Ezequiel 6 - Bible in Tzeltal de Oxchuc y Tenejapa

Ezequiel la yal te amen ta ch'uunel te lotil diosetique

¹ Te Cajwaltic la sc'oponon, jich la yalbon:

² —Ja'at winic, ac'a bael asit ta stojol te witsetic yu'un Israel, c'opojan ta stojolic ta jwenta,

³ jich xawalbey: “Aiya awaiyic, witsetic yu'un Israel, te bila ya yalbeyex te Cajwaltique, ja'ex witsetic, tseletic, muc'ja'etic soc spamlejetic: Ya me cac' taluc ta atojolic guerra, ya me yich'ic lajinel te toyol ch'uunjibaletic awu'un.

⁴ Ya me jwuy te scajtijib ta chiq'uel smajt'an awu'unic, te banti ya awac'beyic milbil smajt'an soc te banti ya achic'beyic spome. Soc ya me cac' te ya xlajic ta milel te mach'atic nainemic ta atojol, ya me cac' xlajic ta stojol te loc'ombaetic cuybil ta Dios yu'unique.

⁵ Ya me jch'ojbey bael sbaq'uetalic te israeletic ta stojol te loc'omba cuybil ta Dios yu'unique. Ya jpucbey bael sbaquelic ta sjoyobal te scajtijib ta chiq'uel smajt'an yu'unique.

⁶ Ta spisil te banti nainemexe, te lumetic ya me yich'ic lajinel, soc te toyol ch'uunjibaletic ya me yich'ic busanel ta jinel. Te scajtijib ta chic'beyel smajt'an awu'unic jc'axel me ya yich'ic jinel ta spisil, soc ya me yich'ic wuyel ta jc'axel te loc'ombaetic awu'unique, soc te scajtijib ta chic'beyel spom awu'unique ya me yich'ic wuyel. Ta spisil te bila apasojique, ya me yich'ic lajinel ta jc'axel.

⁷ Te c'alal ya awilic yacalix ta lajel bayal alumalic ta awolilic, ya me ana'ic te jo'on Ajwalilon te jich ya jpase.

⁸ Pero ya me cac' te ay ma ba ya xlajex, te cuxul ya xjilexe, ya me xpujq'uex bael ta yantic nacionetic.

⁹ Te mach'atic colic jilel ta lajele, ya me sna'onic te c'alal pujq'uemic ta nacionetique. Ya me xtal ta yo'tanic te bit'il la cac'bey swocolic ta scaj te ma junuc yo'tanic ta jtojole, soc ta scaj te la yijq'uitayon ta yo'tanique, te jajch' xch'uunic te lotil diosetique. Ja'ic ni me ya xjajch' yilayic ta patil te amen yat'elic la spasique, soc ta spisil te bitic ilaybil sba la spasique.

¹⁰ Ma tojoluc la calbey yaiyic te ya cac'bey ta stojolic te bitic amene, jich nix c'ot a. Jich me ya sna'ic te jo'on Ajwalilone”, uta me —xi'.

¹¹ Te Cajwaltic jich la yalbon: —Pac'ulaya ac'ab, soc pumilaya awacan swenta seña mel-o'tan. Awunan ta tulan, jich me xawal: “¡Ya me yil swocol te lum Israel yu'un te yat'el te mero ilaybil sbae!” uta me. Melel ya me xlajic yu'un guerra, ya me xlajic yu'un wi'nal soc chamel.

¹² Te mach'atic c'ubul ayique ya me xlajic yu'un bayal chamel; te mach'atic nopol ayique ya me xlajic ta guerra; te mach'atic cuxulic ya xjile, ya me xlajic yu'un wi'nal. Jich me ya xlaj yip te quilimba ta stojolique.

¹³ Te bi ora ya yilbeyic te sbaq'uetalic te ants-winiquetic te tixajtic ta banti ayic te loc'ombaetic yu'unique, soc ta sjoyobal te scajtijib ta chiq'uel majt'anil yu'unic, ta toyol tseletic, ta ba witsetic, ta ye'tal te'etic te buen yaxique, ta ye'tal jijte'etic te bayal yaxinale, soc ta yawil te banti la yac'beyic smajt'anin buen lequil perfume te lotil diosetique, jich me ya sna'ic te jo'on Ajwalilone.

¹⁴ Ya me jtoy jc'ab ta yaq'uel castigo ta stojolic, ya xjajch' ta jochol taquin q'uinal ta sur, ya xc'ot c'alal ta lum Ribla ta stojol norte. Ja' me te slum-sq'uinalic soc spisil te banti nainemic, ya me jc'atp'unbeyic ta jochol taquin q'uinal te mero xiweltic sbae. Ja' me yorail ya sna'onic a te jo'on Ajwalilon te jich ya jpase”, uta me —xi' te Cajwaltique.