Hebreos 7 - Bible in Tzeltal de Oxchuc y Tenejapa

Ja' la yich'bey yat'el Melquisedec te Jesuse

¹ In te Melquisedeque, ja' namey q'uinal muc' ajwalil yu'un te lum Salem soc sacerdote yu'un te Ch'ul Dios te ay ta ch'ulchane. Te c'alal sujt' tel te Abrahame te xc'otuc stsal jilel ta guerra te muc' ajwaliletique, te Melquisedeque loc' sta ta be te Abrahame. Tey la yac'bey bendición a.

² Jich te Abrahame la yac'bey jun ta slajunebal te biluc te la spoj tel te banti xc'otuc ta guerrae. Te Melquisedeque “muc' ajwalil te lec ya xchajbanwane”, xi' ta c'asesel te sbiile. Soc te bit'il ja' muc' ajwalil yu'un lum Salem, te “lamal q'uinal” xi' ta c'asesel sbiil te lume, jich “muc' ajwalil yu'un lamal q'uinal”, xi' sc'oplal.

³ Ma'yuc banti nacal ta jun sbiil te sme'-state soc te antiguo sme'-state. Ma chicanuc xjajch'ibal soc slajibal te xcuxlejale, jich pajal soc te Snich'an Diose. Sbajt'el q'uinal ay ta sacerdoteil stuquel.

⁴ Awaiy bit'il muc' stuquel te Melquisedeque. Melel te namey q'uinal jtatic Abrahame la yac'bey jun ta slajunebal te spojen biluc te la yich' tele.

⁵ In te sts'umbal Leví te ac'otic ta sacerdoteile, pasbilic ta mandal te ya sc'anic jun ta slajunebal te sbiluc slumal te ja' te jun nax me'il-tatiletic yu'unique soc te ja' sts'umbal Abraham ta spisilique.

⁶ Yan te Melquisedeque, manchuc teme ma sts'umbaluc Leví, ja'uc me to, la sc'anbey jun ta slajunebal sbiluc te Abrahame, ja' te mach'a albilix yu'un Dios te ay bayal bila ya x'ac'bot yu'une. Jich te Melquisedeque la yac'bey bendición te Abrahame.

⁷ Ja'uc me to, jpisiltic jna'ojtic stojol te ja' ya yac' bendición te mach'a muc' sc'oplale, soc ja' ya yich' bendición te mach'a peq'uel aye.

⁸ Stalel ya xlajic te sacerdoteetic yu'un Leví te ja' ay ta swentaic yich'el jun ta slajunebal sbiluc te slumalique. Ya yal ta Sjun Dios te cuxul to ta q'uinal stuquel te Melquisedeque.

⁹ Te Leví soc spisil te sacerdoteetic te ja' sts'umbalique, te ay ta swentaic yich'el ta ora to te jun ta slajunebale, jich c'oem te la yac'beyic jun ta slajunebal sbiluquic uuc te Melquisedec te bi ora la yac' te Abrahame.

¹⁰ Melel te c'alal loc' taotuc ta be yu'un te Melquisedeque, ay to ta sbaq'uetal Abraham a te Levie.

¹¹ Te lum Israele ac'bot yich'ic te mandalil ta swenta te sacerdoteetic yu'un Leví te ja' sts'umbal te Aarone. Ja'uc me to, ma ba ju' yu'unic yutstesel ta jc'axel a te mach'a la xch'uunic te mandalile. Ja' swentail te puersa chicnaj yan sacerdote te ma ja'uc sts'umbal te sacerdote Aarone. In te yane ja' te mach'a sts'umbal te Melquisedeque.

¹² Soc teme jelon te sacerdoteetique, puersa me ya xjelon uuc te mandalile.

¹³ Te Cajwaltique, ma sts'umbaluc Leví. Ja' sts'umbal te jtijc' yu'un Israel te ma'yuc jtuluc yich'oj yat'el ta sacerdoteil.

¹⁴ Melel jna'ojtic stojol jpisiltic te tey chicnaj ta bay sts'umbal Judá te Cajwaltique. In te Moisese ma'yuc banti la yal te ya yich' yat'el ta sacerdoteil te sts'umbal Judae.

¹⁵ Jich chicnaj te ayix yach'il sacerdote te yich'ojbey yat'el te Melquisedeque.

¹⁶ Melel ma ja'uc la yich' yat'el ta sacerdoteil yu'un te ay bila ts'ibubil jilel sc'oplal soc sts'umbal ta bay te mandalile. Ja' la yich' yat'el yu'un te ay yip yu'el stuquel te bit'il stalel cuxul te ma xju' xlaje.

¹⁷ Melel ja' la yalbey sc'oplal stuquel te Diose: “Te ja'ate sbajt'el q'uinal awich'oj awat'el ta sacerdoteil, te ja' awich'ojbey yat'el te Melquisedeque”, te xie.

¹⁸ Jich lajix sc'oplal a te mandalil te ay ta neelale, te melel ma'yuc yip soc ma'yuc bi ju' yu'un.

¹⁹ Melel te mandalile, ma'yuc mach'a lecub ta jc'axel yu'un. Ja'uc me to, chicnaj yan te ay yip co'tantic yu'un te ya yac' noptsajucotic c'oel ta stojol te Diose.

²⁰ Ma jichuc nax la yich' yat'el te Jesuse. Dios la yalbey sc'oplal ta jamal te la yich' yat'ele.

²¹ Te yantic sacerdoteetique ma'yuc banti la yich' alel sc'oplal ta jamal stuquelic. Yan te Jesuse, puersa la yich' alel sc'oplal ta jamal yu'un te Diose, jich te bit'il ts'ibubil jilel ta Sjune: “Te Cajwaltique la yal ta jamal soc ma ba ya sujt'es sc'op: ‘Sbajt'el q'uinal awich'oj awat'el ta sacerdoteil, te ja' awich'ojbey yat'el te Melquisedeque’, xi'”, te xie.

²² Jich yu'un te Jesuse ya yac' c'otuc ta pasel te trato yu'un te Diose, te ja' c'axem to xan lec yutsilal a te bit'il ay ta neelale.

²³ Te sacerdoteetic te sts'umbalic Leví, bayalic ta jtul c'ot stuquelic scaj te lajel lajel ayic baele.

²⁴ Yan te Jesuse stalel ay sbajt'el q'uinal stuquel. Ma xjelon ta sacerdoteil stuquel.

²⁵ Jich ya xju' ya scoltay sbajt'el q'uinal te mach'atic ya xnoptsajic ta stojol Dios ta swentae, melel ya xju' ya xc'opoj yu'unic spisil ora stuquel te bit'il cuxul ay sbajt'el q'uinal.

²⁶ Jich te Jesuse, ja' Muc' Sacerdote te ya xju' yu'un ya scoltayotique, ch'ul Dios stuquel, ma sna' sleel smul, ma'yuc mulil quechel ta swenta, ma ba slac'oj sba soc te jmulawiletique, soc ic'otix moel c'alal ta stoyolil te ch'ulchane.

²⁷ Ma pajaluc soc te yantic muc' sacerdoteetic te puersa ya smilbeyic smajt'anin chambalametic jujun c'aal te Diose, te ja' neel ya smilic swenta xch'ayjibal smulic soc te patil ya smilic yan swenta xch'ayjibal smulic uuc te slumale. Melel te Jesuse tic' a te la yac' sba ta milbil smajt'an Dios jun buelta, te bit'il la yac' sba ta lajel stuquele.

²⁸ Melel ta swenta te mandalile, ac'bot yich' yat'elic ta muc' sacerdoteil te winiquetic te ma'yuc bila lec ya xju' yu'unic spasele. Ja'uc me to, bayalix ja'wil a te chicnajem te mandalil te c'alal la yalbey sc'oplal ta jamal te Diose te ya yich' yat'el ta Muc' Sacerdotee te Snich'ane, te ts'acal ya xju' yu'un spasel te yat'el ta sbajt'el q'uinal.