Génesis 21 - Bible in Tzeltal de Oxchuc y Tenejapa

Ayin Isaac

¹ Te Cajwaltic la sna' te Sara, jich nix pasbot yu'un te bit'il albot yu'une.

² Jich la yic' yal te Sara, jich ayin snich'an te Abraham manchuc me mamalix. Jich ora ayin te alal te bit'il albot yu'un te Diose.

³ Te Abraham la yac'bey sbiil te snich'an te ayin ta swenta Sara, Isaac c'ot te sbiile.

⁴ Swaxaquebal c'aal yayinel a te Isaac te la yac'bey circuncisión te Abraham, jich bit'il albot mandal yu'un te Diose.

⁵ Jo'winic (100) ya'wilal a te Abraham c'alal ayin te snich'an, ja' te Isaaque.

⁶ Jich la yal ta yo'tan te Sara: “Dios la yac' tse'enucon yu'un, soc jich me ya xbujts'naj yo'tanic spisil mach'atic ya yaiyic stojol te ayix ch'in alal cu'une.

⁷ Ma'yuc mach'a ay ta yo'tan te ya cac'bey snich'an te Abrahame. Ja'uc me to, la to calatabey snich'an manchuc me mamalix”, xi'.

Agar soc Ismael tenotic loq'uel ta sna Abraham

⁸ Muc'ub te alal Isaac, jil xchu'. Pasbot sq'uin yu'un te Abraham te bi ora jil xchu' te Isaaque.

⁹ Te Sara la yil bit'il yac ta labanel yu'un te yal te egipcia-antse, te Agar sbiile, te alaj yu'un te Abrahame.

¹⁰ Te Sara jich la yalbey te Abraham: —Tena loq'uel te ants soc te yale, ac'a bajt'uc. Ma me xju' te pajal ya yich'bat jilel abiluc soc te cal Isaac te yal jcriada —la yut.

¹¹ Bayal la smel yo'tan yu'un te Abraham, la sna'bey yo'bolil sba te snich'ane.

¹² Ja'uc me to, c'oponot yu'un Dios te Abraham: —Ma me xamel awo'tan yu'un te querem soc te antse. Ch'uunbeya spisil bila ya yalbat te Sara, melel ja' nax ajtaybil ats'umbal ya xc'ot ta swenta te Isaaque.

¹³ Te yal te acriadae, muc'ul lum ya xc'ot uuc, te melel ja'at nix anich'an —xi' sc'oplal yu'un te Diose.

¹⁴ Ta buen sab jajch' te Abrahame. La yich' tel we'elil, soc jun yawil ja' nojel ta ya'lel te pasbil ta nujc'ul, la yac'bey xcuch bael te Agare. Soc la yac'bey ta sc'ab te yale, la sticun bael soc. Jich a bajt' te Agar, loc' bael ta melmonel ta jochol taquin q'uinal ta nopol Beerseba.

¹⁵ C'alal laj ya'lel te nujc'ule, la yijq'uitay jilel te squerem-al ta yaxinal ch'in te'.

¹⁶ Q'uejel ba snajc'an sba stuquel, yu'un jich la yal ta yo'tan: “Ma jc'an quilbey swocol ya xlaj te quereme”, xi'. Tey nacal a, jajch' ta oq'uel te quereme.

¹⁷ Ja'uc me to, Dios la yaiybey yoq'uel. Jich te ch'ul abat yu'un Dios la yawtay te Agar c'alal ta ch'ulchan: —¿Bi la apas, Agar? Ma xamel awo'tan, Dios la yaiybeyix sc'op te quereme.

¹⁸ Jajch'an, ic'a jajch'el te quereme, tulan me x'atsacbey sc'ab, yu'un muc'ul lum ya xc'ot cu'un te sts'umbale —xi' sc'oplal yu'un.

¹⁹ Jambot sit yu'un Dios te Agar, la yil te ay sloq'uibja'. Jich ba sbut'bey ya'lel te nujc'ul, ba yac'bey yuch' te Ismaele.

²⁰ Te querem joinot yu'un Dios spisil ora. Muc'ub xan, nain ta jochol taquin q'uinal. La snop smilel chambalam ta t'im.

²¹ Tey nain a ta jochol taquin q'uinal ta Parán. Te Agar la slebey yinam ta Egipto te yale.

Abraham soc Abimelec la spasic trato

²² Te Abraham jich ora tal ta c'oponel yu'un te Abimelec soc jtul yabat, Ficol sbiil, te swentainejbey te soldadoetic yu'une. Te Abimelec la yalbey te Abraham: —Jna'oj stojol te ya scoltayat Dios ta spisil te bitic ya apase.

²³ Jich yu'un albon ta stojol Dios te bit'il spisil ora ma me xacontroinon, soc jnich'nab, soc te jts'umbal ta patil baele. Te bit'il la jc'uxtayat te ja'ate, ja' ni me jich ya ac'uxtayon soc spisil te mach'atic nainemic tey ta q'uinal te banti nainemate —xi'.

²⁴ —Jichuc, jich ya cal ta stojol te Diose —xi' te Abrahame.

²⁵ Ja'uc me to, ay pozo yu'un Abraham te la spojic te abatetic yu'un te Abimeleque. Te Abraham la sc'opon yu'un.

²⁶ Jich yu'un la yal te Abimelec: —Ma jna' mach'a la spas jich, soc ma la awalbon ta ora, ja' to nax ta ora to la caiy stojol —xi'.

²⁷ Jich te Abraham la yic' tel chijetic soc wacaxetic, la yac'bey smajt'anin te Abimeleque. Jich la spasic trato ta xchebalic.

²⁸ Ja'uc me to, te Abraham q'uejel la yac' juqueb yantsilel te xchije.

²⁹ Te Abraham jojc'obot yu'un te Abimeleque: —¿Bi swentailuc te q'uejel la awac' te juqueb yantsilel achije? —la yut.

³⁰ La yal te Abraham: —Ja'at ya cac'bat amajt'anin te juccojt' yantsilel te jchije, ja' seña ya awil a te bit'il jo'on la joc' te pozoe —xi'.

³¹ Jich yu'un Beerseba sbiil c'ot te q'uinal te banti ay te pozo, yu'un tey pastaj te trato yu'unic ta xchebalique.

³² Te bit'il ju'ix ta pasel trato ta Beerseba, jich a jajch'ic ta beel te Abimelec soc te Ficol te yabat te swentainejbey te soldadoetic yu'une. Sujt'ic bael ta bay sq'uinal te filisteoetique.

³³ Te Abraham la sts'un jpejt' tamarisco-te' ta Beerseba, tey la sc'opon a te Cajwaltic Dios te stalel cuxul sbajt'el q'uinale.

³⁴ Bayal ja'wil nain ta sq'uinal filisteoetic te Abrahame.