Ezequiel 5 - Bible in Tzeltal de Oxchuc y Tenejapa

¹ Te Cajwaltic jich la yalbon: —Yo'tic, winic, tsaca jun cuchillo te bueno ay ye, te ja' pajal soc te xilete. Joxa loq'uel a te stsotsil ajol soc te awisime. Tsaca ta ora jun báscula, oxtom xaloq'ues ta p'isel a te stsotsil ajole.

² Te bi ora ya xlaj te guerra ta stojol te lume, chic'a jtomuc te stsotsil ajol ta yolil te lume. Patil ya me atsac jun cuchillo, set'a xan jtomuc te stsotsil ajol ta sjoyobal sti'il te lume. Te jtom xan ya xjile, puca bael ta ic'. Te jo'one ya me xboon ta spat ta smilel ta puñal te winiquetic ta lume.

³ Tsaca jtebuc te stsotsil ajol, chuca ta sti'il ac'u'.

⁴ Tsaca xan jtebuc, ac'a ochel ta c'ajc' swenta yu'un ya xlaj ta c'ajq'uel. Tey me ya xloc' tel c'ajc' swenta yuts'inelic a te israeletique.

⁵ “Jo'on Ajwalilon te jich ya cale te ja' sc'oplal Jerusalén. Jo'on la cac' ta yolil te yantic lumetic te ayic ta sjoyobale.

⁶ Pero te yajwal la stoy sbaic, ma ba la xch'uunic spisil te mandaliletic cu'une, c'axem jich amenic a te bit'il te yantic lumetic ayic ta sjoyobale, melel la sp'ajic spisil te mandaliletic cu'une, soc ma la xch'uunbonic spasel.

⁷ “Ja' yu'un jo'on Ajwalilon, jich ya cal: Te ja'exe mero tulan awo'tanic ya awac' abaic, c'axem jichex a te bit'il yantic lumetic te ayic ta ajoyobalique, ma ba la ach'uunbonic spasel te mandaliletic cu'une. Ni ja'uc ju'em awu'unic xch'uunel te mandaliletic yu'unic te lumetic ayic ta ajoyobalique.

⁸ Ja' yu'un jo'on Ajwalilon jich ya cal: Ja' nix jichon ya me x'ochon ta acontro, ja'at Jerusalén. Ya me cac' c'otuquix ta atojol te castigo ta comonsitil yu'un te yantic nacionetique.

⁹ Ma'yuc jich jpasojbat, soc ni ma'yuc bi ora ya jpasbat yan buelta. Ja'at nix, ta scaj te buen amen te awat'ele.

¹⁰ Ta awolil ay me ya sti' yal-snich'anic te me'il-tatiletique, soc ay me alnich'anetic ya sti'ic te sme'-statique. Ya me cac' c'otuc ta pasel ta atojol te castigo. Te mach'atic cuxulic ya xjile, ya me jpuc bael ta xchanxujc'ul balumilal.

¹¹ Jo'on Ajwalilon te jich ya cal ta jamal swenta bit'il cuxulon, melel la aboltesbonic te ch'ul templo cu'une, ta scaj te loc'ombaetic soc ilaybil sba te awat'elique. Ja' yu'un ya me jlajinex, ma me ba ya jna'beyex yo'bolil abaic.

¹² Ya me xlaj jun ta yoxebal ta c'ajc'al chamel te alumale, soc ya me xchamic ta wi'nal ta yutil alumal. Jun xan ta yoxebal ya me xlajic ta milel yu'un te contro ya xtal ta sjoyobale. Te yan jun xan ta yoxebal jileme, ya me jpuc bael ta xchanxujc'ul balumilal. Te jo'one ya me xboon ta spatic soc jpuñal ta smilel.

¹³ Ya me jt'omes bael ta atojolic te sc'ajc'al co'tane. Ya me cac' te ya xc'ot spisil tey a te quilimba, tic' me ya yaiyic. Teme la cac' bael ta stojolic te quilimbae, ya me sna'ic te jo'on Ajwalilon te ma smulan co'tan te q'uejel ayix te yo'tanique.

¹⁴ Jo'on me ya jinat, ya me jbusanat ta jinel, ja'at Jerusalén. Ya me cac' pejc'ajanic ta stojol te lumetic ayic ta ajoyobale, swenta yu'un ya yilic te mach'atic ya xc'axique.

¹⁵ Te bi ora ya cac' c'otuc ta pasel ta atojol te sc'ajc'al co'tane, tulan castigo me ya xc'ot ta atojol, mach'auc nax me ya sbalat ta utel soc ya yil-o'tantayat, soc ya me xtal tulan xiwel ta yo'tan uuc te lumetic ayic ta ajoyobale, ta scaj te ya yilbeyex awocolique. Jo'on Ajwalilon te jich caloje.

¹⁶ Jo'on me ya cac' tel wi'nal ta atojolic, pajal me soc te buen tulan yat'ejibalul t'imalte', te mero tulan yip ya xlajinwane. Jc'axel me ya cac' taluc ta atojolic te lajele, ya me xtal wi'nal, soc ma me xwejt' te bila ya awe'ique.

¹⁷ Jc'axel me ya cac' tel wi'nal ta atojolic, chamel soc lajel, soc jti'awal chambalametic te ya slajinbeyex awal-anich'nabique. Ya me cac' te bayal ya xlajex ta guerra. Jo'on Ajwalilon te jich caloje —xi'.