Génesis 17 - Bible in Tzeltal de Oxchuc y Tenejapa

Circuncisión seña trato

¹ Te c'alal balunlajuneb yo'winic (99) ya'wilal a te Abram, te Cajwaltic la yac' sba ta ilel ta stojol, jich la yalbey: —Jo'on Dioson te Spisil ya xju' cu'une, toj me xawac' aba ta jtojol, ma me xapas te bila ma lecuque.

² Ya me jpas trato ta atojol te c'ax bayal me ya quesmantesbat ats'umbal —xi' sc'oplal.

³ Jich te Abram la stinan sba coel c'alal ta lum ta stojol Dios, jich c'oponot xan yu'un:

⁴ —Aiya awaiy stojol te trato ya calbate, ja' te tatil ya xc'oat yu'un bayal ta jchajp ants-winiquetic.

⁵ Ja' yu'un, Abram ma xiuquix abiil, Abraham abiil ya xc'ot, melel tatilat yu'un tsobol ta jchajp nacionetic ya xc'oat cu'un.

⁶ Ya cac' esmajuc bayal ats'umbal, soc bayal ta jchajp ants-winiquetic ya xc'oat ta loq'uel cu'un, soc bayal ta jtul ajwaliletic ya xchicnaj ta awenta.

⁷ Soc jc'axel ya jpas trato ta atojol ja'at soc jayeb ats'umbal ta patil. Swenta sbajt'el q'uinal te trato cu'un: te jo'on Dioson awu'un, soc Dioson yu'un jayeb ats'umbal ta patil.

⁸ Ya cac'bat aq'uinalin soc jayeb ats'umbal te q'uinal ta bay beenemate, ja' spamal sq'uinal te Canaán, awu'un ya xc'ot soc ats'umbal ta sbajt'el q'uinal, soc Dioson awu'unic ya xc'oon —xi'.

⁹ Albot xan yu'un Dios te Abraham: —Te ja'ate ya me awich'bon ta muc' te trato albil cu'un ja'at soc jayeb ats'umbal.

¹⁰ Jich ay te trato cu'un te ya awich'bon ta muc' ja'at soc jayeb ats'umbal ta patil: Ya me awich' circuncisión ta abaq'uetal soc spisil te winiquetic awu'une.

¹¹ Ja' me ya ajoybey loq'uel ta bojel snujc'ulel sjol te abaq'uetale, ja' me te circuncisión sbiile. Ja' seña ya xc'ot te trato albil cu'un ta atojolic.

¹² Ta swaxaquebal c'aal yayinel a, ya me yich' circuncisión spisil alalquerem awu'unic ta cajalcaj ats'umbalic, soc me te mach'a ya x'ayin ta ana, soc mach'a manbil tel ta yan lumetic ta ataq'uin te ma ats'umbaluque.

¹³ Te mach'a ya x'ayin ta ana, soc te mach'atic manbil ta ataq'uin, ya me yich' circuncisión ta puersa. Ja' seña ta abaq'uetalic te trato cu'un ya xc'ot sbajt'el q'uinal.

¹⁴ Yan te mach'a ma xyich' circuncisión, ya me yich' loq'uesel ta stojol alumal, yu'un ya xc'axintaybon te trato cu'une —xi'.

¹⁵ Soc jich albot xan yu'un Dios te Abrahame: —Te awinam Sarai, Sarai ma me xiucatix soc, Sara xi' me sbiil ya xc'ot awu'un.

¹⁶ Ya me cac'bey bendición, soc ay me awal-anich'an ya xc'oat soc. Melel me xcal, ya me cac'bey bendición. Sme' bayal ta jchajp nacionetic ya xc'ot, ya xchicnaj ta swenta bayal ta jtul ajwaliletic —xi' sc'oplal.

¹⁷ Te Abraham la stinan sba coel c'alal ta lum ta stojol te Diose. Jajch' ta tse'ej yu'un, jich la yal ta yo'tan: “¿Ban c'an taluc xan snich'an te mach'a mamalixe, te ayix jo'winic (100) ya'wilale? Soc ¿bit'il c'an alajuc te Sara, te lajuneb yo'winic (90) ya'wilale?”, xi' ta yo'tan.

¹⁸ Te Abraham la yalbey te Diose: —Ja' lec ja'uc ya awac'bey bendición ta stojol te Ismaele —xi'.

¹⁹ Ja'uc me to, la yal te Diose: —La calbat awaiy, ja' la calbat te ya me x'ayin yal te awinam Sara, Isaac sbiil ya xc'ot awu'un. Jc'axel ya jpas trato soc stuquel, swenta sbajt'el q'uinal soc te jayeb sts'umbale.

²⁰ Ja'uc me to, jich me ay sc'oplal cu'un stuquel te Ismael: Ya me cac'bey bendición uuc: ya me x'esmaj bayal. Te lajchaytul snich'nabe ajwaliletic ya xc'otic, buen muc'ul lum ya xc'ot cu'un.

²¹ Yan te Isaac jc'axel me ya jpas trato soc stuquel, ja' me te anich'an ya x'ayin ta swenta Sara ta yan ja'wil, jich ora te bit'il to —xi' sc'oplal yu'un.

²² Te Diose laj yo'tan ta sc'oponel te Abraham, jich ijq'uitayot yu'un.

²³ Jich yu'un te Abraham la yic' tel yac'bey circuncisión te snich'ane, ja' te Ismael, soc la yac'bey circuncisión spisil mach'a ayinemic ta sna soc spisil mach'a smanoj ta staq'uin. Spisil winiquetic te ay ta abatinel yu'un te Abraham, la yac'bey circuncisión ta ora nax, jich bit'il pasot ta mandal yu'un te Diose.

^24-25 Balunlajuneb yo'winic (99) ya'wilal a te Abraham te la yich' circuncisión, soc oxlajuneb ya'wilal a te Ismaele.

²⁶ Ta jun nax c'aal la yich'ic circuncisión te Abraham soc te snich'an, ja' te Ismaele.

²⁷ Ja' nix jich spisil te winiquetic ta sna, ja' spisil te abatetic te ayinemic ta sna, soc spisil te abatetic smanoj ta staq'uin, pajal la yac'bey circuncisión.