Ezequiel 8 - Bible in Tzeltal de Oxchuc y Tenejapa

Ac'bot yil bitic ilaybil sba ta Jerusalén

¹ Ta swaquebal ja'wil, ta yo'ebal c'aal sjajch'el a te swaquebal u, nacalon ta jna a, soc ja' joinej tey a te principaletic ich'bilic ta muc' yu'un Judá. Ora nax la yac' tel sc'ab ta jtojol te Cajwaltique.

² Jich ac'boton quil te bila pajal soc winic yilel. Ta xch'ujt' coel c'ajc' yilel, ta xch'ujt' moel mero xlemet jichuc juxbil bronce.

³ Te winique la stoy bael te sc'ab yilele, la stsacbon te stsotsil jol. Te yip yu'el Dios la slicon jajch'el ta ic' yaiyel. Te Dios la syantesbon q'uinal caiy, la yic'on bael ta Jerusalén la caiy. C'o yac'on ta yochibal ta yutil templo, ta stojol bael norte, te banti ay te loc'omba te ya xjachbot yilimba yu'un te Cajwaltique.

⁴ Tey ay a te xojobil te yutsilal Dios yu'un Israel, jich te bit'il la quil te c'alal yanajem q'uinal la caiy ta muc'ul spamleje.

⁵ Jich la yalbon: —Ac'a bael asit ta stojol norte —xi'. La cac' bael jsit ta norte, ta yochibal templo ta nopol sti' te ya xbajt' ta stojol te scajtijib ta chiq'uel majt'anil, la quil te loc'omba te ya xjachbot yilimba yu'un te Cajwaltique.

⁶ La yalbon xan: —¿La bal awil te bitic ilaybil sba yacalic ta spasel te israeletique, te ja'ic te ya yac'bon quijq'uitay te ch'ul templo cu'une? Ya to me awil xan yantic te c'axem xan jich amen a —xi'.

⁷ La yic'on xan bael ta yochibal yamac'ul templo. La quil ay banti jutul te sts'ajc'ule.

⁸ Jich la yalbon: —Muc'tesa te banti jutul te ts'ajq'ue —xi'. Te jo'one la jmuc'tes te banti jutul te ts'ajq'ue, tey ochon a.

⁹ Jich la yalbon: —Ochan, ya me awil te bitic mero ilaybil sba te yacalic ta spasele —xi'.

¹⁰ Ochon bael, ta spisil snajt'il bael te ts'ajq'ue, la quil tey loc'taybilic ta c'abal spisil ta jchajp a te chambalametic staslajan ya xbeenic ta lume, soc nix yantic chambalametic te amen sc'oplalic, soc spisil ta jchajp te bitic cuybil ta Dios yu'un Israel.

¹¹ Lajuneb xchanwinic (70) principaletic ich'bilic ta muc' ta Israel te yacalic xch'uunele. Te jtule ja' te snich'an Safán te Jaazanías sbiile. Ta juju-jtul stsacojic xchic'jibal spomic, te yac ta jajch'el moel ta stojolic te loc'ombaetic te jich bit'il tocal te xch'ailel spomique.

¹² La yalbon xan: —¿Ya bal awil te bila muquen ya spasic te principaletic yu'un te israeletique? Ta juju-jtul ay yawil sloc'ombaic ta ch'ujt' pajc' yu'unic. Ya scuyic te ma ba yacon ta yilele, soc te la quijq'uitayix te lumq'uinale —xi'.

¹³ Soc la yalbon xan: —Ya to me awil xan yantic te bila mero ilaybil sba ta pasel yu'unic —xi'.

¹⁴ La yic'on bael ta sti' yochibal te templo yu'un Cajwaltic, te ay ta stojol norte. Tey nacajtic antsetic a, yacalic ta oq'uel ta stojol te cuybil ta Dios yu'unic te Tamuz sbiile.

¹⁵ La yalbon: —¿Ya bal awil in to? Ya to me awil xan yan te c'axem to xan amenic a —xi'.

¹⁶ Jich la yic'on bael ta yamac'ul ta yelaw te templo yu'un Cajwaltique. Ta yochibal te ch'ul templo, ta yolil te yochibal soc te scajtijib ta chiq'uel majt'anile, ay jo'eb xcha'winic (25) winiquetic te swalac'patiyejic te ch'ul templo. Tinajtic bael ta stojol ta banti ya xloc' tel c'aal, yac'ojbey sta lum te sti'baique, yacalic ta xch'uunel te c'aale.

¹⁷ Te Cajwaltic la yalbon: —¿La bal awil? Ma tic'uc ya yaiy a te lum Judá te bitic yacalic ta spasel te ilaybil sbae, la to snojesic xan ta bitic amen a te lumq'uinale. Tal yac'bonic xan yich' yip quilimba, te ya yaq'uic te ya xjul stuil ta jni'e.

¹⁸ Pero ya me x'at'ejon soc te quilimbae, ma me ba ya jna'bey yo'bolil sbaic ta jc'axel. Manchuc me ya sc'opononic ta aw, pero ma ba ya jac'bey te sc'opique —xi' te Cajwaltique.