Isaías 19 - Bible in Tzeltal de Oxchuc y Tenejapa

J'alwanej c'op ta stojol Egipto

¹ J'alwanej c'op ta stojol Egipto: Ilawilic, ya xtal ta Egipto te Cajwaltique, cajal ta tocal ya xtal ta animal. Ya me xnijq'uic ta stojol te loc'ombaetic ta Egipto, te egipcioetic ya me xnoj bayal xiwel ta yo'tanic.

² Ya yal te Cajwaltique: —Ya cac'bey xat sbaic te egipcioetique, juju-jtul ja' ni me ya stsac sbaic; ja' me ya scontroin sbaic te mach'atic sjoy sbaique, te mach'atic jun yo'tan sbaic te juju-jpam lume, soc te ajwaliletique.

³ Ya me cac'bey xch'ay q'uinal yaiyic, ya cac'bey xch'ay te bila chapal yu'unique. Jich yu'un ya xba sjojc'obeyic te yajcananic, soc te mach'atic ayic ta abatinel yu'un te pucuje; ya xba sjojc'obey xch'ulelic te animaetic, soc te mach'atic ay bila ya sna'ic syoljoltayel ta sc'opique.

⁴ Ja'uc me to, te Egipto ya me cac' ta sc'ab jtul yajwal te mero tulane, jtul muc' ajwalil te bayal sc'ajc'ale ya xjajch' mandalajuc ta stojolic —xi'. Jich ya yal ta jamal te Cajwaltic te Spisil ya xju' yu'une.

⁵ Te ya'lel te muc'ja' Nilo ya me xch'ay ta jc'axel, te muc'ja' taquin me ya xjil ta jyalel,

⁶ te beja'etic spasojique ya me xtuub. Te bay ya x'oquin ja' ta Egipto yanyan me ta ts'ujel ya'lel ja' to c'alal ya xtaquej. Te jalaleltic soc aquiltic te ayic ta ja'e, ya me xtaquejic;

⁷ te jalaleltic te ayic ta sti'il te muc'ul ja' Nilo, soc spisil te bitic ts'unajtic ta sti'ile, ya me xtaquejic, soc ya me xch'ayic ta jc'axel.

⁸ Spisilic te mach'atic ya stsaquic chay ta Nilo, ya me x'ajc'anaj yo'tanic, soc ya me smel yo'tanic c'axem to xan; te mach'atic ya yaq'uic ochel ta ja' stsacjibal-xchay, ya me smel yo'tanic.

⁹ Te mach'atic ya x'at'ejic ta spasel te lino-pac', ya me xpejc'aj yo'tanic; te mach'atic ya siuyic soc te mach'atic ya sjalique, ya me xtsacotic ta chamel yu'un;

¹⁰ te mach'atic jal-paq'uetique ya me xjin yo'tanic, soc spisil te mach'atic ay bi ya sna'ic spasel, ya me xjowej q'uinal ya yaiyic.

¹¹ Te ja'exe, te bol jtsobwanejex yu'un lum Zoán, te ayex ta tojteswanej soc ap'ijilic yu'un Egipto, ta smelelil, jtojteswanejex te ma x'ana'ic q'uinale. ¿Bit'il loc' ta alel awu'unic ta stojol te faraón: “Ja' sts'umbalotic te mach'atic p'ijique, ja' sts'umbalotic te muc' ajwaliletic ta namey q'uinale”, te xaexe?

¹² ¿Banti ay te mach'atic p'ijic awu'un, faraón, swenta yu'un ya sp'ijubtesat, soc ya yalbat sc'oplal te bitic chapal yu'un te Cajwaltic te Spisil ya xju' yu'une, ja' te bit'il ay sc'oplal te Egipto?

¹³ Te jtsobwanejetic yu'un Zoán, ma sna'ic q'uinal ta jyalel, te jtsobwanejetic yu'un Menfis la yac' sbaic ta lo'layel, te ajwaliletic yu'un sejpelsejp sq'uinal la yiq'uiquix bael ta lotil be te Egipto.

¹⁴ Te Cajwaltic la yac'bey aiyej ta sjolic te ya xjowtesbot q'uinal yaiyic yu'une; ja' ya yiq'uic bael egipcioetic ta lotil be ta spisil te bi ya spase; jich c'oem te bit'il jyacubel te ya xeen soc te ma tojuc ya xtejc'aje.

¹⁵ Ma'yuc mach'a ya xju' yu'un scoltayel te Egipto, chican teme sjol, o sne, chican teme palma, o teme jalale.

¹⁶ Te bi c'aalil jich ya xc'ot ta pasele, te egipcioetic jich me ya xc'otic yilel te bit'il antsetique; ya me xnoj xiwel ta yo'tanic te c'alal ya yilic te ya sjach sc'ab ta stojolic te Cajwaltic te Spisil ya xju' yu'une.

¹⁷ Te egipcioetic bayal me ya xnijc' yo'tanic ta stojol te Judá; tic' nax ya xnoj xiwel ta yo'tanic a te c'alal ya xtal ta yo'tanic te sbiil, soc te bitic chapal sc'oplalic yu'un te Cajwaltic te Spisil ya xju' yu'une.

¹⁸ Te bi c'aalil ya xc'ot ta pasele, ay me jo'pam lum ta sq'uinal Egipto te ya xc'opojic ta hebreo-c'op, soc ya me yalic ta jamal te jun yo'tanic ta stojol te Cajwaltic te Spisil ya xju' yu'une. Ta yo'ebalic ay me jpam lum tey a te Lum yu'un C'aal, xi' te sbiile.

¹⁹ Te bi c'aalil jich ya xc'ot ta pasele, ay me scajtijib majt'anil ac'bil ta stojol Cajwaltic ta yolil Egipto, soc ta nopol smojonil sq'uinal ya yich' aq'uel ton swenta yich'jibal ta muc' te Cajwaltique.

²⁰ Ja' me ta swenta señail ta stojolic ta sna'el ta Egipto te Cajwaltic te Spisil ya xju' yu'une. Te c'alal ya yawtayic te Cajwaltic ta sc'anbeyel coltayel te mach'atic ya xtenotic ta uts'inel, jich ya xticunbot jtul te ya x'ac'ot ta libre yu'un, ja' ya xc'opoj soc ja' ya xcoltayot yu'un.

²¹ Te Cajwaltic ya yac' sba ta na'el yu'un te egipcioetique, soc jich ya sna'beyic sba Cajwaltic, jich ya xcaj xch'uunic soc jich ya yac'beyic milbil majt'anil soc yantic majt'aniletic. Ya xchap sc'opic ta stojol Cajwaltic, soc ya sc'otesic ta pasel.

²² Te Cajwaltic ya yejch'entes te yajwal Egipto, pero ta patil ya xpoxtay. Ya sujt'es yo'tanic ta stojol Cajwaltic, jich ya xna'bot yo'bolil sba soc jich ya xpoxtayotic.

²³ Jich c'aalil te ay me be te muc' sjamalul c'alal ta Egipto c'alal ta Asiria. Te yajwal Asiria ya xju' ya xc'ot c'alal ta Egipto, te yajwal Egipto ya xju' ya xc'ot c'alal ta Asiria. Te yajwal Egipto soc te yajwal Asiria pajal me ya squejan sbaic ta stojol te Cajwaltique.

²⁴ Ja' me jich c'aalil, te Israel jun nax ya yac' sba soc Egipto soc Asiria, ja' me bendición ta spamal balumilal abi.

²⁵ Te Cajwaltic te Spisil ya xju' yu'un, ya me yac'bey bendición, jich me ya yal: —Ya cac'bat bendición Egipto te lumat cu'un, soc ja'at Asiria te cat'elat, soc ja'at Israel te mero cu'unat atuquel —xi' ta yalel.