sloq'uesic te stojol yat'elic ta swenta te trigo ta Sihor, te la yich' set'el ta bay muc'ja' Nilo, ja' sp'olmalic soc te nacionetique.

⁴ Nojuc me q'uexlal ta awo'tan, lum Sidón, te yipat te mar, jich me ya awal: “Ma'yuquix xc'uxul te alajele, ma ba ya x'alajonix. Ma'yuquix calatac ya jch'ijtes, ma'yuc cantsil-alatac ta sp'ijubtesel”, xaat me ta yalel.

⁵ C'alal ya yaiyic stojol te egipcioetic, ya me xwoclaj yo'tanic yu'un te bila c'ot ta pasel ta stojol te lum Tiro.

⁶ Baanic ta Tarsis, ajc'anajuc awo'tanic te yajwalex ti'mar.

⁷ ¿Ja' bal te lum te namey q'uinal chicnajeme, te bin nax yo'tan yu'un te bitic sbujts'-o'tanile? ¿Ja' bal te beenem ta c'ubul te yajwale, te la snajc'an sbaic ta bay te q'uinaletique?

⁸ ¿Mach'a la xchap q'uexlal ta stojol te lum Tiro, te lum te bayal sc'oplale, te cajal sc'oplalic ta c'axem to xan te bila ya xchonique, soc te bayal yip stuquelic ta balumilale?

⁹ Te Cajwaltic te Spisil ya xju' yu'un, ja' la xchap, swenta yu'un ya spejc'an spisil te mach'a cajal yac'oj sba, soc limil ta lum ya xjil spisil te mach'atic ay yipic ta q'uinale.

¹⁰ Te ja'at lum Tarsis, ac'a me aba ta yutstesel te lumq'uinal, melel ma me ayuquix bila ya xju' awu'un.

¹¹ Te Cajwaltic la stoyix bael sc'ab ta stojol mar, la yac' nijc'uc te nacionetic, soc la yal mandal ta jinel te tulanil ts'ajq'uetic ta Canaán.

¹² Jich la yalbey te Sidón: —Ach'ix te uts'inbilatixe, ijq'uitaya jilel te bitic sbujts' q'uinal awaiy yu'une. Manchuc me ya awal te ya xc'axat bael c'alal ta Chipre, ma'yuc bay ya ata cux-o'tan tey a —xi'.

¹³ Ilawilic te lume, ja' te lumq'uinal te bay sc'oplal ya xjul te barcoetique. Te Caldeoetic la spasic najt'il ts'ajc' soc la swuyic te muc'ul naetic yu'un Sidón, la sc'atp'unic ta jinem ts'ajq'uetic. Ja' smul stuquelic, ma ja'uc te Asiria.

¹⁴ Ac'a ajc'anajuc awo'tanic, barcoetic yu'un Tarsis, melel te ts'ajc' te ipajemex ae, jinbilix.

¹⁵ Jich yorail te ya xch'ojot loq'uel te lum Tiro, ya xch'ay ta o'tanil c'alal ta lajuneb xchanwinic (70) ja'wil, ja' te jich yipal c'aal ya xcuxin te jtul muc' ajwalile. C'alal ya xloc' te lajuneb xchanwinic (70) ja'wil, jich me ya yich' albeyel te lum Tiro, te bit'il ya yalbey sc'oplal ta c'ayoj te jmulawil antse:

¹⁶ “Jmulawil ants, te ch'aybilat ta o'tanile, tsaca te awarpa, beenan bael ta spamal te lume, tija lequil música, c'ajintaya bayal c'ayojetic, ya me quiltic teme ya awich' na'el xan a te ja'ate”, xi'.

¹⁷ Ta lajuneb xchanwinic (70) ja'wil, te Cajwaltic ya sna' xan te lum Tiro. Te jmulawil antse ya me yac' sba ta majanel, ya x'och spas mulwej soc spisil te lumetic ta q'uinale.

¹⁸ Te stojol te bila la xchonic, ya me yu'unin te Cajwaltique; ma me xju' ya yich' q'uejel, ni ta snail; ja'uc me to, ja' me ya yich' ac'beyel te mach'atic ya yac' sbaic ta abatinel yu'un Cajwaltic, swenta yu'un ya sman swe'elic c'axem to xan a soc t'ujbil sc'u'-spaq'uic.