Génesis 22 - Bible in Tzeltal de Oxchuc y Tenejapa

Prueba ta stojol Abraham

¹ Ta patil Dios la spas ta prueba Abraham teme jun yo'tan ta stojole. La yalbey: —Abraham —xi'. La sjac' te Abraham: —Li' ayon to, Cajwal —xi'.

² Albot yu'un te Diose: —Ic'a bael te jip jtul anich'an Isaac te bayal c'ux ta awo'tane, baan soc ta sq'uinal Moriah. Tey ta bay wits te ya calbate, ya me xc'o amilbon jmajt'anin te anich'an, scojt'ol me ya yich' chiq'uel ta jtojol —xi' sc'oplal yu'un te Diose.

³ Jich yu'un te Abraham buen sab a jajch' ta yan c'aal, la xchajban sburro. La yic' bael te snich'ane, ja' te Isaac, soc la sjoin bael cheb abatetic yu'un. La xch'uybey bael si'il te milbil smajt'an te Diose. Jajch'ic ta beel, bajt' ta banti albot yu'un te Diose.

⁴ Ta yoxebal c'aal sbeenel a, la stoy sit te Abraham, chicanix la yil te banti albot yu'un te Diose.

⁵ Jich yu'un la yalbey te abatetic yu'une: —Jilanic li'to soc te burroe. Ya xboon lum to soc te quereme, ya xba jc'opon Dios soc, ta patil ya sujt'on tel soc —xi'.

⁶ Te Abraham och ta sts'alel te si'il te milbil smajt'an Dios te scojt'ol ya yich' chiq'uele, la yac'bey xcuch bael te snich'an Isaaque. La stuch bael xutunte' soc scuchillo. Jich a bajt' xchebalic.

⁷ Te Isaac la yalbey te state, ja' te Abrahame: —Jtat —xi'. —¿Bila, jnich'an? —la yut. La yal te Isaac: —Ay c'ajc' soc ay cuchillo, pero ¿banti ay te chij te ya xtuun yu'un milbil smajt'an Dios te ya jchic'beytique? —xi'.

⁸ La sjac' te Abraham: —Jnich'an, Dios ya slebotic te chij ya xtuun cu'untic ta spasel te smajt'ane —la yut. Pajal yacalic ta beel bael xchebalic.

⁹ C'alal c'otic ta bay q'uinal albot yu'un te Diose, jich yu'un te Abraham la spasbey scajtijib ta chiq'uel smajt'an Dios. La xchajbanbey si'il te c'ajq'ue, la sc'ol ta chuquel te Isaac, la sjawan ta sba si' ta scajtijib te smajt'an Dios te la spase.

¹⁰ La stsac ta sc'ab te scuchillo, c'an slow a te snich'ane.

¹¹ Ja'uc me to, c'opoj te ch'ul abat yu'un te Cajwaltic ta ch'ulchan: —¡Abraham! ¡Abraham! —xi' sc'oplal. La sjac' te Abraham: —Li' ayon to, Cajwal —xi'.

¹² Albot yu'un: —Ma me xyal ac'ab, ma me xamil te quereme. La jna'ix stojol te bit'il awich'oj ta muc' ta melel te Diose, yu'un ma ja'uc la ana'bey yo'bolil sba te jip jtul anich'ane, jun awo'tan ya ac'an amilbon jmajt'anin —xi'.

¹³ Jich te Abraham la stoy sit, la sujt'es sba. La yil ay tat chij te quijc'ajem xulub ta pimil ch'ixtiquil. Ba stsac te tat chije, ja' la smilbey smajt'anin te Diose, ja' sjelol te snich'ane.

¹⁴ Te Abraham la slebey sbiil te ch'in q'uinale: “Ya slebotic spisil te bila ya xtuun cu'untic te Cajwaltique”, xi' sbiil c'ot yu'un. Jich yu'un ta ora to jich ay ta alel: “Ta wits ya yac' Cajwaltic te bila ya xtuune”, xi' sc'oplal.

¹⁵ Te Abraham cha'c'oponot xan yu'un te ch'ul abat yu'un te Cajwaltic c'alal ta ch'ulchan.

¹⁶ Jich la yal: —Yaloj te Diose: “Te bit'il jich la apas, te ma ba wocol la awac'bon te jip jtul anich'ane, jun awo'tan la awac'bon,

¹⁷ jich yu'un jelawen to xan ya cac'bat esmajuc bendición ta atojol. Jelawen to xan ya cac' esmajuc ats'umbal, jich yipal ya xc'otic te bit'il sji'al mar, soc te ats'umbale ya me stsal spisil yajcontro.

¹⁸ Ta swenta ats'umbal ya x'ac'bot bendición bayal ta jtul ta spamal balumilal, yu'un la ach'uunbon jmandal”, te xie —xi' sc'oplal yu'un.

¹⁹ Jich yu'un te Abraham sujt' bael ta bay jilem te abatetic yu'une. Jajch'ic ta beel, jich la sjoin sbaic bael, bajt'ic ta Beerseba, tey nain a te Abrahame.

Snich'nab Nacor

²⁰ Patil tal albotuc yaiy te Abraham: —Te awijts'in Nacor, tsobolix yal-snich'an soc te Milca:

²¹ Uz sbiil te banquilale, Buz sbiil te ijts'inale, Kemuel sbiil te xchebal ijts'inale, ja' te stat Aram.

²² Soc ay to yantic snich'nab, ja' te Quesed, Hazo, Pildas, Jidlaf soc te Betuel —utot.

²³ Te Betuel ja' stat te Rebeca. Jich sbiilic te waxactul snich'nab Nacor te yijts'in te Abrahame. Te sme'ique ja' te Milca.

²⁴ Soc ay yan ants la yinamin te Nacor, Rema sbiil. Ay snich'nab soc, ja' te Teba, Gaham, Tahas soc te Maacá.