Hechos 27 - Bible in Tzeltal de Oxchuc y Tenejapa

Pablo la yich' ticunel bael ta lum Roma

¹ Jich chajbaj yu'unic te ya sticunotic ta barco ta sq'uinal Italia. Jich te Pablo soc te yantic jchuqueletique, ac'otic bael ta sc'ab te jtul centurión te Julio sbiile te ay ta at'el ta swenta jtijc' soldadoetic yu'un te Cesar Augustoe.

² Ay jun barco julem ta lum Cesarea te talem ta lum Adramitio te ya xbajt'ix c'alal ta bay te lumlumtic te ayic ta ti'ti'mar ta sq'uinal Asia. Tey ochotic bael a, soc sjoinejotic bael uuc te Aristarco te talem ta lum Tesalónica te ay ta sq'uinal Macedonia.

³ Ta yan c'aal c'ootic ta lum Sidon. Te Pablo la yich' c'uxtayel yu'un te centurión te Julio sbiile. Ac'bot permiso ta yilel te quermanotactic te ayic tey ae, swenta yu'un jich me ya sta jtebuc mac'linel yu'unic.

⁴ Cha'ochotic xan bael ta barco. Jil cu'untic te lum Sidone. Tey bootic ta spat Chipre, yu'un wocol yac ta beel te barcoe, scaj te bit'il stojlinej sba soc yip te iq'ue.

⁵ Tey c'axotic bael ta mar ta bay sti'il-ti'il te sq'uinal Cilicia soc te sq'uinal Panfilia. Jich la jtatic te lum Mira te ay ta sq'uinal Licia.

⁶ Te centurión la sta jun barco tey a te talem ta lum Alejandría te ya xbajt' c'alal ta Italia. La yic'otic ochel ta barco.

⁷ Ay c'aal te beenotic ta c'unc'un ta barco. Wocol la jtatic c'oel ta bay yelaw te lum Gnido, scaj te ay jwocoltic yu'un yip te iq'ue. C'axotic bael ta bay yelaw q'uinal te Salmón sbiil, tey bootic ta sti'il Creta te joytaybil ta mare.

⁸ Wocol nax c'axotic bael ta bay sti'il-ti'il te sq'uinale, ja' to te c'alal la jtatic te lum Buenos Puertos sbiile te nopol yiloj sba soc te lum Lasea.

⁹ Ch'ayix bayal c'aal cu'untic yu'un te beele, soc ja' yorailix te ma xju' xbeen a te barcoetique, yu'un c'axix yorail te q'uin yu'un ayuno. Ja' swentail te jich la yal ta tac'uywanej te Pabloe:

¹⁰ —Winiquetic, ya jna' stojol te ma lecuc ya xc'ootic ta loq'uel teme ya xbeenotic xan bael ta barco. Ya me xch'ay te ijc'atsile soc uuc te barcoe, soc ya me xlajotic uuc te jo'otique —xi' te Pabloe.

¹¹ Ja'uc me to, te centurión ma la xch'uun te bila albot yu'un te Pabloe. Ja' la xch'uunbey sc'opic te yajwal barco soc uuc te mach'a jwolwanej ta stijel te barcoe.

¹² Soc te bit'il ma smulanic te tey ya xc'ax yu'unic a te inviernoe, col spisiluc la yalic te ja' lec ya quijq'uitaytic jilel te banti ayotique, yu'un ya quiltic teme ya xju' cu'untic ya jtatic te Fenicee te ja' yonajib barco te ay ta sq'uinal Creta, te yelawinej sba soc te noroeste soc te sudoeste. Tey ya xc'ax cu'untic a te inviernoe.

Tulan ic' ta mar

¹³ Te bit'il tal lequil ic' ta bay stojol sur, jich la scuyic te ya xju' cu'untic te ya xc'axotic bael c'alal ta Fenice jich te bit'il snopojique. Jich jajch'otic xan ta beel ta barco. Beenotic bael ta sti'il sq'uinal te Cretae.

¹⁴ Ma to najt'uc jbeeneltic a te tal tulan yic'al huracán te Euroclidón sbiile te tal ta stojol nordeste.

¹⁵ Tulan caj ta tenel yu'un te barcoe. Te bit'il ma ju' cu'untic te ya jtojtestic xan bael te barcoe, jich la stenotic bael te iq'ue.

¹⁶ C'axotic ta spat te ch'in q'uinal joytaybil ta mar te Clauda sbiile. Tey majc' jtebuc a te iq'ue. Wocol nax ju' cu'untic sliquel ochel ta muc'ul barco te ch'in tsail barco te banti ya jcoltay jbajtique.

¹⁷ Te c'alal moemix cu'untic a te ch'in barcoe, jich te jtij-barcoetique la sbasulayic ta chuquel ta olil te muc'ul barcoe, swenta yu'un ya yac'bey xan yip a. Soc jajch' xi'ic teme ya xtenotic bael c'alal ta bay jbic'awal sji'al mar te Sirte sbiile. Jich la scojt'esbeyic spac'ul te barcoe. Ja' nax a tenot bael yu'un ic' te barcoe.

¹⁸ Ta xchebal c'aal, scaj te ay to bayal te tulan iq'ue, jich caj xch'ojic ochel ta mar te ijc'atsil xcuchoj te barcoe.

¹⁹ Ta yoxebal c'aal jpisiltic la jch'ojtic ochel ta mar te bila ya xtuun ta swenta te barcoe.

²⁰ Bayal xan c'aal te ma la quiltic xojobil te c'aal soc te eq'uetique, soc xujt' ma ba pec'tsaj yip te tulan iq'ue. Jc'axel pec'tsajix co'tantic yu'un. La caltic te ma ba ya xcuxinotiquix ta jpisiltique.

²¹ Te bit'il bayalix c'aal te ma'yuc bay we'emotic xujt'uque, jich te Pabloe la stejc'an sba ta yolil te jtij-barcoetique. Jich la yalbey yaiyic: —Winiquetic, ja' lec te lajuc ach'uunic te ma xloc' bael ta Creta te xoone. Ma'yuc jwocoltic la jtatic te jichuque, soc ma'yuc bila ch'ayem cu'untic yo'tic te jichuque.

²² Ja'uc me to, ya calbeyex ta ora to, ma me xamel awo'tanic, yu'un ma'yuc mach'a ya xlaj jtuluc. Ja' nax me ya xlaj stuquel te barcoe.

²³ Melel te Diose te yu'uninejone soc te ayon ta abatinel yu'une, ta ajc'ubal la stejc'anbon ta jtojol jtul ch'ul abat yu'un.

²⁴ Jich la yalbon: “Pablo, ma me xiwat. Puersa ya xc'o atejc'an aba ta stojol te muc' ajwalil César ta Roma, soc ja'at ta awenta te Dios ya yac' cuxinuc uuc spisil te mach'a ajoinej ta barco”, la yuton.

²⁵ Jich yu'un te ja'ex winiquetic, ac'a smuc'ul awo'tanic, melel xch'uunej co'tan te spisil ya xc'ot ta pasel yu'un te Diose, jich nix te bit'il la yalbon te ch'ul abate.

²⁶ Ja'uc me to, puersa me ya xc'o cajts'ajucotic soc barco ta bay ch'in q'uinal te ay ta yolil mare —xi' te Pabloe.

²⁷ Ta xchebal semana beeneltic a te q'uejel yac ta tenel bael yu'un ic' ta bay mar Adriático, ta olil ajc'ubal la sna'ic stojol te jtij-barcoetic te nopol ayotic ta lum q'uinal.

²⁸ Jich la yaq'uic coel ta ja' te sp'isjibal snajt'il te ja'e. Jich la sna'ic stojol te ay to xan jtab ta jaw te snajt'ile. Been xan bael jtebuc te barcoe, soc la xcha'sp'isic xan. La yilic te ja' xanix jo'lajunjaw te snajt'ile.

²⁹ Jich caj xi'ic teme ya xc'o jinuc ta tontiquil ta ti'mar te barcoe. Jich la yaq'uic coel ta ja' chaneb ancla-taq'uin ta yit barco te ya scom ta beele. La sc'oponic Dios yu'un te yacuc sacubuc ta ora te q'uinale.

³⁰ Ja'uc me to, caj snopic te jtij-barcoetic te bi ya yut ya x'anic loq'uel ta bay te barcoe. Jich la sliquic coel ta sba mar te ch'in barcoe, yu'un ya xba yaq'uic xan coel yan ancla-taq'uin ta bay sjol te muc'ul barco ta sc'opic.

³¹ Jich te Pabloe la yalbey te centurión soc te soldadoetic yu'une: —Teme yu'un ma x'ainic ta muc'ul barco te jtij-barcoetique, ma xju' ya xcolex uuc te ja'exe —xi' te Pabloe.

³² Jich yu'un te soldadoetique la set'beyic yac'ul te ch'in coltayjibal barcoe. Jich la yac' ch'ayuc coel ta mar.

³³ Te c'alal nopol ya sacubix te q'uinale, te Pablo tulan la yalbey spisil te yantic te yacuc we'uquic jtebuc. Jich la yal: —Xchanlajunebalix c'aal in to te ma ba wayalexe soc te ma ba we'emexe.

³⁴ Ya calbeyex wocol te yacuc xwe'ex jtebuque. Puersa ya sc'an te ya xwe'exe swenta yu'un ya me yich' yip te abaq'uetalique, melel jtul ma xlajex. Ni lijc'uc stsotsil ajolic te ya xch'aye —xi' te Pabloe.

³⁵ Lajel to yo'tan ta c'op a te Pabloe, la stsac te waje. La yalbey wocol Dios yu'un ta comonsitil. La xet', och swe'.

³⁶ Muc'ub q'uinal la yaiyic ta spisilic yu'un, soc we'ic uuc.

³⁷ Te jich quipaltic ta jpisiltique ay waclajuneb xchanlajunwinic (276) ta jtul ta jpisiltic te ayotic ta barcoe.

³⁸ Te c'alal laj yo'tanic ta we'ele, caj xch'ojic ochel ta mar te trigo te xcuchoj te barcoe, swenta yu'un jich me ya xtoy xan moel a te barcoe.

Te barcoe woc' yu'un yip te mare

³⁹ Te c'alal sacubix a te q'uinale, te jtij-barcoetique ma la sna'beyic sba te q'uinal te banti c'oemotique, ja'uc me to, la yilic te xojol ochel ta q'uinal te mare soc te ay spamlejal sti'il bael tey a te q'uinale. La snopic te tey me ya xc'o xijic loq'uel ta q'uinal te barco teme ya xju' yu'unique.

⁴⁰ Jich la set'beyic yac'ul te ancla-taq'uinetic te ya xjilic ta ye'tal te mare, soc la stilbeyic xchujq'uil te cheb spalate'al te ya stojtesic ta beel a te barcoe, soc la slijch'anbeyic moel spac'ul sjol te barcoe te ya xnitot bael yu'une. Jich la stojlinic bael ta bay spamlejal te q'uinale.

⁴¹ Ja'uc me to, la sta ta bay stsoboj sba moel sji'al te mare. Tey cajts'aj sjol a te barcoe. Jich te yite, wuyultic bajt' yu'un yip te mare.

⁴² Te soldadoetique caj snopic te ya smilic te jchuqueletique, swenta yu'un jich ma xcolic bael ta anel ta nuxel.

⁴³ Ja'uc me to, te centurión ma la sc'an te ya xlaj te Pabloe. Jich la scom te soldadoetique, soc la yalbotic mandal ta jpisiltic: —Te jayebex te ya ana'ic nuxele, neel xach'oj abaic ochel ta ja', swenta yu'un jich me ya ataic te lumq'uinale.

⁴⁴ Yan te ja'ex te ma x'ana'ic nuxele, ja' x'atsaquic xch'ujte'al te barcoe soc te smajc'alel ste'ele. Ja' me xacoltay abaic loq'uel a c'alal ta bay te lumq'uinale —xi' te centurione. Jich colotic loq'uel ta ja' ta jpisiltic ta lumq'uinal.