Ezequiel 9 - Bible in Tzeltal de Oxchuc y Tenejapa

Chicnaj seña castigo ta stojol Jerusalén

¹ Patil la caiy buen tulan c'op. Awun ta xujc' jchiquin la caiy: —¡Ya xjuliquix te mach'atic ya yac'beyic castigo te lume, juju-jtul me yich'oj yat'ejibic ta sc'abic swenta lajinwanej! —xi'.

² La quil waqueb winiquetic yacalic ta ochel tel ta sti' smuc'ul yochibal te ay ta stojol norte, juju-jtul yich'ojic yat'ejib ta sc'abic. Ta yolilic yac ta talel jtul winic sc'u'inej saquil lino-pac', ay at'ejibaletic yu'un ts'ibajel ta xchujq'uil xch'ujt'. Ochic bael, c'o stejc'an sbaic ta nopol scajtijib ta chiq'uel majt'anil pasbil ta bronce.

³ Te xojobil yutsilal Dios yu'un Israel toy moel ta sba te querubínetique, tey ta yawil ta banti aye, jajch' bael, bajt' ta yochibal templo. Te Cajwaltic la yic' tel te winic sc'u'inej lino-paq'ue, te ay at'ejibaletic yu'un ts'ibajel ta xchujq'uil xch'ujt',

⁴ jich la yalbey: —Beentaya te Jerusalén, ac'beya seña ta sti'ba te mach'atic ya smel yo'tanic yu'un, te bitic ilaybil sba te yac ta c'oel ta pasel yu'un te slumalique —xi'.

^5-6 La caiy te bila la yalbey te yantic winiquetique: —Baanic t'unaic bael, baan beentayaic te lume. Jachaic jajch'el ta templo cu'un, milaic te mamaletic, queremetic, ach'ixetic, alaletic soc antsetic, ma me x'ana'bey yo'bolil sbaic. Pero ma me x'awuts'inic stuquel te mach'atic yich'oj señaique —xi'. Ja' yu'un te winiquetic ja' neel la smilic te mamaletic ayic ta elawal yu'un templo.

⁷ Patil jich la yalbey xan: —Baanic ta templo, boltesbeyaic sc'oplal: nojesaic ta amaq'uetic te mach'atic milbilique —xi'. Jich loq'uic bael, jajch' smilic ants-winiquetic ta yutil te lume.

⁸ Te c'alal jich yacalic ta spasel, jilon jtuquel. La jtinan jba coel c'alal ta lum, soc xc'uxul mel-o'tan ta co'tan awunon, jich la cal: —Cajwal, ¿ya bal at'omes bael ta stojol Jerusalén te awilimbae? ¿Ya bal alajin ta jc'axel te jteb xan israeletic jileme? —xoon.

⁹ La sjac'bon te Cajwaltic, jich la yal: —Te smul te lum Israel soc te Judá, mero muc'. Te lumq'uinal nojel ta miltomba soc nojel tey a te bila ma stojiluc ta pasel. Ya scuyic te la quijq'uitayix jilel te lumq'uinale, soc te ma ba ya quil te bitic yacalic ta spasele.

¹⁰ Ja' yu'un, ma ba ya jna'bey yo'bolil sbaic, ya me quich'bey ta wenta soc te bi yilel yat'el la spasique —xi'.

¹¹ Jich te winic sc'u'inej lino-paq'ue, te ay bael ta xchujq'uil xch'ujt' te at'ejibaletic yu'un ts'ibajele, sujt' talel, jich la yal: —La jch'uunix spasel te bila la awac'bon jpase —xi'.