Isaías 10 - Bible in Tzeltal de Oxchuc y Tenejapa

¹ ¡Ya me awil awocolic! Yu'un ya achajbanic mandaliletic yu'un uts'inel, soc ya apuquic bael te bitic chajbanbil awu'unic te mero ma xcujch'e.

² Ma sbelaluc ya achajbanic te mach'atic peq'uelique; xujt' ma x'ana'beyic bitic ay ta swentaic te mach'atic me'baetic ay ta jlumale. Ya awilbeyic swocol te me'ba antsetique, soc ya awelc'anic te me'ba alaletique.

³ ¿Bi ya apasic te c'alal ya x'och ta ich'el ta wenta te awat'elic, c'alal ya awilic c'ubul ayix a te castigoe? ¿Mach'a ya xba ac'anbey xan coltayel? ¿Banti ya awaq'uic jilel te ac'ulejalique?

⁴ Teme ma x'awich'ic pejc'anel soc teme ma x'awich'ic chuquel baele, pajal ya xlajex bael soc te mach'atic ya yich'ic milele. Ja'uc me to, ma to xlamaj yilimba a te Cajwaltique; ya to xtoy xan bael ac'oplalic yu'un.

Dios ya yabatin Asiria ta yaq'uel castigo

⁵ Jich ya yal te Cajwaltique: —Te muc' ajwalil yu'un Asiria ja' me te' c'oem te ya cac' castigo a, ja' te wajch' te ya jtuuntes yu'un quilimba.

⁶ Ya calbey mandal ta ac'beyel guerra te bol lume, te lum te ma tojuc yo'tan ta jtojol, ja' te nación te ya sjajch'esbon quilimba, swenta yu'un ya me spech'ic ta teq'uel jichuc ajch'al ta calle.

⁷ Ja'uc me to, te muc' ajwalil yu'un te Asiria ma'yuc ta yo'tan teme jich ac'bil ta swenta, ni ma'yuc ta yo'tan te jich ya spase. Ja' nax me ay ta yo'tan ta sjinel, soc te ya slajin tsobol ta jpam te nacionetique.

⁸ Jich ya yal: “Spisil te muc' ajwaliletic, ja' jtsobwanejetic ya xc'ot ta spasel a te mandal cu'une.

⁹ Te jo'one pajal c'oem ta co'tan ta spisil te lumetic, ja' te Calno soc te Carquemis, te Hamat, ja' pajal soc te Arfad, ja' nix jich te Samaria soc te Damasco, pajal c'oem ta co'tan.

¹⁰ Ay jtaoj nacionetic te bayal diosetic yu'unic; ay bayal loc'ombaetic yu'unic stuquelic, c'ax jich te bit'il Jerusalén soc Samaria.

¹¹ Jich yu'un, jich bit'il la jpasbey Samaria soc te loc'ombaetic yu'une, jich nix ya xju' cu'un spasbeyel te Jerusalén soc te loc'ombaetic yu'une”, xi' ta snopel te muc' ajwalil yu'un Asiria —xi' te Cajwaltique.

¹² Te c'alal pasbilix yu'un Cajwaltic ta spisil te bila ya sc'an yo'tan spasel ta wits Sión soc ta Jerusalén, ya me yac'bey castigo te muc' ajwalil yu'un Asiria ta scaj yat'el ta uts'inwanej, soc ta scaj stoybail te la yaiyix tsalawe.

¹³ Te muc' ajwalil yu'un Asiria la yalix: “Jo'on la jpas soc quip jtuquel; jo'on sp'ijil co'tan, la jchap te bila ya jpase. La jelbeyix yawil smojonil sq'uinalic te nacionetic, la cu'uninbeyix te sc'ulejalique. Te bit'il mero tulan ayone, la jyales te muc' ajwaliletique.

¹⁴ La jtsaquix ta jc'ab te sc'ulejalic te lumetique, la cu'uninbeyix spisil te sq'uinalique, jich bit'il ay mach'a ya yich' loq'uel tomut ta spechech te ma'yuc yajwale, ni ayuc mach'a la stij xic' c'oem, ni ma'yuc mach'a la sjam ye ta c'op yu'un”, xi'.

¹⁵ Ja'uc me to, ¿ya bal stoy sba te echej ta stojol te mach'a ya xtuuntesot yu'une? ¿Cajal bal ya yac' sba te sierra ta stojol te mach'a ya xtuuntesot yu'une? Te nabate'ele, tojol te' nax, ma ja'uc ya spas ta mandal te mach'a ya x'ich'ot bael yu'une.

¹⁶ Jich yu'un, te Cajwaltic te Spisil ya xju' yu'une, ma'yuc yip ya xc'otic yu'un te mach'atic ay yipic ta leque, soc ya me xtilix c'ajc' ya yaiy yu'un scojt'ol te sbaq'uetalique.

¹⁷ Te Ch'ul Dios, te sacuben q'uinal ta stojol Israel yu'un, ya xc'atp'uj ta c'ajc', ta jun nax c'aal ya xchic' soc ya sjin spisil te mach'atic ch'ixetic c'oem soc mach'atic wanc'altic c'oem ta q'uinal.

¹⁸ Ja' jc'axel ya yich'ic jinel te yutsilal te ja'maletic soc te yawal-sts'unubique. Jich me ya xjilic ta jyalel te bit'il mach'a ay ta chamel te ma'yuquix yipe.

¹⁹ Jteb xan meix te'etic ya xjilic ta ja'mal, asta alal ya xju' yu'un yajtayel.

²⁰ Ta yorail a, te jayeb xan mach'atic jilem ta Israel, ja' te mach'atic ay ta lum yu'un Jacob, te colemic xane, ma ba ya smaliyiquix coltayel yu'un te mach'a jinotic yu'une. Ja' me ya smaliy coltayel ta stojol te Cajwaltic, te Ch'ul Dios yu'un Israel.

²¹ Ma me ayuc yipal te lum yu'un Jacob te ya sujt'ic ta stojol te Dios te ma'yuc ta tsalel stuquele.

²² Te ja'at lum Israel, manchuc me mero bayal awajtalul, teme jich ma xju'at ta ajtayel jichuc sji'al mar; ja'uc me to, ma me ayuquix lec awipal ya sujt'ex. Albilix te jinel ta atojolique, ya me yich' pasel te castigo te bit'il nix ya sc'ane.

²³ Melel te Cajwaltic te Spisil ya xju' yu'un, xchapojix te jinel ta atojolique, ya me sc'otes ta pasel ta spamal te lumq'uinale.

²⁴ Te Cajwaltic te Spisil ya xju' yu'un, jich ya yal: —Lum cu'un, te nainemex ta Sión, ma x'axi'ic te asiriaetique, manchuc me ya smajex ta te' soc teme ya stoy sbastonic ta atojole, jich bit'il la spasbeyex te egipcioetique.

²⁵ Melel mero nopol meix sc'aalelal te ya xc'ot ta pasel te castigo; te quilimba, ja' me ya sjin te asiriaetique —xi'.

²⁶ Te Cajwaltic te Spisil ya xju' yu'une, ya me yac'bey castigo, jich bit'il c'alal la stsal te lum Madián ta bay muc'ul ton Oreb. Jich me ya yac' ta ilel yu'el ta stojol Asiria, jich bit'il la yac'bey yil yu'el te Egipto.

²⁷ Jich me sc'aalelal ya xloq'uesbotex te ijc'atsil te ac'bil ta apatic scuchele, soc ya me yich' c'asel te yugo-te' la yac'beyex ta anuq'uique. Te soldadoetic ya x'ochic, ya xc'axic ta lum Rimón,

Yacal ta ju'el yu'un te asiriaetique

²⁸ ya xjul ta Ajat, ya xc'ax ta Migrón, ya yijq'uitay jilel ijc'atsil ta Micmas,

²⁹ ya st'unic c'axel te chujc'ul beja', ya spas scampamentoic ta Geba. Te lum Ramá ya xnoj xiwel ta yo'tanic, te lum Gabaa-yu'un-Saúl ya xloq'uic ta anel.

³⁰ Awunanic ta tulan yajwal Bat-galim. Aiya awaiyic stojol, lum Laisa. Anatot, jac'a me te c'ope.

³¹ Te lum Madmena ya xloq'uic ta anel, te mach'atic yajwal te lum Gebim ya snac' sbaic.

³² Ta yo'tic nix ya xquejch'aj sbeelic ta Nob te soldadoetic te yacalic ta yochintayel te q'uinale; yu'un ya spasbey seña ta sc'ab te ya xba yac'beyic guerra te wits Sión, te wits yu'un te Jerusalene.

³³ Ilawilic, te Cajwaltic te Spisil ya xju' yu'un, ya sbot'q'uin te te'etic soc yip te xiweltic sbae; te bay c'axem to xan toyolique, ya yich'ic ts'etel coel, te bay c'axem to xan snajt'ilic, ya me xyalic bael ta lum.

³⁴ Ya yich' ts'eticlayel ta echej te bayal te'etique, te te'etic te c'ax bayal yutsilic, jich bit'il ta Líbano, ya me xyalic.