Habacuc 1 - Bible in Tzeltal de Oxchuc y Tenejapa

Habacuc ya sc'an parte yu'un bila ma lecuc ta pasel

¹ Ja' sc'op Cajwaltic te ac'bot sna' stojol te j'alwanej Habacuc.

² La yal te Habacuc: —Cajwal, ¿jayeb to buelta ya x'awunon ta sc'anel coltayel, te ma ba ya awaiybon stojole? ¿Jayeb to buelta ya xc'opojon ta aw yu'un te uts'inel yac ta pasel, te ma xtal acoltayon yu'une?

³ ¿Bistuc ya awac'bon quil bayal uts'inel soc te bila amene? Joytaybilon yu'un te j'uts'inwanejetic soc te jlajinwanejetique; ta spisil ta bayuc ay guerraetic soc c'opetic.

⁴ Ma ja'uc ay ta tuuntesel te mandaliletique; ja' nax ay ta pech'el ta teq'uel te bitic sc'oplal ya xc'ot ta jwentatique. Te bila amen ja' yac ta stenel te bila leque; jich yac ta jinel te chajbanele —xi'.

Cajwaltic ya yac'bey sujt'ib

⁵ La yal te Cajwaltic: —Te ja'exe ilawilic te nacionetic te sjoytayejexe; ilawil, soc nojuc me ta awo'tanic xiwel yu'unic. Ayonix ta spasel jchajp at'elil te yan yilel, te ma niwan ya xch'uun awo'tanic, manchuc me ay mach'a ya yalbeyex awaiyique.

⁶ Ya cac' xchajban sbaiquix ta guerra te caldeoetique, ja'ic te c'ajc' yo'tanic, te spisil ora toyol yo'tanic yu'un te ya xbeenic ta spamal balumilal ta juju-jejch' ta swenta yu'uninel te q'uinaletic te ma'yuc ta swentaique.

⁷ Tulanic ta jyalel, soc xiweltic me sbaic, ma'yuc bay ya sna'ic yan mandalil a te bit'il ay yu'unique.

⁸ Te scaballoic c'axem jich ya x'animajic a te bit'il leopardo-choj, c'axem jich yixtaelic a te bit'il ja'mal ts'i'etic yu'un jochol taquin q'uinal. Te mach'a cajajtic ta spat caballo jchajp ya x'animajic soc a, bayal yajtalul ta jyalel, soc c'ubul to ya xwilic tel ta sjajch'esel guerra. Jich c'oemic te bit'il jxic te ya xwil bael ta stojol te bila ya stsaque.

⁹ Spisil ya slajin c'alal ya xc'axic ta beel; te bit'il yacal ta c'axele, yac ta sts'unel bael te xiwele. C'axem to xan tsobol ya xchuquic bael, jich yipal bit'il sji'al mar.

¹⁰ Ya slabanic te muc' ajwaliletic soc winiquetic te muc' sc'oplalique. Ya stse'luyic te ts'ajq'uetic te ay ta sjoyobal te lumetique, yu'un ay bila ya sbusanic ta spat, jich ya xwilic ochel ta lum.

¹¹ Jich ya xc'axic ta beel te bit'il tulan ic'; ja' nax ya smuc'ulin yo'tanic te yipique, ja' dios c'oem yu'unic stuquel —xi' te Cajwaltique.

Ya sc'an xan parte Habacuc

¹² La yal te Habacuc: —Cajwal, ¿yu'un bal ma'yucat ta sbajt'el q'uinal, ja'at te Ch'ul Diosat cu'un te mero ma xlajat atuquele? Cajwal soc jcanantaywanejat cu'un, ja'at la awac'bey yipic te caldeoetic swenta yu'un ja' ya yaq'uic castigo ta awenta.

¹³ Te ja'ate c'ax jelawen awutsilal, ma snujp'in ya awil te bitic ma lecuque; ma lecuc awo'tan yu'un te mulile. ¿Bi yu'unix a jiche te ma'yuc bila ya awalbey te j'uts'inwanejetique, te ma xc'opojat yu'un ta stojol te mach'a c'ax amen yo'tanic te yac ta slajinel te mach'atic ma pajaluc yo'tanic soque?

¹⁴ ¿Bi yu'un jich yacat ta spasbeyel te winiquetic te bit'il chayetic ta mar, jich bit'il chambalametic te ma'yuc ajwalil yu'unique?

¹⁵ Te caldeoetic ya yu'unin yantic nacionetic jich bit'il te jtsac-chay ya yu'unin te chayetique. Ya stsac soc anzuelo soc yantic tsacjibal; te c'alal ya yilic tsobol chayetic, ya xbujts'naj yo'tanic yu'un.

¹⁶ Jich yu'un te jtsac-chaye ya squejan sba ta stojol te tsacjibal soc anzuelo yu'une, soc ya yac'bey milbil majt'anil, soc ya xchic'bey pom ta yich'el ta muc'. “Wocol awal”, ya yutic, melel ay swe'elic ta lec yu'un.

¹⁷ ¿Jich bal ya spasulayic bael te caldeoetic te ya stsacoticta xchojaq'uique? ¿Jich bal puro milaw bael te mero ma'yuc ta na'beyel yo'bolil sbaic te ants-winiquetique? —xi'.