Génesis 15 - Bible in Tzeltal de Oxchuc y Tenejapa

Dios la spas trato soc Abram

¹ Patil te Abram c'oponot yu'un Dios te chicnaj ta sit yilel, jich albot: —Ma xiwat, Abram, jo'on jcanantaywanejon awu'un, muc' me amajt'an ta bay nax c'alal —xi' sc'oplal.

^2-3 Te Abram la yal: —Cajwal Dios, ¿banti ya xtuun cu'un te jmajt'an ya awac'bon te bit'il ana'oj te ma'yuc jnich'ane? Melel ma'yuc awac'ojbon jtuluc jnich'an, jich yu'un ja' ya yich'bon jilel jna jbiluc te mayordomo te Eliezer te damasco-winique —xi'.

⁴ Ja'uc me to, albot yaiy yu'un te Cajwaltique: —Ma ja'uc ya yich'bat jilel abiluc. Ja' ya yich'bat jilel abiluc te mach'a mero anich'ane —xi' sc'oplal.

⁵ Soc ic'ot loq'uel ta jamalal la yaiy yu'un te Diose: —Ila awil te ch'ulchane, ajtaya jayeb te eq'uetique, teme ya xju' awu'un yajtayele. Jich me yipal ats'umbal ya xc'ot —xi' sc'oplal.

⁶ Jich te Abram la xch'uun yo'tan te bila albot yu'un te Cajwaltique, jich bit'il toj yo'tan ilot yu'un Dios te Abrame.

⁷ Soc jich la yalbey xan yaiy: —Jo'on Awajwalon te la quic'at loq'uel tel ta Ur te ay ta sq'uinal caldeoetique, swenta yu'un ya cac'bat aq'uinalin in q'uinal to —xi' sc'oplal yu'un.

⁸ La yal te Abrame: —Cajwal Dios ¿bit'il ya jna' stojol teme jo'on ya jq'uinalin te q'uinale? —xi'.

⁹ Te Diose jich la yalbey: —Tsabon tel chambalametic te ox'oxeb ya'wilalique: jcojt' me' wacax, jcojt' tentsun soc jcojt' tat chij, soc lebon tel jcojt' puliwoc soc jcojt' stsumut te alal toe —xi' sc'oplal yu'un.

¹⁰ Jich la yic' tel spisil te bila albot yu'une. La sjat ta bojel. Te juju-jat juju-jchol la yac', jamal la yac' jilel te olilal. Yan te mutetique ma la sjat ta bojel stuquel.

¹¹ Ay la stsob sbaic tel josetic ta sba te milbil chambalametique. Te Abram la stij bael.

¹² Malix c'aal a, och swayel te Abram, c'ub ta lec. Bayal och xiwel ta yo'tan, ja' la xi' te mero pim a bajt' te yijc'al q'uinale.

¹³ Jich te Cajwaltic la yalbey: —Na'a me stojol te bit'il ya xc'ax bael ats'umbal ta bay ma slumaluc, soc ya me x'och ta mozoil, soc ya me x'och ta woclajel jbajc' (400) ja'wil.

¹⁴ Ja'uc me to, jo'on me ya cac'bey castigo te mach'atic ya smozoinwanique. Patil te ats'umbale ya me xloq'uic tel soc bayal sc'ulejalic.

¹⁵ Yan te ja'ate mamalatix a te ya xlajate, jun awo'tan ya xbaat ta muquel soc te antiguo ame'-atate.

¹⁶ Ta xchancajal ats'umbal ya xcha'talic xan li'to, yu'un ma to sts'acaj jayeb smul te amorreoetique —xi' sc'oplal yu'un.

¹⁷ Malix c'aal, ijc'ubix q'uinal a, la yil chicnaj yawil c'ajc' te ay xch'ailel, soc ay yan yac ta tilel tey a, c'axic ta yolil te chambalametic te jatbilic ta bojele.

¹⁸ Jich yorail a te Abram albot yu'un te Cajwaltic ta swenta trato: —Yu'un ats'umbal ya xc'ot cu'un in q'uinal to c'alal ta beja' yu'un Egipto, c'alal ta muc'ja' Éufrates,

¹⁹ ja' te q'uinal sq'uinalinejic te ceneoetic, cenezeoetic, cadmoneoetic,

²⁰ heteoetic, ferezeoetic, refaitaetic,

²¹ amorreoetic, cananeoetic, gergeseoetic soc te jebuseoetique —xi'.