Habacuc 2 - Bible in Tzeltal de Oxchuc y Tenejapa

Te bila ac'bot sna' Habacuc yu'un Cajwaltic

¹ Ya me cat'elin yaiyel stojol soc ta yilel, jich ya jpas te bit'il jtul soldado te ay ta j'il-q'uinale, swenta yu'un ya jmaliy te bila ya yalbon te Cajwaltique, te bila sujt'ib ya yac'bon te bila la jc'an parte yu'une.

² Te Cajwaltic la sujt'esbon te jc'ope: —Ts'ibuya ta lejch'el ladrillo te bila ya cac'bat awile, swenta yu'un ya me xju' ya yich' ilel ta ora nax.

³ Manchuc me ma to xc'ot sc'aalelal te ya xc'ot ta pasele, ma me yu'unuc ma xc'ot ta pasel. Ya me amaliy, manchuc me ya xjalaj yilel te jich ya xc'ot ta pasele.

⁴ Ts'ibuya te ma ba xjalajic te toybaetic te c'ax amen yo'tanique; yan te mach'atic tojique ta swenta te bit'il jun yo'tanic ta stojol Dios ya me xcuxinic —xi' te Cajwaltique.

Te bila ya xc'ot ta swenta j'uts'inwanejetic

⁵ Te toyba winiquetic ya sc'anic te c'ulejalil, mero ma xlubic ta sleel. Spisil ora ya sc'anic xan bayal, manchuc me ja' syalesjibal ya xc'ot yu'unic. Ya sjam yeic jichuc muquenal; ma tic'uc ya yaiy yo'tanic a, jich bit'il te lajele. Ja' swentail te ya sten sbaic ta yu'uninel yantic nacionetic.

⁶ Ja'uc me to, spisil te nacionetic ya xcaj slabanic te j'u'uninwanejetic yu'unique, jich ya sc'ajintaybey sc'oplalic: “¡Ya me awil awocol ja'at te ya apas aba ta jc'ulej a te bila ma ja'ucat awu'une! ¿Jayeb xan buelta ya atsob te c'ulejalil ya alo'laye?” xi' me sc'oplal.

⁷ Ch'ayemix awo'tan a ya xtal te mach'atic ay abet yu'une, ya xwijc' sitic te mach'atic ya yac'bat woclajele, ya me st'ananat jilel.

⁸ Te nacionetic jun nax me ya yac' sbaic ta scontroinbelat, ya me spojbat loq'uel abiluc jich nix bit'il la apojbey loq'uel te ja'ate. Ya me yac'bat atoj spisil te amen awat'ele, ja' te uts'inwanej la apas ta spamal q'uinal ta scontroinel te lumetic soc te yajwale.

⁹ ¡Ya me awil awocol ja'at te la anojesix ana a te bitic la awelc'ane, swenta yu'un ya scoltayat ta ac'op spisil te bila chujc'ulya xtal ta atojole!

¹⁰ Jich la amuquix ta q'uexlal te anae. Ja'at nix la ajajch'es te ajinjibal atuquel te la ajin bayal ta jchajp nacionetique.

¹¹ Ja' te tonetic yu'un te sts'ajc'ule, soc te te'etic yu'un te sts'amte'ale, ya x'awunic ta scontroinbelat.

¹² ¡Ya me awil awocol ja'at te ya apas te lumetic awu'un ta swenta milaw soc uts'inwanej!

¹³ Te Cajwaltic te Spisil ya xju' yu'une ya me spasbat te ma'yuc yutsil ya xc'ot te awat'el soc te awocole; melel ta spisil te awat'ele ya me yich'ic lajinel ta c'ajc'.

¹⁴ Te yutsilal Cajwaltic ya me xna'ot ta bayuc, ya me snojes ta spamal balumilal, jich bit'il ja' ya xnoj yu'un te mare.

¹⁵ ¡Ya me awil awocol ja'at te ya awac' yacubuc te apat-axujq'ue, te ya awac'bey tulan uch'balil te capal soc droga, te ya xch'ay ta q'uinal yu'un te jich ya awilbey sbaq'uetale!

¹⁶ Te ich'el ta muc', ja' ya xc'atp'uj ta q'uexlal. Melel te Cajwaltic ya yac'bat awuch' te bila ya awac' ta ilel a te ma ba awich'oj circuncisión, jich ya xc'atp'uj ta q'uexlal te awutsilale.

¹⁷ La ats'etic te te'etic yu'un Líbano, ta ora to ya me awich' ts'etel uuc. La amilic te ja'mal chambalametic yu'un; ta ora to ya me xiwtesat te chambalametique. Ja' ya xtal ta atojol ta scaj te milaw la apase, soc te uts'inwanej la apas ta spamal q'uinal, ta bay te lumetic soc te yajwale.

¹⁸ ¿Bistuc te loc'omba te ju'em ta pasele? ¿Bistuc te bila pasbil, te ja' nax ya yac' ta nopel lot? Te loc'ombaetic ma xc'opojic; ¿bit'il c'an smuc'ulin yo'tan te winic la spase?

¹⁹ ¡Ya me awil awocol ja'at te ya awalbey swic' sit te jun loc'omba-te'e, soc te ya awalbey stejc'an sbae te jp'ij ton uma'e! ¿Ya bal xju' yu'un te ay bila ya yalbotic jtebuque? Ma'yuc, melel ma ba cuxulic, manchuc me potsbilic ta oro soc ta plata.

²⁰ Yan te Cajwaltic ay ta ch'ul templo yu'un. Ch'abanic ta stojol ta apisilic te ayex ta spamal balumilal.