Isaías 18 - Bible in Tzeltal de Oxchuc y Tenejapa

J'alwanej c'op ta stojol Etiopía

¹ Ya me yil swocol te q'uinal te bay xpumet ta bul sc'op te ch'in chanetic, te ay ta bay sjelawel te ja'etic yu'un Etiopía,

² te ya sticun abatetic te muc' yat'elic ta bay muc'ja' Nilo, ya xbeenic bael ta ja' soc barcoetic pasbil ta jalal. Baanic, ja'ex te tulan ya xbeenexe, baanic, ijq'uitayaic jilel c'opetic ta stojol te mach'atic jun nax sts'umbalic, te toyol snajt'il, te xch'ululet snujc'ulelique, ja' te mach'atic xi'bilic ta bayuque, te ants-winiquetic te tulanic soc te cajal yac'oj sbaic te nainemic ta q'uinal te bayal beja'etic yu'une.

³ Ja'ex ta apisilic te yajwalex te balumilale, ya me awilic te c'alal ya yich' toyesel moel bandera ta wits, soc ya me awaiybeyic sc'op te cornetae.

⁴ Te Cajwaltic la yalbon: —C'alal to ta bay ayon, senel nax q'uinal ya caiy te ya quil tele, jich bit'il xojobil c'aal ta yorail verano, jich bit'il xtomet nax tocal yu'un te sjab lumq'uinal ta yorail sloq'uesel sit te awalts'unubile.

⁵ C'alal ya xlaj yo'tan ta nich te ts'usubiltique, te sniche ya xc'atp'uj ta sit ya xyijub. Pero te c'alal ma to xloc' a te site, ya yich' c'abuyel soc cuchillo te sc'abc'abe, ya yich' bojel loq'uel soc ya yich' ch'ojel loq'uel.

⁶ Spisil ya xpijt'ic jilel ta witstiquil, ja' ya xjil ta swentaic te mutetic te ya stsac sti'ic te chambalametic soc ta swentaic te ja'mal chambalametique. Te mutetic tey ya xc'ax yu'unic a te yorail verano, soc ta spisilic te ja'mal chambalametic tey me ya x'ainic a ta yorail invierno —xi' te Cajwaltique.

⁷ Jich me yorail a te etiopiaetic ya yich'beyic tel majt'aniletic ta stojol te Cajwaltic te Spisil ya xju' yu'un, ja' te mach'atic najt'ic ta lec te x'oq'uet snujc'ulelique, ja' te nación te xi'bil ta bayuc, te tulanil lum te cajal yac'oj sbaic, te nainem ta q'uinal te bayal beja'etic yu'une. Tey ya yich'ic bael ta bay wits Sión ta bay ya yich' c'oponel te Cajwaltic te Spisil ya xju' yu'une.