Isaías 21 - Bible in Tzeltal de Oxchuc y Tenejapa

J'alwanej c'op ta stojol Babilonia

¹ J'alwanej c'op ta swenta jochol taquin q'uinal te ay ta stojol mar: Jich bit'il sutu-iq'uetic ya xnoptsajic tel ta stojol sur, ya xtalic ta jochol taquin q'uinal, ja' me te bay xiweltic nax sbae.

² Xiweltic nax me sba te bila la yac'bon quil te Diose: Te mach'a muquen ya yac' ta c'abale, muquen me ya yac' ta c'abal abi, te mach'a jinwaneje, ya me xjinawan abi. Jajch'an, Elam. Wilumtaya, ja'ex mediaetic. Ma xcac' te ya xtal sc'anic xan parte.

³ Ya xnijc' te jbaq'uetale, ya yac'bon jwocol te xc'uxule, jich bit'il swocol ta alajel te antse. Te mel-o'tan ma xyac'bonix caiy stojol c'op, te muc'ul xiwel ma xyac'bonix quil q'uinal.

⁴ Soquemix q'uinal ya caiy yu'un, ya xnijc'on yu'un te xiwele. Te siquet nax q'uinal ta malc'aalile bayal la jmulan; ja'uc me to, ja' c'atp'ujix ta jtojol te bila xiweltic sbae.

⁵ Chapalix te mesa, lich'bilix te paq'uetic yu'une, te we'elile ochix ta tuuntesel. Tejc'ana abaic, capitanetic, jaxbeyaic aceite te amajq'uilique.

⁶ Melel te Cajwaltic yalojbonix: “Baan, tejc'ana jtuluc soldado ta j'il-q'uinal, swenta yu'un ya me yalbotic spisil te bila ya yile.

⁷ Teme ya yil carretaetic nitbil ta cha'cojt' caballoetic o teme winiquetic cajalic ta burroetic, o camelloetic moemic ae, ja' me ya xbajt' yo'tan ta yilel”, xi'.

⁸ Te mach'a yac ta yilel q'uinale, awun: “Te banti moemon, Cajwal, tey me ayon spisil c'aal a, jujun ajc'ubal jun me co'tan ayon ta yilel q'uinal.

⁹ Yacon ta yilel te yac ta beel tel jun carreta, nitbil tel ta cha'cojt' caballoetic”, xi'. Ay mach'a jich la yal: “Jinix, lajix te Babilonia. Spisil te loc'ombaetic, ja' te yajcananique, yalic coel ta lum, wuyultic nax c'otic”, xi'.

¹⁰ Jlumal, ja'ex te pech'bilex ta teq'uel jichuc trigo, la calbat awaiy te bila caiyoj stojol yu'un te Cajwaltic te Spisil ya xju' yu'un, ja' te Dios yu'un te Israele.

J'alwanej c'op ta stojol Edom

¹¹ J'alwanej c'op ta stojol Edom: Ay mach'a la yawtayon c'alal ta Seir: —J'il-q'uinal, ¿jayebix ora yijc'ubel q'uinal? J'il-q'uinal, ¿jayebix ora yijc'ubel q'uinal? —xi'.

¹² Te j'il-q'uinal la sjac': —Ya sacubix tel te q'uinale; pero, jich nix me te ajc'ubale. Teme ya ac'an ajojc'oic, jojc'oya, ya me xtalat yan buelta —xi'.

J'alwanej c'op ta stojol jochol taquin q'uinal

¹³ J'alwanej c'op ta bay jochol taquin q'uinale: Ja'ex te jtsojp beometic te talemex ta Dedán, te ya xc'ax ajc'ubal awu'unic ta bay pimil q'uinal ta jochol taquin q'uinal,

¹⁴ loc'anic bael ta stael te mach'a taquin yo'tane, ich'beyaic bael ja' yuch'; ja'ex te yajwalex lum Tema, loc'anic ta stael te mach'a yac ta anele, ac'beyaic swe'el.

¹⁵ Melel ja' ayic ta anel yu'un te puñal, ja' te puñal te buen ay ye, soc te t'im te chapalix te ya yich' bael t'imuyel, soc te yip guerrae.

¹⁶ Te Cajwaltic la yalbon: —Tey ta jun ja'wil ya xlajix a te smuc'ul yutsil Cedar, jun nax ja'wil jich te bit'il ya yal te jtul jle-at'el te ja' cuxul a te stojole.

¹⁷ Jteb xanix ya xjil t'imetic yu'un te guerra ta Cedar —xi'. Jich la yal te Cajwaltic te Dios yu'un Israel.