Isaías 15 - Bible in Tzeltal de Oxchuc y Tenejapa

J'alwanej c'op ta stojol Moab

¹ J'alwanej c'op ta stojol Moab: Ta ajc'ubal, te c'alal la yich' jinel te lum Ar, tey jajch' ta jinel spamal a te Moab; ta ajc'ubal, te c'alal la yich' jinel te lum Kir, jajch' ta jinel spamal te Moab.

² Te yajwal lum Dibón ya xmo bael ta oq'uel ta templo yu'unic te ay ta ch'in witse. Te Moab ya smel yo'tan yu'un te la yich'ix jinel te lum Nebo soc te lum Medeba. Spisilic joxbil sjolic, joxbil yisimic.

³ Te ants-winiquetic ya me xbeenic bael ta calleetic, slapojic ta beel ch'ixal paq'uetic, awunic yu'un te jinel ta bay yamac'ul sba snaique. Ta parqueetic spisilic ya x'ajc'anaj yo'tanic ta oq'uel, lajelix ya yaiyic yu'un te ya'lel sitique.

⁴ Te lum Hesbón soc te lum Eleale ya sc'anic coltayel; asta te lum Jahaza, ya xchicnaj yawic. Jich yu'un ya x'och xiwel ta yo'tanic te soldadoetic yu'un Moab, ya xnoj ta yo'tanic ta jyalel te xiwele.

⁵ Co'tan ya jc'anbey coltayel ta swenta Moab; te swinictac ya xloq'uic bael ta anel c'alal ta Zoar, soc c'alal ta Eglat-selisiya. Te bay moel q'uinal yu'un Luhit, ya xmoic bael ta oq'uel; ta sbelal bael Horonaim ya xjajch'ic ta aw yu'un xc'uxul ta stojol te tulan uts'inele.

⁶ Te pozoetic yu'un Nimrim taquiniquix jilel, te aquiltic yacal ta bacubel, lajemiquix te te'etique, ma'yuquix bay xujt'uc yaxic te yabenale.

⁷ Jich yu'un te ants-winiquetic ya stsobic bael te sc'ulejalique, ya yich'ic bael ta sjelawel beja' te Los Alamos sbiile.

⁸ Te aw yu'un sc'anel coltayel ya spas buelta ta smojón Moab; te mel-o'tan soc oq'uel ya xc'ot c'alal ta lum Eglaim soc ja' to ta lum Beer-elim.

⁹ Te pozoetic yu'un Dimón nojiquix yu'un ch'ich'; soc ya to me jticun xan muc' te bila amenique: León-choj me ya xti'otic yu'un te mach'atic ya xcolic xan ta Moab, ja' te mach'atic cuxulic ya xjilic xan ta lumq'uinale.