Habacuc 3 - Bible in Tzeltal de Oxchuc y Tenejapa

Habacuc la sc'opon Dios

¹ Ja' te la sc'opon Dios te j'alwanej Habacuc:

² —Te bila caiyojbat stojol ac'oplal, Cajwal, soc spisil te bitic apasoje, ya snojesbon co'tan ta awich'el ta muc'. Pasbotic quiltic yo'tic te smuc'ul awat'el la apas ta namey tel te bit'il cuxulotic ta ora to, swenta yu'un ya me jna'tic te jo'otique. Jich me ya awac'botic quiltic te c'uxbajemotic ta awo'tan, manchuc me ilinemat.

³ Tey ya xtal Dios ta bay q'uinal ta Temán; ta bay wits Parán tey ya xtal a te Ch'ul Diose. Te yutsil xojobile ya xpujc' bael ta ch'ulchan; soc ta spamal te balumilal ya xnoj ta albeyel wocol.

⁴ Potsol ta xojobil, yac ta tilel ya xtal. Ta sc'ab ya xt'om loq'uel tel te xojobile; ya yac' ta na'el te tey snac'oj a te yu'ele.

⁵ Ta stojol ya xjulic te muc'ul milawal chameletique; soc ta spat ya xtal te tulan c'ajc' te ora ya xchic'awane.

⁶ Te lumq'uinal ya xnijc' te c'alal ya xcom ta beele; ya xcajic ta nijq'uel te nacionetic te c'alal ya x'ilot yu'une. Te muc'ul witsetic ya xjemic coel; ya xch'ayic bael te antiguo witsetique. Yan te beetic yu'un Dios sbajt'el q'uinal ayic stuquel.

⁷ “Quiloj te ants-winiquetic ta Cusán, u'uninbilic yu'un mel-o'tan; te mach'atic yajwal Madián, tsacbilic ta jyalel yu'un te xiwele.

⁸ ¿Ilinemat bal, Cajwal, ta stojol te muc'ja'etique? ¿Tilem bal sc'ajc'al awo'tan ta stojol te maretique? ¿Ja' bal ya xmoat ta acaballoetic yu'un, soc ja' bal jich moemat ta acarreta te ya stsalwane?

⁹ “Chapalix awu'un te at'ime, chapalix te ya at'imuyix bael te yat'ejibale. Ta swenta te muc'ja'etic la ajambeyix sbeic ta lumq'uinal.

¹⁰ Te witsetic ya xnijq'uic te c'alal ya yilate; ya xco tel ta ch'ulchan bayal ja'al. Te snabilal te mar ya x'awun, yu'un te ya stoyes moel yip te sbule.

¹¹ Te c'aal soc te u ma ba ya xloq'uix tel ta bay yawilic ta scaj te mero muc' xojobil te at'ejibaletic yu'un at'im soc te xojobil te alanzae.

¹² Ta awilimba ya awoclin spamal a te balumilale; ta sc'ajc'al awo'tan ya apech' ta teq'uel te nacionetique.

¹³ Te ja'ate loc'atix ta scoltayel te lum awu'un, soc te muc' ajwalil te ja'at nix atsaoj atuquel. La ajinbeyix smujq'uil sna te mach'a amen yo'tane; la achicnantesbeyix te tonetic te ipajem ae.

¹⁴ La amilbey te jtsobwanej yu'unic ta yat'ejibal te st'ime, te c'alal cajajtic ta caballo te swinictac te stoyoj sbaic wilic tel jich bit'il tulan yic'al ja'al, ta spuquel bael te mach'atic ma xju' yu'unic scoltaybel sbaic, yu'un ya slajinic ta muquen ta sc'opic.

¹⁵ “Te caballoetic awu'une ja' ya awoclin a te mar te mero muc' sti'il te yacal ta bule.

¹⁶ C'alal la caiy stojol spisil, xiwon yu'un. Jajch' ta nijq'uel te que yu'une, ma ba ipajemonix ta cacan la caiy, spisil jbaq'uetal ch'ay ta jc'axel te yipe. Ja'uc me to, lamal co'tan la jmaliy te bi c'aalil Dios ya yac'bey smel yo'tanic te soldado-j'uts'inwanejetique.

^17-18 “Jich yu'un, ya me xnoj sbujts' co'tan yu'un ta scaj te Cajwaltic te jcoltaywanej cu'une. Ya me calbey yutsilal, manchuc me ma xnichin te higueraetic, manchuc me ma xyac' sit te ts'usubiletic soc te olivoetic, manchuc me ma'yuc bila ya jtsobtiquix loq'uel ta lumq'uinal, soc manchuc me ma'yuquix wacaxetic ta snaique.

¹⁹ Melel te Cajwale ya yac'bon quip; ya yac'bon yip te cacane, jich bit'il ya x'animaj chij. Jich ya yic'on bael ta toyol q'uinal ta bay ya xcolone —xi' te Habacuc.