Isaías 12 - Bible in Tzeltal de Oxchuc y Tenejapa

C'ayojil swenta yalel wocol Dios

¹ Te bi c'aalil ya xc'ot ta pasele, jich me ya awal: —Ya calbat wocol, Cajwal; manchuc me ilinat cu'une, te awilimbae c'axix bael, la awac' sujt'uquix lamal q'uinal ta jtojol.

² Ja' Dios te ya scoltayone, ja' smuc'ulinej co'tan, ma xiwon. Te Cajwale, ja' anjibal cu'un soc ja' me quip, ja' jcoltaywanej cu'un —xaex me.

³ Ja' nix jich te ja'exe ya xju' ya xba awuch'ic soc sbujts' awo'tanic te sloq'uibja' yu'un colele.

⁴ Jich yu'un, ya me awalic: “Alaic wocol soc c'oponaic te Cajwaltique, albeya yaiyic nacionetic te bitic spasoje, ac'beya sna'ic stojol te ja' cajal yu'un ta spisile.

⁵ C'ajintayaic te Cajwaltique, melel muc' te bitic spasoje; ya sc'an ya yich' na'el ta spamal balumilal stuquel.

⁶ Awunanic yu'un sbujts' awo'tanic, ja'ex te yajwalex Sión, melel te Ch'ul Dios yu'un Israel, ay ta awolilic te ja'exe soc spisil te smuc'ul yu'ele”, xaex me ta c'ayoj.