Génesis 48 - Bible in Tzeltal de Oxchuc y Tenejapa

Jacob la sc'anbey bendición ta stojol Efraín soc Manasés

¹ Ma ba bayalix c'aal te José albot yaiy te ay ta chamel te state. Jich ba yil soc la yic' bael te cheb snich'nabe, ja'ic te Manasés soc Efraín.

² Albot yaiy te Jacob te talix ta ilel yu'un te snich'ane, ja' te José. Jich te mamal Israel la spas tulan, jajch' najc'ajuc ta swayib,

³ la sc'opon xan te José: —Te Dios te Spisil ya xju' yu'une, la yac' sba ta ilel ta jtojol ta lum te Luz sbiile te ay ta Canaán, soc la yac'bon bendición:

⁴ Jich la yalbon: “Ya me cac' esmajuc te ats'umbale, bayal ta jchajp nación ya xc'otic ta loq'uel. Soc ya me cac'bey yu'unin ats'umbal in q'uinal to. Ja' me yu'unic sbajt'el q'uinal”, la yuton te Diose.

⁵ Jich yu'un te cheb anich'nab, te Efraín soc Manasés, te ayinic ta Egipto te c'alal ma to xtalon ta Egipto, ja' me mero cu'un, jich bit'il cu'un te Rubén soc te Simeón, ja' nix jichic te cheb anich'nabe, cu'un me ta xchebalic.

⁶ Teme ay to ya x'ayinic xan anich'nab, ja' me awu'un ya xc'ot stuquel. Soc ta swenta bit'il yijts'nabic te Efraín soc te Manasés, ja' me ya sjoinic ta yich'el te jich yipal q'uinal ya xc'ot ta swentaic.

⁷ Melel te c'alal loc'on tel ta Padan-aram, laj ta be ta sq'uinal Canaán te Raquel, ja' te ame'e, nopol sc'an jtaix bael a te Efrata. Jich yu'un la jmuc jilel ta sbelal Efrata, te Belén sbiil ta ora to —xi' te Jacob.

⁸ Te mamal Israel la yil tey a te cheb snich'nab te José, la yalbey: —¿Mach'a a in queremetic to? —xi'.

⁹ —Ja'ic te jnich'nab te yac'ojbon te Dios te li' ayinic ta Egipto —xi' te José. La yal te state: —Ac'a stejc'an sbaic ta jts'eel, swenta yu'un ya me jc'anbey bendición ta stojolic —xi'.

¹⁰ Te mamal Israel bolobenix sit te bit'il mamalixe, ma ba mero ya yilix te q'uinale. Jich yu'un te José la stejc'an te snich'nab ta sts'eel te state. Te mamal Israel la smey te queremetic, soc la sbujts'iy.

¹¹ Soc la yalbey te José: —La cal te ma ba ya quilbat asit; ja'uc me to, Dios la yac'bon quilbat xan asit, soc la yac'bon quilbey sit te cheb anich'nabe —xi'.

¹² Te José la sjits loq'uel te snich'nab ta bay sjol yacan te state. La stinan sba coel c'alal ta lum ta stojol te state.

¹³ Te José la yic' xan bael te cheb snich'nabe, la snit bael ta swa'el sc'ab te Efraín, c'o stejc'anbey ta bay xq'uexen sc'ab te mamal Israel. Ta xq'uexen sc'ab la snit bael te Manasés, la stejc'anbey ta swa'el sc'ab te mamal Israele. Xchebal la stejc'anbey ta stojol.

¹⁴ Jich te mamal Israel la yac' tel te swa'el sc'abe, la scajanbey ta sjol te Efraín, te ijts'inale. Te xq'uexen sc'ab la scajanbey ta sjol te Manasés, ja' te banquilale. Ja'uc me to, te bit'il la yac'bey sjel sba te sc'abe, ay swentail ta yo'tan te bit'il jich la spase.

¹⁵ Jich te mamal Israel la sc'anbey bendición ta stojol José: —Te Dios te jun yo'tan la xch'uunic te jmam Abraham soc te jtat Isaac, ja' te Dios te scanantayejon c'alal ora yo'tic,

¹⁶ ja' te Ch'ul Abat te ya scoltayon yu'un ma ba ya yac'on a spisil te bitic ma lecuque, ac'a yac'bey bendición te queremetique. Ac'a yich'bonic jilel jbiil soc sbiil te jmam Abraham soc te jtat Isaac, ac'a esmajuc, soc bayaluc me sts'umbalic ta balumilal —xi'.

¹⁷ Ja'uc me to te José, c'alal la yil te stat te bit'il ja' la scajanbey swa'el sc'ab ta sjol te Efraín, ma lecuc c'ot ta yo'tan. Jich yu'un la stsacbey sc'ab te state, te cajal ta sjol te Efraín, c'an yac' bael ta sjol Manasés.

¹⁸ Te José jich la yalbey te state: —Ma jichuc ya sc'an, jtat. Ja' banquilal te yane, ja' xacajanbey swa'el ac'ab ta sjol stuquel —la yut.

¹⁹ Ja'uc me to, ma la sc'an te state, jich la yalbey te José: —Ya jna' stojol, jnich'an, ya jna' stojol. Ya x'esmaj soc sts'umbal uuc, soc muc' ya xc'ot ta loq'uel. Ja'uc me to, ja' c'ax jich ya xc'ot stuquel te yijts'ine, soc bayal ta jchajp nación ya xloc' a te sts'umbale —xi' sc'oplal yu'un.

²⁰ Jich la sc'anbey bendición ta stojol te cheb queremetique: —Te lum Israel ya me xtuun yu'unic ta sc'anel bendición, te jich ya yalic: “Ac'a spasbat jich ta atojol te bit'il la spasbey Efraín soc Manasés”, xiic me ta yalel —xi' te mamale. Jich te Israel muc' la yac' te Efraín, peq'uel la yac' te Manasés.

²¹ Soc la yalbey te José: —Ya xwayix jbaq'uetal; ja'uc me to, ja' me ya sjoinex te Diose, soc ya me yiq'uex sujt'el ta bay slumal te ame'-atatique.

²² Te ja'ate ay bayal la cac'bat atuquel, c'ax jich a te bit'il la cac'bey te abanquiltaque, ja' te lum Siquem te la jpojbey te amorreoetic c'alal la jtsal ta jpuñal soc ta jt'im —xi' sc'oplal yu'un.