Isaías 14 - Bible in Tzeltal de Oxchuc y Tenejapa

Ya sujt'ic te mach'atic ic'otic bael ta yan q'uinal

¹ Ta smelelil, te Cajwaltic ya me xc'uxtabey sts'umbal te Jacob. Jich me yach'il xan ya xc'ot ta tsael yan buelta te lum Israel, jich me ya yac' najc'ajuc ta sq'uinalic. Te jyanlumetic ya me xnoptsajic bael ta stojolic, jun me ya yac' sbaic soc te sts'umbal Jacob.

² Bayal me nacionetic ya x'ic'otic yu'un te israeletique, ya me sjoinic bael c'alal ta slumalic. Jich me ya xc'ot yu'unic te bit'il abatetic ta sq'uinal Cajwaltic. Te israeletic ya me yiq'uic bael ta mosoil te mach'atic neel chucotic bael yu'une, soc ja' me ya xmandalajic ta stojolic te mach'atic neel uts'inotic yu'une.

Slabanel muc' ajwalil ta Babilonia

³ Ja'ex lum Israel, te Cajwaltic ya me yac'beyex acux awo'tanic yu'un te awocolique, te amel-o'tanic soc te tulan abatinel la awich'ic pasbeyele.

⁴ Jich me yorail ya awalic in aiyej chajbanbil to ta slabanel te muc' ajwalil ta Babilonia: —Aiya awaiyic te bit'il c'ot ta loq'uel te j'uts'inwanej; aiya awaiyic stojol te banti c'alal comix te smuc'ul toybaile.

⁵ Te Cajwaltic la slajinbey yip te mach'a amene, la sc'asbeyix ta jc'axel te sbastón te j'uts'inwaneje,

⁶ melel soc yilimba la yac'bey swocol a te nacionetic, ma ba quejch'aj te majel la yac'beye. La spactibin te lumetic ta sc'ajc'al yo'tan, soc xujt' ma la sna'bey yo'bolil sba ta uts'inel.

⁷ Ta ora to, ta spamal balumilal lamal nax soc senel nax q'uinal, soc ya x'awunic te ants-winiquetic yu'un sbujts' q'uinal yaiyic.

⁸ Asta te tajaltic soc te cedroetic ta Líbano ya xbujts'naj yo'tanic yu'un te la awich' jinel ja'at te amenate; soc jich ya yalic: “Ja' to c'alal yalat, ma'yuquix mach'a ya sts'etotic”, xiic.

⁹ Ta alan, ta yutil lum, ta bay animaetic, ay bayal ya stij sba soc ya xloq'uic ta stabelat. Te snojq'uetal te animaetic ya stij sbaic, spisil mach'atic c'axic ta q'uinal, ya xloc' staat; spisil te mach'atic c'axic ta muc' ajwalil yu'un te lumetique, ya xjajch'ic ta smuc'ul nactijib.

¹⁰ Spisilic ya xc'opojic, jich ya yalbat: “Ja'at uuc ch'ayix te awipe, jich pajal c'ootiquix.

¹¹ Co ta muquenal te atoybail soc te sc'op te arpaetic awu'une. Ja' ya awayibin te yalja chanetique; te yalja chanetic, ja' me ya ac'u'in”, xiic.

¹² “¡Bit'il ch'ayat coel ta ch'ulchan, ja'at te muc'ul ec' ta sacubel q'uinale! La awich' ch'ojel coel ta lumq'uinal, ja'at te la atsal spisil te nacionetique.

¹³ Ja'at la awal ta awo'tan: “Ya xmoon bael c'alal ta ch'ulchan, ya xba cac' muc'ul nactijib tey a ta sjelawel te eq'uetic yu'un Dios. Ta toyol ya xc'o najc'an jba ta stojol norte, ja' te bay wits te banti ya stsob sbaic te mach'atic ay yu'ele.

¹⁴ Tey me ya xboon a ta sjelawel stoylejal te tocale; c'ax jich ya xc'oon a te bit'il Mach'a Mero Toyole”, te xaate.

¹⁵ Ja'uc me to, ta mero melel coat bael ta bay te lajele, ta bay c'axem to xan snajt'il te xaabe.

¹⁶ Te mach'atic ya yilat, wiq'uil me sitic ta atojol, soc ya me xc'opoj yo'tanic ta atojol, jich me ya yalic: “¿Ja' bal te mach'a te la yac' nijc'uc te balumilale, te la sjin te nacionetique?

¹⁷ ¿Ja' bal te la yac' jojch'ajuc q'uinal ta balumilal, te jc'axel la sjin te lumetic, soc ma la scoltay te jchuqueletique?” xiic me.

¹⁸ “Spisilic te muc' ajwaliletic yu'un te nacionetic juju-jtul me ya xcux yo'tanic ta smuquenal, melel lec sc'oplalic c'axic ta q'uinal.

¹⁹ Yan te ja'ate, c'ubul ya xch'ojat loq'uel te muquenale, pajalat soc te bila amen te ilaybile, pajalat soc te mach'a lajem te pech'bil ta teq'uele. Tey ya xc'oat ta yolil ants-winiquetic te lajic ta milel ta lowel ta puñal, te ch'ojbilic bael ta xaab te nojel ta tonetique.

²⁰ Ma me jichuc ya awich' muquel yu'unic te bit'il yantic muc' ajwaliletic, melel la ajin te lumq'uinal soc la amilbey yajwal te alumale. Te sts'umbalic te mach'atic amen yat'elic, ma xjalajic sbajt'el q'uinal.

²¹ Chajbana abaic ta smilel te alnich'anetic ta scaj te la spasic te bitic amen te sme'-statique, swenta yu'un ma me snopic te ya swentain te lumq'uinale, ni ma xju' xan ya snojes ta lumetic te balumilal —xaex me ta slabanel.

²² Te Cajwaltic te Spisil ya xju' yu'un la yal ta jamal: —Ya me xjajch'onix ta scontroinel te Babilonia, ya jlajinbey sc'oplal sbiil soc te mach'atic ya xjil tey a, te yal-snich'anic soc te smamataque.

²³ Ya jc'atp'un ta bic'awal ajch'al te lumq'uinale, ta bay nojel yu'un te xcuj-mutetique. Ya jin bael ta mesel —xi'. Ja' sc'op te Cajwaltic te Spisil ya xju' yu'une.

Ya yich' jinel Asiria

²⁴ Te Cajwaltic te Spisil ya xju' yu'un la yal ta jamal: —Ma me yu'unuc ma xpastaj te bi nopbilix cu'une; te bila chapalix cu'une, ya me xc'ot ta pasel.

²⁵ Ya me jin te lum Asiria ta jlumale, tey me ya yich' tenel ta milel a ta witstiquil cu'une. Jich ya xcolic ta jcuch-ijc'atsil te yac'ojbeyic te lum cu'une, te bila yac'ojbeyic scuche ma ba x'alubix ta snejq'uelic.

²⁶ Jich ay te bila jnopoj yu'un spamal te balumilale. Te jc'abe la jtoyix ta stojol spisil te nacionetique —xi'.

²⁷ Te Cajwaltic te Spisil ya xju' yu'un, nopbilix yu'un, ma'yuc mach'a ya xju' yu'un scontroinel. Te sc'abe la stoyix soc ma'yuc mach'a ya syantesbey te yo'tane.

J'alwanej c'op ta stojol filisteoetic

²⁸ Te bi ja'wil laj te muc' ajwalil Acaz, te Isaías jich la yal ta j'alwanej c'op:

²⁹ Ma me xbujts'naj awo'tan yu'un, nación filistea, te la yich'ix wuyel te wajch' te la awich' castigo a. Melel te chan ya x'alaj loq'uel jcojt' jti'awal chan, ya xloc' jun mero c'ajc'al chan te ya xwile.

³⁰ Te xchamsbalamic te me'baetic ay me swe'elic ta aquiltic cu'un; te ants-winiquetic te ma'yuc bi ay yu'unique, lamal nax q'uinal ya yaiyic ta cux-o'tan tey a. Yan te mach'atic awu'une ya me cac' lajuc ta wi'nal soc ya me jmil te jteb xan ya xjilique.

³¹ Mela awo'tanic, lumetic yu'un filisteoetic, awunanic yu'un xc'uxul, nijc'anic me yu'un te xiwele. Melel ta norte ya me xtal bayal soldadoetic jichuc xch'ailel c'ajc', ma me ayuc jtuluc ya xloc' tey a te bay xcholoj sbaique.

³² ¿Bi ya calbeytic bael te mach'atic ticunbilic tel yu'un te nacione? Ya me calbeytic te ja' tulan ts'unul yu'un Cajwaltic te Sión, soc jayeb slumal te ay swocolique, tey me ya scanantay sbaic a.