Hechos 19 - Bible in Tzeltal de Oxchuc y Tenejapa

Ay ta lum Efeso te Pabloe

¹ Te c'alal ay ta lum Corinto te Apolose, te Pablo c'ax tel ta witstiquil, c'ot ta lum Efeso. Ay jnopojeletic c'o sta tey a.

² Jich la sjojc'obey yaiy: —¿La bal awiq'uic te Ch'ul Espíritu te c'alal la ach'uunic te Jesuse? —xi'. La yalic: —Ni ayuc caiyotic stojol teme ay te Ch'ul Espiritue —xiic.

³ Te Pablo la yalbey: —¿Mach'a ta swenta jiche te ich'ja' te ac'botex awich'ique? —xi'. La yalic: —Ja' te bit'il la yac' ich'ja' te Juane —xiic.

⁴ La yal te Pabloe: —Te Juane la yac' ich'ja' ta swenta sujt'esel-o'tanil yu'un mulil. Soc la yalbey yaiyic te lum te ja' ya xch'uunic te Mach'a patil ya xtal yu'une, ja' bi ja' te Jesús te Cristoe —xi'.

⁵ Te c'alal la yaiyic stojol in to, jich la yac' sbaic ta ich'ja' ta swenta te Cajwaltic Jesuse.

⁶ Te c'alal la scajanbey sc'ab ta sjolic te Pabloe, tal ta stojolic te Ch'ul Espiritue. Jich jajch'ic ta c'op ta yantic c'opetic soc jajch' yalic te sc'op Diose.

⁷ Ay niwan lajchaytul ta spisil te winiquetique.

⁸ Te Pablo och ta sinagoga, ma ba xiw ta yaanel soc te judioetic te bit'il ay ta ajwalinel te Diose. Oxeb u jich la spas, ja' to te ay mach'atic c'ot ta yo'tanique.

⁹ Ja'uc me to, ay tulan la yac' sbaic te ma la sc'an te ya xch'uunique. Jich jajch' sbolc'optayic te yach'il be yu'un Jesús ta stojol spisil te ants-winiquetique. Jich te Pablo la yijq'uitay te sinagogae. La yic' bael te jnopojeletic ta bay te escuela yu'un Tirano sbiile. Tey la yaanbey yaiy sc'op Dios jujun c'aal a.

¹⁰ Jich la spas cheb ja'wil tey a, ja' to te la yaiyiquix stojol sc'op Cajwaltic spisil te mach'atic ainemic ta smaquen-q'uinal Asia, te judioetique soc uuc te griegoetique.

¹¹ Dios la spas jchajp at'eliletic ta swenta te Pabloe.

¹² Chican teme ja' te spañuelo, o teme ja' te smaquil xch'ujt' te lapbilix yu'une, la yich'beyic bael la yac'beyic ta sbaq'uetal te mach'a ay ta chamele, ora lamaj xchamelic yu'un, soc loc' pucujetic ta yo'tanic yu'un.

¹³ Ja'uc me to, ay judioetic te xmelmonic ta sloq'uesel pucujetic ta yo'tan te ants-winiquetique, soc la sc'an yo'tanic te ya sloq'uesic pucujetic ta swenta sbiil te Cajwaltic Jesuse. Jich jajch' yalbeyic te pucujetique: —Ya calbeyex mandal: Loc'anic tel ta swenta Jesús te yac ta xcholel te Pabloe —xiic ta sloq'uesel.

¹⁴ Ay juctul snich'nab te jtul judio-winic Esceva sbiil te jwolwanej-sacerdotee, jich yac ta spasel uuc.

¹⁵ Jich sujt'esbot sc'opic yu'un te pucuje: —Te Jesús ya jna'bey sba soc ya jna' te mach'a a te Pabloe. Yan te ja'exe, ¿mach'aex a? —xi' sc'oplalic yu'un.

¹⁶ Te winic te ay pucuj ta yo'tane, wiluntayotic yu'un. Lajic ta tsalel yu'un, yu'un bayal yip te winique. Jich xt'anlajanic loq'uel ta anel ta bay te nae. Bayal exnajic yu'un.

¹⁷ Pujc' sc'oplal ta spamal lum Efeso, la yaiyic stojol te judioetic soc te griegoetique. Ta spisilic bayal xiwic yu'un, soc mero muc' sc'oplal c'ot yu'unic ta stojolic te sbiil te Cajwaltic Jesuse.

¹⁸ Tsobol ta jtul te mach'a xch'uunejiquix te Jesús tal yalic ta jamal te bila ma lecuc yacalic ta spasele.

¹⁹ Jich te mach'atic yat'elinejic spasel mágia, la yich'ic tel xchiq'uic ta comonsitil te slibroile. La yich'ic ta wenta te jayeb stojol ya xloc' a te libroetique, ay lajuneb yoxwinic ta jmil (50,000) ta jsejp plata te stojole.

²⁰ Jich pujc' ta bayuc te sc'op Cajwaltique; soc bayal yu'el at'ej te sc'ope.

²¹ Te c'alal c'otix ta pasel spisil in to, la snop ta yo'tan te Pablo te ya xc'ax yil te quermanotactic te ayic ta sq'uinal Macedonia soc ta sq'uinal Acaya te bit'il ya xbajt' ta Jerusalene. Soc la yal: —Ta patil teme lajix co'tan tey a, ya me xboon ta lum Roma —xi'.

²² Jich la sticun bael ta Macedonia cha'tul te sjoy ta at'ele, ja' bi ja' te Timoteo soc te Erastoe. Yan te Pablo jalaj to xan ta sq'uinal Asia stuquel.

Jajch' bayal c'op ta lum Efeso

²³ Jich ora jajch' bayal c'op ta lum Efeso ta scaj te yach'il be yu'un te Jesuse.

²⁴ Ja' la sjajch'es c'op te jtul winic Demetrio sbiil te yat'elinej spasel ta plata te ch'in sloc'ombail templo yu'un te yajcananic Diana sbiil. Bayal ganar la spas soc a te sjo'tac ta spasele.

²⁵ Te Demetrio la stsob te sjo'taque soc yantic te pajal yat'elic soque, jich la yalbey yaiyic: —Winiquetic, ya ana'ic stojol te jtaojtic jc'ulejaltic yu'un te bila cat'elinejtic spasele.

²⁶ Ja'uc me to, awilojiquix soc awaiyojic stojol te bila yac ta yalel te Pabloe. Bayuc nax ya yal te ma ja'uc Dios te bila pasbil ta jc'abtic naxe, soc la yac' c'otuquix ta yo'tanic tsobol ta jtul te jlumaltique soc ta spamal sq'uinal te Asiae.

²⁷ Ma ja'uc nax te ya jta jwocoltic te ya xch'ay spisil a te bila ya jpastic ganar yu'une, soc jich uuc te templo yu'un te muc'ul antsil-dios Diana, ya me xlaj sc'oplal ta ich'el ta muc' ta bayuc. Jich me ya xlaj sc'oplal ta ich'el ta muc' te Diana te ay ta ch'uunel yu'un spisil ants-winiquetic li'to ta sq'uinal Asia soc ta bayuc ta spamal balumilale —xi' te Demetrioe.

²⁸ C'alal la yaiyic stojol te bila la yale, bayal jajch' slab yo'tanic yu'un, soc jich la yalic ta aw: —Ac'a ich'otuc ta muc' te Diana yu'un te efesioetique —xiic ta aw.

²⁹ Jich jajch'ic ta c'op spisil te lume. La sten ochel sbaic ta bay yawil muc'ul tsoblej yu'un te lume, soc la stsaquic te Gayo soc Aristarco te macedonia-winiquetic te sjoy sbaic ta beel soc te Pabloe.

³⁰ Te Pablo c'an ochuc ta yolilal te lume, ja'uc me to, la yich' comel yu'un te jnopojeletique.

³¹ Soc ay cha'oxtul te yich'oj yat'elic tey a ta bay te smaquen-q'uinal Asia te jun yo'tan sbaic soc te Pabloe, la sticunic ta alel ta stojol soc la yalbeyic wocol te manchuc ya yoches sba tey a ta bay te yawil tsobleje.

³² Ta bay stsoboj sbaic te ants-winiquetique, comon x'awlajanic nax tey a. Yanyantic te bila yacalic ta yalel ta awe, melel ma'yuc ta yo'tanic te bit'il ay te aiyeje. Col spisiluc ma la sna'ic stojol te bi swentailuc te stsoboj sbaique.

³³ Ja'uc me to, te judioetic la stec'anic ta c'op te Alejandroe. Jich yu'un te Alejandro la sjimbey sc'ab yil te lume, te ac'a ch'abuquic ta c'ope. Swenta jich ya xju' ya xc'opoj.

³⁴ C'alal c'ot ta yo'tanic te ja' judio-winic te Alejandroe, jajch'ic ta aw ta spisilic. Ay niwan chebuc ora te jich la yalic ta awe: —Ac'a ich'ot ta muc' te Diana yu'un te efesioetique —xiic ta aw.

³⁵ Jich te secretario yu'un te lume c'an sc'opon te ants-winiquetique, ja'uc me to, wocol ju' yu'un scomel ta c'op. Te c'alal lamaje jich caj yal: —Jlumal efesioetic, spisil ants-winiquetic sna'ojic stojol ta bayuc te bit'il ay ta jwentatic scanantayel te templo yu'un te muc'ul antsil-dios Diana, te loc'omba te ch'ay coel tel ta ch'ulchane.

³⁶ ¿Ay bal mach'a ya yal te ma meleluque? Lamana abaic jiche. Ma me jowiluc nax te bila ya xjajch' apasique.

³⁷ Te winiquetic awic'ojic tele, ma'yuc bi spasojic. Ma'yuc bila yelc'anejic loq'uel ta templo soc ma'yuc banti la stoybac'optayic te antsil-dios cu'untique.

³⁸ Yan te Demetrio soc te sjo'tac ta at'ele, teme ay bila ya sc'anic chajbanel yu'une, ja' swentail te ay chajbajibal soc ay jchajbanwanejetic cu'untic. Ja' ac'a yac' sbaic ta chajbanel ta stojolic.

³⁹ Teme ay bi yan ya awalique, alaic ta yorail te muc'ul tsoblej yu'un te lume.

⁴⁰ Melel ma wocoluc ya jta jmultic ta stojol ajwaliletic a te bila jajch'ix ajc' to naxe. ¿Bi me ya caltic teme ya sjojc'obotique, melel ma'yuc swentail te xch'inch'on nax q'uinal cu'untique? —xi' te secretarioe.

⁴¹ Te c'alal laj yo'tan ta c'ope, la sticun bael te ants-winiquetic stsoboj sbaique.