Hebreos 8 - Bible in Tzeltal de Oxchuc y Tenejapa

Te Jesuse tejc'anbil ta c'op yu'un te yach'il tratoe

¹ Te bila muc' sc'oplal te la caltiquix tele, ja' te bit'il jich ay te Muc' Sacerdote cu'untic te nacalix ta swa'el smuc'ul nactijib te muc' Dios te ay ta ch'ulchane.

² Soc tey ayix ta at'el ta sacerdoteil ta bay te mero templo te pasbil yu'un te Cajwaltique, te ma ja'uc la spas te ants-winiquetique.

³ Spisil te muc' sacerdoteetique yich'oj yat'elic ta yaq'uel te smajt'an Diose soc te milbil smajt'ane. Ja' swentail te puersa ay bila la yac'bey smajt'anin Dios uuc te Jesucristoe.

⁴ Te ayuc ta balumilale, ni yacuc xju' ya yich' yat'el ta sacerdoteil, melel ay to sacerdoteetic te ya yac'beyic smajt'an Dios te ya yal ta mandalil yu'un te Moisese.

⁵ In te banti ayic ta at'el in sacerdoteetic to, seña to nax soc snojq'uetal to nax te bila ay ta ch'ulchane. Jna'ojtic stojol te ja' nax sloc'omba, melel jich albot yu'un Dios te Moisese te ya xjajch'ix ta pasel yu'un a te nailpac' temploe: “Na'ame ta lec. Jich me xapas te bit'il la cac'bat awil ta ba wits”, te xi' sc'oplal yu'une.

⁶ Yan te Muc' Sacerdote cu'untique, c'axem to xan ay bayal yutsilal yat'el yich'oj. Soc ja' tejc'anbil ta c'op ta xchajbanel te yach'il trato te c'axem to xan ay yutsilale, te ja' chajbanbil ta swenta te bila yaloj te Diose.

⁷ Melel te lecuc c'ot te sbabial tratoe, ma yejt'aluc ay xan te xchebale.

⁸ Yu'un Dios la stabey ta alel smulic te ants-winiquetique jich bit'il la yal: “Ya me sta yorail te ya jpas yach'il trato soc te lum Israele soc te lum Judae”, xi' te Cajwaltique.

⁹ “Ma pajaluc soc te trato la jpas soc te neel me'il-tatiletic yu'unique, te c'alal bi ora la jnit loq'uel tel ta sc'abic ta sq'uinal Egipto. Melel ma jc'axeluc la yich'bonic ta muc' te trato la jpase, jich yu'un te jo'one la quijq'uitay ta co'tan”, xi' te Cajwaltique.

¹⁰ Soc la yal te Cajwaltique: “Jich ay te trato ya jpas soc te lum Israel te c'alal ya sta yoraile: Ya me cac'bey sna'ic ta yo'tanic te mandalil cu'une, ya me jts'ibubey ta yo'tanic c'oem. Jo'on Dioson yu'unic ya xc'oon, soc ja' lum cu'un ya xc'otic.

¹¹ Ma yejt'aluc ya sp'ijubtes xan sbaic, ni ja'uc soc te sjo'taque, ni ja'uc soc te yermanotaque. ‘Na'beya sba te Cajwaltique’, ma xiuc xan ta yalbel sbaic, te melel spisilic ya me sna'bonic jba te muc' biq'uitetique.

¹² Ya me jpasbey perdón yu'un te bila amen spasojique, jich ma ba ya jna'bey xan ta co'tan te smulique”, xi' me te Diose.

¹³ Te bit'il jich yaloj Dios te “ay yach'il trato ya jpas”, te xie, yu'un pocobenix c'oem yu'un te sbabial tratoe. Te bila ma xtuunixe soc te yaquix ta pocobele, tey nopol ya xch'ayix bael a.