Hageo 2 - Bible in Tzeltal de Oxchuc y Tenejapa

Yutsilal yach'il templo

¹ Ta jun xcha'winic (21) c'aal swenta sjuquebal u a, te Cajwaltic la xcha'c'opon xan te j'alwanej Hageo.

² La spas ta mandal te ya xba yalbey Zorobabel, te Josué, soc te jayeb xan ants-winiquetique:

³ —Te jayebex te la awilic te yan templo te bi yilel st'ujbilale, ala caiytic bi yilel ya awilic te templo cu'untic ta ora in to. ¿Ma bal jichuc ya awilic te ma'yuc banti spajojbey yutsilal jxujt'uc te yane?

⁴ Pero, ac'a puersa, Zorobabel. Ac'a puersa, Josué, te muc'ul sacerdoteat te awentainej te sacerdoteetique. Ac'aic puersa ta apisilic, ants-winiquetic te li' ayex ta lumq'uinale. At'ejanic me, jo'on me joinejex. Jo'on Ajwalilon te Spisil ya xju' cu'un ya cal ta jamal.

⁵ Jich te bit'il la calbeyex te c'alal loq'uex tel ta Egipto, te ja' ya sjoinex te espíritu cu'une. Ma me xiwex jiche.

⁶ Ma ba jalix bael ya me cac' nijc'uc ch'ulchan soc balumilal, te mar soc te lumq'uinale.

⁷ Ya me cac' nijc'uc ta spisilic te nacionetique. Ya me yich'ic tel sc'ulejalic, te templo cu'un ay me bayal yutsil ya xc'ot —xi' te Cajwaltic te Spisil ya xju' yu'une. Soc jich ya yal ta jamal te Cajwaltique:

⁸ —Jo'on cu'un te oro, soc jo'on cu'un te plata.

⁹ Ja' xchebal templo in to, c'axem me jich st'ujbilal te bit'il yan sbabial templo. Ya me cac' lamajuc q'uinal li' in to. Jo'on te Ajwalilon te Spisil ya xju' cu'une ya cal ta jamal —xi' te Cajwaltique.

Dios la sc'opon ta tulan te lum ma junuc yo'tan ta stojole

¹⁰ Chaneb xcha'winic (24) c'aal sjajch'el sbalunebal u swenta xchebal ja'wil yat'el ta muc' ajwalil a te Darío, tal sc'op Cajwaltic ta swenta te j'alwanej Hageo, jich la yal:

¹¹ —Jo'on Ajwalilon te Spisil ya xju' cu'un ya calbat te ya me ajojc'obey te sacerdoteetic bit'il c'oem ya yaiyic ta swenta te mandaliletic te c'ope:

¹² Teme ay mach'a ya spots bael ch'ultesbil ti'bal ta sc'u'e, soc teme ya sta waj te sti'il sc'u'e, o te bila paybile, vino, aceite, o biluc yan we'eliletic, ¿ch'ultesbil bal ya xjil yu'un te we'elile? —xi' te Cajwaltic la yaiy te Hageo. —Ma wan —xi' yu'un te sacerdoteetique.

¹³ Jich la yal xan sc'op Cajwaltic ta stojol Hageo: —Teme ay mach'a boloben sc'oplal ta scaj spiquel te mach'a lajeme, teme ya xba spic te we'eliletique, ¿ma bal bolobenuc sc'oplal ya xjil yu'un jiche? —xi'. —Boloben ya xjil yu'un —xiic te sacerdoteetique.

¹⁴ Te Hageo jich la yal: —Te Cajwaltic jich ya yal ta jamal: “Ja' nix jich c'oemic te ants-winiquetic in to. Spisil te bila ya spasique, soc te bitic ya yac'bonic jmajt'anine, spisil boloben sc'oplal.

¹⁵ Yo'tic soc ta patil bael, ya me sc'an ya ana'ic ta lec in to. Te c'alal ma to ba jajch'em ta pasel a te templo,

¹⁶ ¿bila c'ot ta awentaic la awilic? Melel te c'alal ay mach'a bajt' ta banti busul soc ste'el te trigo, ay ta yo'tan te ya xloc' jtab ta jp'is tey a, pero ja' nax lajunp'is la sta. Soc teme ay mach'a bajt' ta estanque ta banti ya spasot vino, yu'un ya sloq'ues lajuneb yoxwinic (50) q'uib ta sc'op tey a, ja' nax ya sta jtab (20) q'uib.

¹⁷ Jo'on la jlajinbeyex ta swenta chamel, soc ta swenta bat, ta spisil te sit te bitic ay awocolic ta spasele. Pero ni lajuc asujt'es awo'tanic ta jtojol. Jo'on Ajwalilon te jich ya cale.

¹⁸ Yo'tic, swaxaquebal u soc chaneb xcha'winic (24) c'aal, la yich'ix ac'beyel jajch'el yiptajib te templo cu'une.

¹⁹ Yo'tic aiya me awaiyic ja'ex, yo'tic nix ma me ba ya spasix falta ta yawil te sit awawal-ats'unubique. Ma to ba yac'oj sit te ts'usubil, te higuera, te granado, ni ja'uc te olivoe, pero yo'tic ya cac'bey bael bendición ta spisil”, xi' te Cajwaltique —xi'.

Bi la xchap Cajwaltic ta stojol Zorobabel

²⁰ Ja' nix ta yorail soc sc'aalelal a, te Cajwaltic cha'c'opoj xan ta stojol Hageo.

²¹ La spas ta mandal te ya yalbey yaiy te Zorobabel, ja' te jwentainwanej yu'un Judá: —Jo'on ya cac' nijc'uc te ch'ulchan soc te balumilale.

²² Ya me jlajinbey yipic te ajwaliletic ta balumilal; ya me jch'oj coel ta smuc'ul nactijibic. Ya me cac' balch'ujuc te carretaetic yu'un guerra soc te mach'atic ochemic a; soc ya me xlajic te caballoetic soc te mach'atic cajajtic a. Juju-jtul me ya smil sbaic; ya me slow sba soc ta puñal te yermanoe.

²³ Zorobabel, abat cu'un, te bi ora ya xc'ot ta pasel, ya me jcanantayat. Jich me ya jcanantayat te bit'il jch'ocow-sello, melel jo'on jtsaojat. Jo'on Ajwalilon te Spisil ya xju' cu'une ya cal ta jamal —xi' me te Cajwaltic ta stojol Zorobabel.