Génesis 35 - Bible in Tzeltal de Oxchuc y Tenejapa

Jacob ac'bot bendición ta Betel

¹ C'oponot yan buelta yu'un Dios te Jacob: —Jajch'an, beenan, moan bael ta Betel, nainan tey a. Tey me ya xc'o apas scajtijib ta chiq'uel jmajt'an a ta bay la cac' jba ta ilel ta atojol te jo'on Dioson, te c'alal loc'at ta anel ta stojol te abanquil Esaú —xi' sc'oplal.

² Jich te Jacob la spas ta mandal mach'a jayeb ay ta sna soc te mach'a jayeb sjoineje: —Ch'ojaic loq'uel te jayeb bitic acuyojic ta Dios te awich'ojique, soc poca abaic, lapa yan ac'u'ic.

³ Jajch'ucotic ta beel ta ora, conic ta Betel. Tey me ya xc'o jpasbey scajtijib ta chiq'uel smajt'an Dios a te bit'il la scoltayon c'alal ayon ta wocole, soc la sjoinon te bayuc beenone —xi'.

⁴ Jich yu'un la stsobic te bitic scuyojic ta Dios te yich'ojic, soc te staq'uinal xchiquinique. Te Jacob la smuc jilel ta lum ta yet'al jijte' ay ta nopol lum Siquem.

⁵ Jajch'ic ta beel. Te jaychajp lum ta banti ayique, ma ba nutsotic yu'un, melel ac'bot xiwel ta yo'tanic yu'un Dios, jich ma ba nutsotic.

⁶ Te Jacob soc spisil te mach'atic sjoineje, c'otic ta lum Luz te ay ta sq'uinal Canaán, te Betel yan sbiile.

⁷ Tey c'o spasbey scajtijib ta chiq'uel milbil smajt'an a te Diose. El-betel sbiil c'ot yu'un te q'uinal te bit'il Dios la yac' sba ta ilel ta stojol tey a, te c'alal loq'uem tel ta anel ta stojol sbanquil a.

⁸ Tey laj a te Débora sbiil, te wentainot yu'un c'alal to ta yalalil te Rebeca. La smuquic ta yet'al jijte' ta nopol Betel. Te Jacob la yac'bey sbiil: “Jijte' swenta oq'uel”, xi'.

⁹ Te Dios la yac' sba ta ilel yan buelta ta stojol te Jacob te bit'il sujt'emix tel ta Padan-aram, soc la yac'bey bendición.

¹⁰ Jich la yalbey: —Jacob ta neelal te abiile, ja'uc me to ma jichuquix; Israel xi' abiil ya xc'otix —xi'. Te c'alal jelbilix sbiil a te Jacob,

¹¹ Dios la yalbey xan: —Jo'on Dioson te Spisil ya xju' cu'une; esmajan, ayuc me bayal ats'umbal. Muc'ul nación ya xc'oat, bayal me ta jpam lum ya xc'oat ta loq'uel a, bayal ta jtul ajwaliletic ya xloc' a te ats'umbale.

¹² “Te q'uinal la cac'bey sq'uinalin te Abraham soc te Isaac, ja'at me ya cac'batix aq'uinalin, soc ja' me ya cac'bey sq'uinalin te ats'umbal ta patil baele —xi' sc'oplal.

¹³ C'alal laj yo'tan ta c'op soc Dios te Jacobe, bajt' te Diose.

¹⁴ Jich yu'un te Jacob la stejc'an balal ton ta bay c'oponot yu'un te Diose. La smalbey vino soc aceite ta sba ta swenta xch'ultesel.

¹⁵ Te banti c'oponot yu'un Dios te Jacob, Betel sbiil c'ot yu'un.

Laj Raquel

¹⁶ Loq'uic bael ta Betel, ay to sc'an te ya xc'otic ta Efrata a te jajch' bayal swocol yu'un alajel te Raquel.

¹⁷ Te bit'il bayal yac ta woclajel, albot yu'un te mach'a yac ta scanantayele: —Ma xamel awo'tan, yan querem la awalatayix —xi'.

¹⁸ C'alal nopol ya xlajix a te Raquel, la slebey jilel sbiil te yale: Benoni sbiil la yac'bey jilel. Yan te state, Benjamín sbiil la yac'bey stuquel.

¹⁹ Jich laj te Raquel. La smuquic ta bay sbelal Efrata, ja' te Belén.

²⁰ Te Jacob la stejc'an jilel balal ton ta smuquenal te Raquel, asta ora yo'tic to tey teq'uel a.

²¹ Been bael te Israel, c'o stejc'an snailpac' ta bay xjejch'elul te toyol balal ts'ajc' Edar sbiile.

²² Jalaj ta nainel tey a te Israele. Jich yorail bajt' Rubén ta wayel soc te ants yic'oj yinamin stat, te Bilhá sbiile. La yaiy stojol te Israel, jich bayal ilin yu'un. Ay lajchayeb snich'nab te Jacob.

Snich'nab Jacob

²³ Te yalatac te Lea: Rubén te sba snich'an, soc Simeón, Leví, Judá, Isacar soc Zabulón.

²⁴ Te yalatac te Raquel: José soc Benjamín.

²⁵ Te yalatac te Bilhá te scriada Raquel: Dan soc Neftalí.

²⁶ Te yalatac te Zilpa, te scriada Lea: Gad soc Aser. Ja' snich'nab Jacob te ayinic ta Padan-aram.

Laj Isaac

²⁷ Te Jacob ba yil te Isaac, ja' te state, te ay ta Mamre, te lum te ja' nix sbiilinej Arba soc Hebrón. Tey nix nain te Abraham soc te Isaac.

²⁸ Te Isaac balunwinic (180) ya'wilal a te laje.

²⁹ Mamalix ta lec a, ac'bot najt' yorail yu'un Dios, ba sjoin te mach'atic neel lajemic yu'une. La yich' muquel yu'un te snich'nabe, ja' te Esaú soc te Jacobe.