Génesis 46 - Bible in Tzeltal de Oxchuc y Tenejapa

Jacob ta sq'uinal Egipto

¹ Jich a loc' bael te mamal Israel, soc la yich' bael spisil sbiluc. C'ot ta lum Beerseba sbiil, tey c'o yac'bey smajt'an a te Dios yu'un te state, ja' te Isaaque.

² Ta swaich c'oponot yu'un Dios ta ajc'ubal te mamal Israel, jich albot yu'un: —Jacob, Jacob —xi'. La sjac' te mamal Israel: —Li' ayon to —xi'.

³ Albot yu'un te Diose: —Jo'on Dioson, Dioson yu'un te atate. Ma me x'axi' te ya xcoat bael ta Egipto, yu'un ya me cac' esmajan tey a, bayal me ta jmil ats'umbal ya xc'ot.

⁴ Ya me joinat bael te ya xcoat bael ta Egipto, soc ya me joinat sujt'el ta patil. Ja' me ya smucat te José te c'alal ya xway abaq'uetale —xi' sc'oplal yu'un.

⁵ Jich a jajch' loq'uel ta Beerseba te Jacob. Te carretaetic te la sticun tel te faraón, tey och bael a te mamal Jacob, soc te alaletic yu'unic soc te yinamique.

⁶ Soc la smaquic bael te xchamsbalamic soc la yich'ic bael spisil sbiluquic te staojic ta sq'uinal Canaán. Jich c'otic ta Egipto te Jacob soc spisil te mach'a ay yu'une.

⁷ Sjoinej bael ta Egipto spisil te snich'nabe soc spisil te smamataque.

⁸ Jich sbiilic te israeletic c'otic ta Egipto, ja' te mamal Jacob soc te sts'umbale: Rubén, te sba snich'ane.

⁹ Te snich'nab Rubén: Hanoc, Falú, Hezrón soc Carmi.

¹⁰ Te snich'nab Simeón: Jemuel, Jamín, Ohad, Jaquín, Zohar, soc Saúl yal te cananea-antse.

¹¹ Te snich'nab Leví: Gersón, Coat soc Merari.

¹² Te snich'nab te Judá: Er, Onán, Sela, Fares soc Zara. (Pero te Er soc Onán lajic jilel ta Canaán stuquelic.) Te snich'nab te Fares: Hezrón soc Hamul.

¹³ Te snich'nab Isacar: Tola, Fúa, Job soc Simrón.

¹⁴ Te snich'nab Zabulón: Sered, Elón soc Jahleel.

¹⁵ Jich sbiilic te yalatac Lea, te yal-snich'nab soc Jacob, te ayinic ta Padan-aram. Soc ay jtul yantsil-nich'an, Dina sbiil. Oxlajuneb xcha'winic (33) ta spisilic soc winiquetic soc antsetic.

¹⁶ Te snich'nab Gad: Zifión, Hagui, Ezbón, Suni, Eri, Arodi soc Areli.

¹⁷ Te snich'nab Aser: Imna, Isúa, Isúi, soc Bería soc jtul yantsilel, Sera sbiil. Te snich'nab Bería: Heber soc Malquiel.

¹⁸ Jich sbiilic soc yal-snich'nab te yalatac Zilpa, te scriada Lea te ac'bot yu'un te stat, ja' te Labán. Ja' nix yal-snich'nab soc te Jacob, waclajuntul ta spisilic.

¹⁹ Te yalatac Raquel, te yan yinam Jacob: José soc Benjamín.

²⁰ Te José ayin cheb snich'nab ta Egipto: Manasés soc Efraín, te yalatac Asenat, te yantsil-nich'an te sacerdote yu'un lotil dios ta lum On, Potifera sbiil.

²¹ Te snich'nab Benjamín: Bela, Bequer, Asbel, Gerá, Naamán, Ehi, Ros, Mupim, Hupim soc Ard.

²² Jich sbiilic soc yal-snich'nab te yalatac Raquel, te yal-snich'nab soc te Jacob. Chanlajuntul ta spisilic.

²³ Te snich'an Dan: Husim.

²⁴ Te snich'nab Neftalí: Jahzeel, Guni, Jezer soc Silem.

²⁵ Jich sbiilic soc yal-snich'nab te yalatac Bilhá, te scriada Raquel te ac'bot yu'un te stat, ja' te Labán. Ja' yal-snich'nab soc te Jacob, juctul ta spisilic.

²⁶ Jich yipalic te mero sts'umbal Jacob te la sjoinic bael ta Egipto, waqueb xchanwinic (66) ta spisilic. Ma la yich' ajtayel stuquel te yinamic te snich'nabe.

²⁷ Te snich'nab José, te ayinic ta Egipto stuquelic, chebic. Ta spisil te mach'a jayeb ay yu'un te Jacob, te c'o nainuc ta Egipto, lajuneb xchanwinic (70) ta spisilic.

²⁸ Te Jacob la sneeltes bael te Judá, ba yalbey te José te yacuc xtal ta ilel yu'un ta Gosén sbiil te q'uinale. Te Jacob c'ot ta Gosén.

²⁹ Jich te José la xchajban te scarreta, tal yil te stat ta Gosén. C'alal c'o yilbey sit te state, la smey, bayal la yoq'uetay sba soc, jalaj nax ta smeyel.

³⁰ Te mamal Israel la yalbey te José: —Junix co'tan ya xlajon, yu'un la quilbatix asit te cuxulate —la yut.

³¹ Te José la yalbey te sbanquiltac soc te mach'a jayeb ay yu'unique: —Ya xba jc'opon te muc' ajwalil faraón. Ja' me ya xba calbey te julexix tele, te jajch'ex tel ta sq'uinal Canaán soc te mach'a jayeb ay awu'unique.

³² “Yat'elinejic xch'ijtesel chambalametic, melel bayal yu'unic, soc yic'ojic tel xchijic, swacaxic, soc spisil bitic ay yu'unic”, ya me xba cut.

³³ C'alal ya sticunex ta iq'uel te faraón, “¿Bi at'elil ya ana'ic spasel?” teme ya yutexe,

³⁴ ya me awalbeyic: “Te jo'otique ja' cat'elinejtic xch'ijtesel chambalametic ta calaliltic to soc jme'-jtatic”, ya me awutic, swenta yu'un ja' me ya yac'beyex aq'uinalinic te Gosén, melel te egipcioetique ma slac' sbaic soc te jcanan-chijetique —xi' te José.