Isaías 13 - Bible in Tzeltal de Oxchuc y Tenejapa

J'alwanej c'op ta stojol Babilonia

¹ J'alwanej c'op ta stojol Babilonia te ac'bot sna' stojol te j'alwanej Isaías snich'an Amoz:

² “Tejc'anaic señail guerra ta bay t'axal wits. Albeyaic yaiy mandal te soldadoetic ta yaq'uel guerra. Toya ac'abic ta yaq'uel seña yu'un te ya x'ochiquix bael ta yochibal sts'ajc'ul lum te mach'atic muc' sc'oplalique.

³ La quiq'uix te mach'atic cu'un te tulanique, la calbeyix mandal te ch'ul soldadoetic cu'une, ja' te mach'atic te bin nax yo'tanic yu'un te ya caiy tsalawe, swenta yu'un ya jc'otes ta pasel te castigo cu'une”, xi' te Cajwaltique.

⁴ Ay chican aw ta bay witstiquil, mero bayal winiquetic yaiyel. Ya xchicnaj sc'opic te nacionetic, ja' te lumetic te stsoboj sbaique. Te Cajwaltic te Spisil ya xju' yu'un, ya xc'axic ta ilel yu'un te soldadoetic te chapalic yu'un guerra.

⁵ Talemic ta c'ubul, ja' to ta bay comen sti'il te ch'ulchan. Ja' te Cajwaltique, yich'oj spisil at'ejibaletic yu'un te yilimba, te ya xtal sjin spisil te q'uinale.

⁶ Awunanic me ta apisilic yu'un xc'uxul te woclajel, melel nopolix sc'aalelal yu'un te Cajwaltique, xlumlej nax me ya xjul te Mach'a spisil ya xju' yu'une.

⁷ Jich yu'un ta spisil te ants-winiquetic ma me ayuc yip ya xjil te yoc sc'abique, lajemiquix ta q'uinal ya yaiyic,

⁸ ayic me ta xiwel ta spisilic. Ya me xtal woclajel, soc muc' xc'uxul ya xc'ot ta stojolic, jich me te bit'il ya xwoclaj ants yu'un te ya x'alaje. Juju-jtul jchajp nax me q'uinal ya yaiy te ya yil sbaique, ya me stsajub yelawic yu'un q'uexlal.

⁹ C'otix sc'aalelal yu'un te Cajwaltique, ja' sc'aalelal te xiweltic nax sba soc te ya xtil te sc'ajc'al yo'tane, te ya sc'atp'un ta jochol taquin q'uinal te lumq'uinale, soc te ya slajin ta jyalel te jmulawiletic te ayic tey ae.

¹⁰ Te eq'uetic soc te tsojboltsojp eq'uetic ta ch'ulchan ma me xyaq'uix xojobilic; ya me x'ijc'ub te c'aal te c'alal ya xloq'ue, te u ma xyaq'uix xojobil.

¹¹ Te Cajwaltic ya yal: —Ya cac'bey castigo te mach'atic ayic ta spamal balumilal ta scaj te bitic amen spasojique, ja' te mach'atic amenic ta jyalel yu'un te smulique. Ya jlajinbey sc'oplal te stoybail te mach'atic cajal nax yac'oj sbaique, ya jpejc'an te mach'atic toybaetic soc te ya x'ixta-c'opojique.

¹² Ya me jpasbey te wocol ya xwejt' te ants-winiquetic, jichuc t'ujbil oro ta Ofir.

¹³ Jich yu'un te ch'ulchan ya me xnijc', te balumilal ya me stij sba ta yawil. Ja' me jich ya xc'ot ta pasel yu'un te quilimba te bi c'aalil ya cale, ta swenta te bit'il yac ta tilel sc'ajc'al te co'tane.

¹⁴ “Te ants-winiquetic pajal soc ja'mal chij te nutsbilix yu'un jts'i'wejetique, soc jich bit'il chijetic te ya spuc sbaic bael, te ma'yuc mach'a ya stsobot yu'une. Juju-jtul ya sujt' bael ta slumal, ya x'anic bael ta slum-sq'uinalic.

¹⁵ Spisil te mach'a ya xtaot, ya me xlajic ta puñal; spisil mach'atic te ya xtsacotic, ya me yich' milel.

¹⁶ Mero ya yil ta sitic, tulan me ya yich' jipel ta lum te ch'in alaletic yu'unique; ya me yich' pojbeyel sbiluquil te snaic, soc ya me yich'ic uts'inel te yinamique.

¹⁷ Ya jtijbey yo'tanic te media-winiquetic ta yilbeyel yo'tanic, ja' te mach'atic ma ja'uc ya xbajt' ta yo'tanic te saquil taq'uin, soc te ma ja'uc ya xlo'layotic yu'un te c'anal taq'uin.

¹⁸ Ta yat'ejibal st'imic ya slimanic ta lum te queremetique. Ma sna'beyic yo'bolil sbaic te mach'atic ayinelic toe, mero ma'yuc xc'uxul yo'tanic ta stojol te alaletique.

¹⁹ Te Babilonia, te t'ujbil perla yu'un te nacionetique, xch'alilic c'oem soc toyol q'uinal ya yaiyic yu'un te caldeoetique, jich me ya xc'ot te bit'il lum Sodoma soc te lum Gomorra te c'alal la jine.

²⁰ Jtul ma'yuc mach'a ya xba nainuc tey a, ma'yuc mach'a ya sle bitic ya xtuun yu'un tey a. Te árabeetic ma ba ya spas xan scampamento tey a, ni ma'yuc mach'a ya xba scanantay xchijic tey a.

²¹ Ja' nax tey ya xnainic te chambalametic yu'un te jochol q'uinale, ja' nax ya snojesic nanatic te xcuj-mutetic, ja' tey ya xnainic a te mutetic avestruz sbiilic, soc ja' nax me ya xtajinic tey a te bol tentsunetique.

²² Ja' nax tey ya x'awunic ta muc'ul naetic te ja'mal ts'i'etic, soc te bay t'ujbil palacioetic tey me ayic a te ja'mal jti'awal ts'i'etique. Nopolix ya xc'ot yorail te Babilonia; ma'yuquix bayal c'aal —xi' te Cajwaltique.