Génesis 28 - Bible in Tzeltal de Oxchuc y Tenejapa

¹ Jich yu'un te Isaac la sticun ta iq'uel te Jacob. La sc'anbey bendición, soc la yalbey tulan mandal: —Ma me teyuc xale awinam ta bay yal-snich'anic te cananeoetique.

² Jajch'an, baan ta sq'uinal Padan-aram ta bay sna te amam Betuel, te stat te ame'e. Ja' x'awic' awinamin jtuluc yantsil-nich'an te awichan Labán, te xi'lel te ame'e.

³ Ac'a yac'bat bendición te Dios te Spisil ya xju' yu'une, soc ac'a yac esmajucat, bayaluc me ta jmil ac'a c'otuc ats'umbal, swenta yu'un ay me bayal ta jchajp lum ya xc'ot ta awenta.

⁴ Ac'a yac'bat soc jayeb ats'umbal te bendición la yalbey te Abraham, swenta yu'un jich me ya aq'uinalin te q'uinal ta bay nainemat te jich c'oemat te bit'il jyanlum li'to, melel la yal Dios te ya yac'bey te amam Abraham —xi'.

⁵ Jich ticunot bael c'alal ta Padan-aram yu'un Isaac te Jacob. Bajt' c'alal ta sna te Labán, ja' te yichane, te snich'an Betuel te arameo-winique. Te Labán ja' xi'lel te Rebeca te sme' Jacob soc Esaú.

Esaú la yic' xan yan ants

⁶ Te Esaú la yil te bit'il la sc'anbey bendición Jacob te state, soc te bit'il la sticun bael ta Padan-aram, swenta yu'un tey ya sle yinam a. Soc la yaiy stojol bit'il tulan mandal albot yu'un te state, te bit'il: “Ma me xale awinam ta bay yal-snich'anic te cananeoetic”, te xi' sc'oplale.

⁷ Soc la yil bit'il la xch'uunbey sc'op sme'-stat te Jacob.

⁸ Te Esaú la sna' bit'il ma lecuc yo'tan stat yu'un te cheb cananea-antsetic yic'oje.

⁹ Jich yu'un te Esaú loc' bael, ba sc'opon te Ismael te snich'an Abraham. La yic'bey yinamin te yantsil-nich'ane, ja' te Mahalat sbiil, te yijts'in Nebaiot, soc yic'oj nix te yantic antsetique.

Chicnaj Dios ta stojol Jacob ta Betel

¹⁰ Te Jacob loc' ta Beerseba, been bael ta sbelal lum Harán.

¹¹ Ay banti c'ot ta comel ta beel te Jacob, jich way tey a te bit'il malix te c'aale. La sle tel ton sts'anjolin, la smejts'an sba ta wayel.

¹² Ta swaich la yil ay jun tejc'abal jajch'em ta lum, te sbae c'oem c'alal ta ch'ulchan. Yacal ta moel coel te ch'ul abatetic yu'un Dios tey a.

¹³ Soc la yil te Dios teq'uel ta sts'eel, c'oponot yu'un: —Jo'on Dioson, Dioson yu'un te amam Abraham, Dioson yu'un te atat Isaac. Te lumq'uinal te bay metselate ya me cac'bat aq'uinalin soc ats'umbal.

¹⁴ Jich yipal ats'umbal ya xc'ot te bit'il ts'ubil lum. Soc ya me spuc sbaic ta bayuc c'alal ta stojol smalib c'aal, soc c'alal ta stojol sloq'uib c'aal soc c'alal ta stojol norte, soc c'alal ta stojol sur. Soc ta awenta soc ta swenta ats'umbal ya me x'ac'bot bendición spisil ta jchajp lum ayic ta spamal balumilal.

¹⁵ Ya me joinat spisil ora, soc ya me jcanantayat bayuc ayucat, soc ya me quic'at sujt'el li' ta bay q'uinal to. Ma ba ya jpijt'esat, ja' to teme c'ot ta pasel cu'un spisil te bila calojbate —xi' sc'oplal yu'un.

¹⁶ Wijc' sit te Jacob, la yal: “Li' ay to te Diose, ma ba la jna' stojol”, xi'.

¹⁷ Xiw yo'tan yu'un, soc la yal: “Ch'ultesbil in awilal to, melel li' ay sna te Diose, soc ja' yochibal ch'ulchan”, xi' sc'oplal yu'un.

¹⁸ C'alal sacub q'uinal, jajch' te Jacob. Te ton la sts'anjolin, la stejc'an tey a swenta señail soc la xch'ultes, la smal ta aceite, melel tey c'oponot yu'un a te Diose.

¹⁹ Betel sbiil c'ot yu'un te yawil te tone. “Sna Dios” xi' c'oem te c'asesbile; ja'uc me to, Luz sbiil ta neelal te lume.

²⁰ Jich la yal ta jamal te Jacob: “Teme yu'un ya sjoinon te Diose, soc teme ya scanantayon ta bay ya xboon, soc teme ya yac'bon jwe'el, jc'u'-jpac',

²¹ soc teme lec ya sujt'on tel ta sna te jtate, jich yu'un ja' Cajwal ya xc'ot te Diose.

²² Soc te ton te la jtejc'anixe, ja' sna Dios ya xc'ot cu'un. Soc spisil te bila ya yac'bon te Diose, ya me cac'bey jun ta slajunebal smajt'anin”, xi'.