Ezequiel 7 - Bible in Tzeltal de Oxchuc y Tenejapa

Ya xtalix te woclajele

¹ Te Cajwaltic la sc'oponon, jich la yalbon:

² —Jo'on Ajwalilon ya calbey te lum Israel: La staix yorail te slajibale, la staix yorail ya yich' lajinel ta spamal te lumq'uinale.

³ La staix yorail te ya xlajat, Israel. Ya me jt'omes tel ta atojol te quilimbae. Ya me quich'batix ta wenta te awat'ele, chican te bila beil at'unoje, soc ya me cac'batix castigo yu'un ta spisil te bitic apasoj te mero ilaybil sbae.

⁴ Ma me ba ya jna'batix yo'bolil aba. Ya me cac'batix castigo yu'un te bila beil at'unoje; ya me cac'bat atoj te bila mero ilaybil sba apasoje. Ya me ana'ic te jo'on Ajwalilone.

^5-6 “Jo'on Ajwalilon te jich ya cale: Aiya awaiy, nopolix te slajibale. Ya me xtal wocol, soc ya me xtal te bila amen ta atojol. Nopolix ya xtal ta atojol te slajibale.

⁷ Yajwal lumq'uinal, ya me xtalix alajinel. C'otix yorail, nopolix te sc'aalelal te ma x'ana'ix te bila ya apase. Ya me xlajix te yutsil awo'tan ta stojol te witsetique.

⁸ Yo'tic ya me cac' t'omuc tel ta atojol te quilimbae, ja' to teme lamaj te quilimba awu'une. Ya me cac'bat castigo, chican te bila beil at'unoje, ya cac' c'otuc ta atojol castigo ta scaj te bitic ilaybil sba apasoje.

⁹ Ma ba ya xtalix xc'uxul co'tan, ma'yuquix perdón ta atojol. Te bila beil at'unoje, ja' ni me ya xc'ot ta awenta. Ya me xc'ot ta awenta te bila ilaybil sba la apase. Ya me ana'ic te jo'on Ajwalilon te ya cac'beyex castigo.

¹⁰ “¡Li' ayix te sc'aalelale! ¡Julix tel! ¡Julix tel te lajinele! Te bila amen ya me stsalawan ta atojolic ta bayuc. C'ot meix ta atojol te uts'inele.

¹¹ Te uts'inele chicnajemix, soc esmajemix yu'un te bila amene. Pero ma me ayuc bila ya xju' yu'un spasel soc te sc'ulejale, soc te bayal awetic yu'une. Ma'yuquix bila ay sc'oplal tey a.

¹² C'otix yorail, talix te sc'aalelale. Ni ja'uc te jchonbajel ay bi ya smulane, soc ni ja'uc te jmanbajel te ay bi ya smel yo'tan yu'une. Ya me cac'bey castigo ta stojol spisil te israeletique.

¹³ Te mach'a ay bila la xchon, ma'yuc bi ora ya yich' xan, soc ma'yuc bi ora ya xcha'chon xan te bila chonbilix yu'une. Te mach'atic amen yo'tanic ma xju' ya scanantay te xcuxlejale.

¹⁴ “Ya x'oq'uesinot oq'ues swenta iq'uel ta guerra. Spisilic ya xchajban sbaic, pero ma'yuc mach'a ya xloc' ta yaq'uel guerra. Ya me cac'bey castigo soc quilimba te c'ax stoyoj sbaic te Israele.

¹⁵ Ta pat lum ay guerra, ta yutil ay chamel soc wi'nal. Te mach'atic ayic ta sc'alic, ya me xlajic ta guerra. Te mach'atic ayic ta yutil lum, ya me xlajic yu'un wi'nal soc chamel.

¹⁶ Manchuc me ay ya xcolic ta anel ta witstiquil, jich te bit'il ya xbajt' ta anel ta witstiquil yu'un xiwel te stsumutetique, pero spisil me ya xlajic ta scaj te smulique.

¹⁷ Ta spisilic ya xlaj yip te sc'abique, soc ya me xnijc' yu'un xiwel te yacanique.

¹⁸ Ya slapic ch'ixal pac'. Ya me xnijc' ta scojt'ol te sbaq'uetalique. Te c'alal ya xbajt'ic ta anele, ya me stsajub bael yelawic yu'un q'uexlal, soc ya me sloq'ues te stsotsil sjolique, t'axal me ya xjil.

¹⁹ Ya me xch'ojic ta calle te plata yu'unique; ya me xch'ayic jichuc c'a'pal te oro yu'unique. Ni oro ni plata yu'unic ma xju' ya xcoltayotic yu'un, te c'alal ya xc'ot sc'aalelal te yilimba te Cajwaltique. Ma xju' ya xlamantesbot swi'nalic yu'un, ma xju' ya xnojesbot xch'ujt'ic yu'un, melel ja' nix ta scaj a te oro te yalic ta mulile.

²⁰ Ta scaj st'ujbilal te oro soc plata yu'unic, te noj ta yo'tanic te bitic ma'yuc swentaile, ja' la spas a te ilaybil sba loc'ombaetic yu'unic te cuybil ta Dios yu'unique. Ja' yu'un jo'on la jc'atp'unbeyiquix ta c'a'pal te oro soc plata yu'unique.

²¹ Ya me cac' taluc jyanlumetic te ya xtal yelc'anic baele. Ac'a me taluquic te mach'atic mero ma'yuc sc'oplal ta o'tanil ta lumq'uinale, ac'a yich'ic pojbeyel yu'unic, ac'a sboltesic.

²² Ya me quijq'uitay jilel te lumq'uinal in to, ya me cac' te ya sboltesbonic te templo cu'un, te ja' te c'ulejalil cu'une. Ya me xtal j'eleq'uetic, ya me sboltesic.

²³ “Pasa jun cadena, melel te lumq'uinal nojel ta mulil swenta smalel ch'ich', te lume nojel ta j'uts'inwanejetic.

²⁴ Ya me cac' taluc te mach'atic mero amen yo'tanique, ya xtalic ta pojbeyel te naetic yu'un te yajwal lume. Ya me cac' ch'ayuc te stoybail te mach'atic muq'uique. Ya me cac' bolobuc te ch'ul awilaletic yu'unique.

²⁵ Ya me x'u'uninot yu'un te xiwele. Ya me sleic te lamal q'uinal, pero ma me ba ya staic.

²⁶ Ma me xquejch'aj wocol ta stojolic; xtal xc'ax ya xjul ta stojolic te amen c'opetique. Tojol me ya yac' swocolic ta sleel j'alwanej yu'un Dios, te yu'un ay bila ya x'ac'bot sna'ic yu'une. Ma me ayuc sacerdoteetic te ya xju' ya xp'ijubtesotic yu'une. Soc ma me ayuc principaletic te ya yich'ic tojtesel yu'unique.

²⁷ Te muc' ajwalil ya me spotsbot yo'tan yu'un mel-o'tan; te yajwal lum ya me xjajch' ta nijq'uel yu'un xiwel. Jich me ya jpasbey te bit'il ya snujp'in sba soc te yat'elique. Jich ni me ya jchajbanic te bit'il ya xchajbanwanique. Jich me ya sna'ic te jo'on te Ajwalilon —xi'.