Isaías 22 - Bible in Tzeltal de Oxchuc y Tenejapa

J'alwanej c'op ta swenta Jerusalén

¹ J'alwanej c'op ta swenta stenlej xatal q'uinal te banti ay bila ay ta ilele: ¿Bi ya apas te apisilic ya xmoex ta yamac'ul ta sba naetique?

² Ja'at lum te yacalex ta ch'inlajanel, te lumat te baem awo'tan yu'un te bitic bin nax o'tanil yu'une, te animaetic awu'une ma ba lajic ta puñal, ma ba lajic ta guerra.

³ Te jtsobwanejetic awu'un, spisilic loq'uic bael ta animal, anic bael yu'un te t'imetic; ja'uc me to, la yich'ic chuquel. Te winiquetic awu'un te c'ax tulanique, c'ubul bajt'ic ta anel; ja'uc me to, chujq'uic ta puersa.

⁴ Jich yu'un la cal: —Q'ueja abaic ta jtojol, ya jc'an ya x'oc'on ta c'axem to xan; yu'un ma xju' ya awac'bon smuc'ul co'tan, melel jinix te jlumale —la cut.

⁵ Melel te Cajwaltic te Spisil ya xju' yu'un, chapalix yu'un te bi c'aalil ya xc'ot muc'ul xiwel soc jinel, te ya soc q'uinal yaiyic yu'un, ta xatal q'uinal te ay bila ay ta ilel tey a. Ya me yich' jinel joyob ts'ajc', ya xc'ot yawic c'alal ta witstiquil.

⁶ Te elamitaetic la xchajbaniquix yat'ejibal te st'imic, soc moemiquix ta scarretaic soc ta scaballoic; te mach'atic ayic ta Kir la sloq'uesic te smajq'uilique.

⁷ Te t'ujbil stenlej xatal q'uinaletic awu'un nojel ta carretaetic; te mach'atic moemic ta caballo ya yac'bey guerra te yochibal sts'ajc'ul te lume.

⁸ Te smajq'uil Judá ch'ayix bael. Te bi c'aalil jich c'ot ta pasele, te ja'exe la ana'ic te at'ejibaletic yu'un guerra te ay ta bay te Na-ta-Bosque sbiile.

⁹ La awilic te ay bayal jamajtic te ts'ajc' joyol ta Lum-yu'un-David, soc la anojesic ta ja' te estanque te ay ta alan.

¹⁰ La awoclinic te nanatic ta Jerusalén, soc ay la ajinic coel, swenta yu'un ya yich' xan yip awu'unic a te sts'ajc'ul te lume.

¹¹ Ta yolilal xchebal te ts'ajq'uetic la apasic pozo a ta swenta te ja' yu'un antiguo estanque. Ja'uc me to, ma la ana'ic te Mach'a la spas spisil, c'alal ta mero namey to tel la xchajban.

¹² Te bi c'aalil ya cale, te Cajwaltic te Spisil ya xju' yu'une, la yiq'uex ta oq'uel soc ta mel-o'tan, te ya ajox loq'uel stsotsil ajolique, soc te ya alapic te ch'ixal paq'uetic.

¹³ Ja'uc me to, ja' nax jamal q'uinal ya awaiyic soc ay sbujts' awo'tanic; la amilic wacaxetic soc chijetic, la ati'ic ti'bal soc la awuch'ic vino. “We'ucotic soc uch'ajucotic ta ora to, melel pajel cha'wej ya xlajotic”, xaex ta yalel.

¹⁴ Te Cajwaltic te Spisil ya xju' yu'un, la yac' sba ta ilel ta jtojol soc jamal la yalbon ta jchiquin: —Ma ba ya jpasbeyex perdón yu'un in mulil to, ja' to c'alal ya xlajex bael te ja'exe —xi' te Cajwaltique. Jich la yal te Cajwaltic te Spisil ya xju' yu'une.

Sc'oplal mayordomo ta sna ajwalil

¹⁵ Te Cajwaltic te Spisil ya xju' yu'un, la yalbon: —Baan ilawil te Sebná, te ay ta mayordomo ta smuc'ul na te ajwalile, jich me xawalbey:

¹⁶ “¿Bila ay awu'un li'to, mach'a la yac'bat permiso te ya apas amuquenal li'to, te ya apas muquenal ch'en ta bay cajale, te ya alom ochel ton ta bay cux-o'tan awu'une?

¹⁷ Te Cajwaltic mero c'ubul me ya xch'ojat bael, jich bit'il ya spas jtul winic te bayal yipe. Ya stsacat soc te yipe,

¹⁸ ya stselat bael jichuc pelota, soc tey ya xch'ojat bael a ta bay c'ax muc' te q'uinale. Tey me ya xlajat a, tey ya xc'ot a te carretaetic te ja' awutsilal ta ac'ope, ja'at ta awenta te ya xq'uexaw spisilic te ay ta spalacio te awajwale.

¹⁹ Ya jpojbat te at'el ay ta awenta, ya jloq'uesat ta awat'el.

²⁰ Te bi c'aalil ya xc'ot, ya me quic' tel te cabate, te Eliaquim te snich'an Hilcías.

²¹ Ja' me ya cac'bey slap te ac'u'e, ja' ya jchucbey ta xch'ujt' te seña te ja' ayat ta ich'el ta muc', soc ja' ya cac'bey ta swenta te awat'ele. Jich me ya xc'ot te bit'il tatil yu'un te lum Jerusalén soc ta swenta te ants-winiquetic ta Judá.

²² Ya me jcajanbey ta snejq'uel syaweal sna te David; ma'yuc mach'a ya xju' yu'un smaquel te ya sjam stuquele, ma'yuc mach'a ya xju' sjamel te ya smac stuquele.

²³ Jich me ya xc'ot te bit'il muc'ul nactijibal swenta ich'el ta muc' te sts'umbal baele. Ya me cac' te tulan ya xjil ta yawil, jich bit'il te lawuxe.

²⁴ Tey me ya xjojc'aj ta stojol spisil a te bitic bayal sc'oplal te ay ta swenta te sts'umbal tel namey, soc spisil te sts'umbal baele, spisil ta jchajp jich bit'il te ch'in vasoetic, copaetic soc te jarroetique.

²⁵ “Te bi c'aalil ya xc'ot ta pasel, ya me yich' choyel te lawux te tulan bajal ta yawile, ya me yich' bots'el loq'uel soc ya me xch'ay coel spisil te bitic jojc'ajtic tey a, ya me sts'oquic”, uta me —xi' te Cajwaltique. Jich la yal te Cajwaltic te Spisil ya xju' yu'une.