Génesis 38 - Bible in Tzeltal de Oxchuc y Tenejapa

Judá soc Tamar

¹ Te Judá la yijq'uitay te sbanquiltac soc te yijts'inabe, ba sjoin jtul adulam-winic te Hira sbiile.

² La yil tey a te yantsil-nich'an jtul cananeo-winic te Súa sbiile, la yic' yinamin.

³ Jich la yic' yal, ayin squerem, Er sbiil la yac'bey.

⁴ Ta xchebal buelta la yic' yal, ayin yan squerem, Onán sbiil c'ot yu'un.

⁵ Ta yoxebal buelta la yic' yal, ayin xan squerem, Sela sbiil c'ot stuquel. Te Judá ay ta lum Quezib a te c'alal ayin te yoxebal snich'ane.

⁶ Patil te Judá la slebey yinam te sba snich'ane, ja' te Er, Tamar sbiil te yalibe.

⁷ Ja'uc me to te Er, te sba snich'an te Judá, mero ma lecuc yat'el la yil te Cajwaltique, jich yu'un te Cajwaltic ma la yac' cuxinuc.

⁸ Te Judá la yalbey te yan snich'ane, ja' te Onán: —Ja' x'awic'bey awinamin te yinam te anima abanquile, swenta yu'un ay me sts'umbal ya xc'ot ta awenta, jich bit'il te costumbre cu'untique —la yut.

⁹ Ja'uc me to, la sna' stojol te Onán te ma ja'uc sts'umbal ya xc'ot teme nich'naje, jich yu'un ma la sc'an yac'bey yal te yinam sbanquile. Jich yu'un te jujun buelta ya sjoin sba soque, ma mero la sc'opon sbaic ta lec, swenta yu'un ma xjajch' yal te antse, yu'un ma la sc'an ya yac'bey sts'umbal te sbanquile.

¹⁰ Te Cajwaltic ma lecuc yo'tan yu'un te bit'il jich la spas te Onán. Jich yu'un ma la yac' cuxinuc uuc.

¹¹ Jich te Judá la yalbey te yalibe, ja' te Tamar: —Ainan ta sna te atate, ma me xbaat ta ich'el. Maliya xmuc'ub te jnich'an Sela —xi'. Yu'un la yal ta yo'tan: “Ma me pajaluc ya xlaj soc te sbanquiltaque”, xi'. Jich la xch'uun te Tamar, jun yo'tan ain ta sna te state.

¹² Bayal c'aal ta patil laj yinam te Judá, ja' te yantsil-nich'an Súa. C'alal ch'ay smel-o'tan, bajt' ta Timnat ta banti ay ta joxel te stsotsil chijetique. Sjoinej bael te Hira, te adulam-winic, te mach'a jun yo'tan sba soc.

¹³ Albot yaiy te Tamar: —Ya xtal ta xjoxel stsotsil chij ta Timnat te awalib-mamale —xi' sc'oplal.

¹⁴ Jich yu'un te Tamar la sloq'ues te sc'u' slapoj swenta bit'il me'ba ants, la smuc sit ta pac', la spots sba ta rebozo swenta yu'un ma xna'bot sba a. Ba snajc'an sba ta bay yochibal lum Enaim ta bay sbelal Timnat. Yu'un yilojix te bit'il muq'uix te Sela; ja'uc me to, ma x'ac'bot yic' sba soc.

¹⁵ C'alal tal te Judá, la scuy ta jmulawil ants, te melel smucoj sit ta pac'.

¹⁶ Jich yu'un loc' ta be, ba yalbey: —¿Ya bal ac'an ya join jbajtic ta wayel? —la yut. Ma la sna'bey sba teme ja' te yalibe. Jojc'obot yu'un te antse: —¿Bi ya awac'bon a? —la yut.

¹⁷ —Ya me jticunbat ch'in alal tentsun —xi' te Judá. Albot xan yu'un te antse: —Ac'bon jilel prendal jiche —utot yu'un te antse.

¹⁸ La sjojc'obey: —¿Bi prendalil ya ac'an ya cac'bat jilel? —xi' te Judá. —Ja' xawac'bon jilel te asello soc te bila awuanej ae, soc abastón atsacoj ta ac'ab —xi' te antse. Jich te Judá la yac'bey te bitic c'anbot yu'une. Jich la sjoin sba ta wayel soc, jich la yic' yal.

¹⁹ Jajch' bael te Tamar, la sloq'ues te pac' smucoj sit a. La xcha'lap xan sc'u'-spac' ta swenta bit'il me'ba ants.

²⁰ Patil te Judá la sticun bael te ch'in tentsune. Ja' la yac'bey yic'bey bael te mach'a jun yo'tan sba soc, ja' te adulam-winique, swenta yu'un ya sujt'esbot te prendal la yac' jilele. Ja'uc me to, ma ba teyix a te antse.

²¹ La sjojc'obey te winiquetic te tey ayic a: —¿Banti bajt' te jmulawil ants ay ta Enaim te nacal ta ti'be wojchajey tele? —la yut. —Ma'yuc bay ya quiltic jmulawil ants li'to —xiic te winiquetique.

²² Jich sujt' bael, ba yalbey te Judá: —Ma ba la jtaix tey a, soc la yalbonic te winiquetic tey ayic a te ma'yuc bay yilojic jmulawil antse —xi' c'oel.

²³ La yal te Judá: —Ac'a yich' jiche, swenta yu'un ma me ayuc jq'uexlal ya xc'ot, te melel la jticunbey te tentsune; ja'uc me to, ma ba la ataix tey a —xi'.

²⁴ Oxeb u ta patil albot yaiy te Judá: —La staix smul te awalibe, ja' te Tamare. Yic'ojix yal —xi' sc'oplal. La yal te Judá: —Ic'a tel, ac'a yich' chiq'uel ta c'ajc' —xi'.

²⁵ Ja'uc me to, c'alal tal ta iq'uel te antse, la sticunbey c'op te yalib-mamale: “Te alal quic'oje, ja' yu'un te mach'a yu'un in bitic to. Na'beya sba mach'a yu'un ja' in sello to soc te bila yuanej a, soc in bastonil to”, xi' te antse.

²⁶ Te Judá la sna'bey sba mach'a yu'un, jich yu'un la yal: —Ja' mero sna'ojbey swentail stuquel te antse, te bit'il ma nix bay la cac'bey yic' sba soc a te jnich'an Sela —xi' yu'un. Ma ba la sjoin xan ta wayel.

²⁷ C'alal la sta yorail te ya x'ayin yal te Tamar, lo'alaletic te ayinique.

²⁸ C'alal yacal ta ayinel a, loc' sc'ab te jtule. Te jtam-alale la xchucbey tsajal na ta sc'ab, soc jich la yal: —Ja' neel ayin —xi'.

²⁹ Ja'uc me to, cha'sujt' te sc'abe. Ja' neel tal te yane, jich yu'un la yal te jtam-alale: —¡Bistuc tenwanat! —xi'. Jich yu'un Fares c'ot te sbiile.

³⁰ Patil ayin te sbanquil sc'oplale, te chucbil tsajal na ta sc'abe. Zara sbiil a c'ot stuquel.