Isaías 11 - Bible in Tzeltal de Oxchuc y Tenejapa

Jtul sts'umbal Isaí ya yich' yat'el ta ajwalil swenta stojil chajbanwanej

¹ Ta xchumante'al Isaí sbiil ya xloc' tel spul; ya xt'om loq'uel tel spul ta bay yisim.

² Te Espíritu yu'un Dios spisil me ora ay ta stojol. Ya me yac'bey sp'ijil yo'tan, soc sp'ijil sjol, swenta ya yaiy tojteswanej soc yip yu'el. Ya me sna'bey sba te Cajwaltic soc ya me yich' ta muc'.

³ Ma ja'uc nax ya xchajban yu'un te bi yilel ya yile, ni ma ja'uc ya xc'ot castigo ta stojol yu'un teme puro c'opetic naxe.

⁴ Toj ya xchajban te mach'atic ma'yuc yipe, soc ya xc'opoj yu'un te bitic ay ta swenta te mach'atic me'baetic te ayic ta balumilale. Te sc'ope jich c'oem bit'il wajch' ta yac'beyel castigo te mach'a ora nax ya xc'ajc'ube; te ic' ya xjujch'iy loq'uel ta ye ya yac' lajuc a te mach'a amen yo'tane.

⁵ Spisil ora sc'u'inej te bila stojil soc te smelelile.

⁶ Jich yu'un te jti'awal ja'mal ts'i', jun nax me yo'tan ya yac' sba soc te alal chije, te leopardo-choj soc te ch'in tentsun, pajal nax me ya smejts'an sbaic, te alal wacax soc te león-choj, jun nax me yo'tan sbaic te ya xmuc'ubique, ch'in querem xanix, ya yac' sbaic ta canantayel yu'un.

⁷ Te me' wacax soc te me' oso, sjoy sbaic ya xc'ot, te yalataquic jun me yo'tanic ya smejts'an sbaic. Te león-choj ac me ya swe'elin, jich bit'il te wacaxe.

⁸ Te ch'in querem ya me xju' ya xtajin ta bay te jti'awal cobra-chane, ya me xju' ya yac' ochel sc'ab ta bay xch'en.

⁹ Ta spisil te ch'ul wits cu'une, ma me ayuc mach'a ya x'uts'inwan tey a; melel jich bit'il nojel ta ja' te mar, jich me ya xna'bot sba ta spamal q'uinal te Cajwaltique.

¹⁰ Te bi c'aalil ya xc'ot ta pasele, ya xpulin te slojp' te' Isaí sbiil, te spul ya me xchicnaj jajch'el jichuc bandera, ta swenta señail ta stojol te lumetique. Te nacionetic ya me xba sleic; te awilal te banti aye, ay me yutsilal tey a.

Ya sujt' ta slumal mach'atic ic'otic loq'uel

¹¹ Te c'alal ya sta yoraile, te Cajwaltic ya me yac' ta ilel yan buelta te yu'ele: Ya me stsob xan te mach'atic yu'un te cuxulic to, ya me yic' sujt'el te ayic ta Asiria soc ta Egipto, ta Patros, Etiopía, Elam, Sinar, Hamat soc ta lumetic ta ti'ti'mar.

¹² Ya me stejc'an jajch'el señail jich bit'il bandera ta stojol te nacionetique, jich me ya stsob sba te israeletic te ic'otic loq'uel ta slumalique; ya me stsob c'alal to ta xchanjejch'el te q'uinale, ja' te yajwal Judá te pujq'uemique.

¹³ Ya me xch'ay ta jc'axel te sbic'tal yo'tan Efraín, te slab yo'tan Judá ya me xlamaj; te Efraín ma me ayuc sbic'tal yo'tan ta stojol Judá, te Judá ma me ayuc slab yo'tan ta stojol Efraín.

¹⁴ Ta xcha'chajbalic ya me xwilic bael ta stojol smalib c'aal ta scontroinel te filisteoetique, ta spatic me ya stsaquic; soc te mach'atic ta chajbalchajp te ayic ta stojol sloq'uib c'aale, ya me spojbeyic te sc'ulejalique. Te yipic ya me xc'ot c'alal ta Edom soc ta Moab, soc ya me spas ta mandal te amonetique.

¹⁵ Te Cajwaltic ya me sjambey sbe ta Mar Rojo; ya stoy bael sc'ab ta muc'ja' Éufrates, ya me sjujch'iy ic' te xiweltic nax sba, juqueb me yoc ya xloc' yu'un a te ja'e te ya xju' st'unic c'axel, ma puersauc ya sloq'ues xanabic.

¹⁶ Te c'alal ya sujt' xan ta Asiria te mach'atic cuxulic to te lum yu'un Cajwaltic, buen jamal me sbe ya staic jich bit'il c'alal loq'uic ta Egipto ta namey te israeletique.