Isaías 2 - Bible in Tzeltal de Oxchuc y Tenejapa

Cajwaltic ya yac' lamajuc yo'tan nacionetic

¹ Ja'ic te bitic ac'bot sna' stojol Isaías te snich'an Amoz, te ja' sc'oplal Judá soc Jerusalén:

² Ta slajibal c'aal tulan me ya xc'ot te wits te tey ay a te templo yu'un te Cajwaltique. Ja' me te wits te c'ax toyol xane, ja' c'ax toyol yu'un a te yantic witsetique. Spisil te nacionetic ya me xtalic ta stojol;

³ bayal me te lumetic te jich ya xc'o yalbey sbaique: —La'ic, ya xmootic ta wits yu'un Cajwaltic, te banti ay te templo yu'un te Dios yu'un Jacob, swenta yu'un ya me yac'botic quiltic te beetic yu'une, jich me ya xju' cu'untic ya xbeenotic ta ch'in beetic yu'un —xiic. Melel ta Sión ya xloc' te p'ijubtesjibal yu'un te Cajwaltique; ta Jerusalén ya xtal te sc'ope.

⁴ Te Cajwaltic ya xchajbanbey te c'op jajch'em yu'un te nacionetique, tsobol me lumetic ya yac'bey snop te ya xcom ta guerra. Ya me sc'atp'unic ta sjoc'jibal lum te spuñalique, te slanzaic ya me sc'atp'unic ta set'jibal trigo. Ni jpamuc lum ya stsac xan spuñal ta smilel yan, ni ma'yuquix mach'a ya yich' p'ijubtesel ta guerra.

⁵ Ya xbootic, lum yu'un Jacob, beenucotic ta saquil q'uinal yu'un te Cajwaltique.

Castigo ta stojol jtoybaetic

⁶ Cajwal, la awijq'uitay te ants-winiquetic awu'une, ja' te lum yu'un Jacob. Te q'uinale nojel tey a te mach'atic ay bi ya sna'ic yalel ta sc'opic te talemic ta stojol sloq'uib c'aal, soc nix te mach'atic p'ijic ta sc'opic jich te bit'il ay ta yolilal te filisteoetique. Te lume ya xchap sc'opic soc te jyanlumetique.

⁷ Te lumq'uinal nojel ta c'anal taq'uin soc ta saquil taq'uin, mero bayal c'ulejalil tey a; te lumq'uinal nojel ta caballoetic soc mero bayal carretaetic yu'un guerra.

⁸ Ja' nix jich nojel ta loc'ombaetic. Te ants-winiquetic ya yalbeyic wocol te lotil diosetic te spasoj ta sc'abic, ja' te la spasic soc te mero sbic'tal sc'abique.

⁹ Peq'uelix yac'oj sbaic ta stojolic, ya squejan sbaic. ¡Ma xapasbey perdón!

¹⁰ Te ants-winiquetic ya me x'ochic ta nailch'en, ta yet'al lumq'uinal; ya me snac' sbaic ta stojol te Cajwaltique, te xiweltic nax sba ta scaj xojobil te yipe.

¹¹ Te jtoybaetic ya me stinan sbaic ta stojol; te jtoyba-o'tanetic ya me yich'ic pejc'anel. Te bi c'aalil ya xc'ot ta pasele, ja' nax me stuquel te Cajwaltic te ya yac' ta ilel te smuc'ule.

¹² Ja' te bi c'aalil ya x'at'ej te Cajwaltic te Spisil ya xju' yu'un, ta yilbeyel yo'tan spisil mach'a jtoybaetic te muc' yac'oj sbaic soc yixtailique; ta yilbeyel yo'tan spisil mach'atic te toyol yac'oj sbaique, swenta yu'un ya me yich'ic pejc'anel;

¹³ ta yilbeyel yo'tan spisil mach'atic jich scuyoj sbaic te bit'il cedroetic ta Líbano, te toyol ayic soc te baemic nax snajt'ilique, o teme scuyoj sbaic ta jijte' te ya xch'i ta Basán;

¹⁴ ta yilbeyel yo'tan spisil te mach'atic scuyoj sbaic jichuc najt'il wits, o jich bit'il witstiquil te baemic nax snajt'ile;

¹⁵ ta yilbeyel yo'tan spisilic te mach'atic jich scuyoj sbaic te bit'il toyol ts'ajc' swenta iljibal q'uinal, o jich bit'il te tulanil ts'ajq'uetic te joytaybil a te lume;

¹⁶ ta yilbeyel yo'tan spisil te mach'atic jich scuyoj sbaic te bit'il barcoetic yu'un Tarsis, o jich bit'il t'ujbil barcoetic.

¹⁷ Te mach'atic muc' yac'oj sbaic soc te toyol yac'oj sbaique, jc'axel me ya yich'ic pejc'anel ta jyalel. Te bi c'aalil ya xc'ot ta pasele, ja' nax me stuquel te Cajwaltic te ya yac' ta ilel te smuc'ule;

¹⁸ soc ya me slajinbey ta jc'axel spisil te loc'ombaetic yu'unique.

¹⁹ C'alal ya xjajch' te Cajwaltic, te ya snojes xiwel ta balumilal, te ants-winiquetic ya me x'ochic bael ta nailch'entiquil, soc ta bay jamajtic te lumq'uinale; ya me snac' sbaic ta stojol te Cajwaltique, te xiweltic nax sba ta scaj xojobil te yipe.

²⁰ Te bi c'aalil ya xc'ot ta pasele, ya me xch'ojbeyic loq'uel ta stojol te ch'oetic soc sots'etic, ja' bi, ja' te loc'ombaetic yu'unic te ants-winiquetique te pasbil ta c'anal taq'uin soc saquil taq'uin, te ja' nix la spas stuquelic swenta yu'un ya yalbeyic wocol ta stojolic.

²¹ Soc ya me sleic yan ch'entiquil soc nailch'entiquil, swenta yu'un jich me ya snac' sbaic ta stojol te Cajwaltique, te xiweltic nax sba ta scaj xojobil te yipe, te c'alal ya xjajch' te Cajwaltic soc te ya snojes ta xiwel te balumilale.

²² Ma me ja'uc xan ya smuc'ulin yo'tan te ants-winiquetic, melel jteb nax stael stuquelic. Te xcuxlejal ants-winic, jich nax me te bit'il ya sjic' te yo'tane.