Ezequiel 4 - Bible in Tzeltal de Oxchuc y Tenejapa

Ezequiel la yalbey sc'oplal guerra ta stojol Jerusalén

¹ Soc jich la yal xan te Cajwaltique: —Ja'at winic, tsaca jun adobe, ac'a ta atojol, pasbeya sloc'ombail tey a te lum Jerusalén.

² Ta sjoyobal pasbeya sloc'ombail soldadoetic tey a, soc at'ejibaletic yu'un guerra. Busanbeya lum ta sjoyobal te banti ya snac' sba te scontroe, soc busanbeya smoibalul ta spat te sjoyob ts'ajc'ul te lume, swenta yu'un jich me ta ilel te bit'il lum te yich'oj joytayel yu'un scontroe.

³ Ya me atsac jun lejch'el-taq'uin ya awac' ta awolil soc te sloc'ombail lum Jerusalén, jich yilel te bit'il joyob ts'ajq'ue. Ya atejc'an aba ta elawal yu'un te lume, jich yilel te bit'il ya awac'bey guerra. Ja' me seña ya xc'ot ta stojol te israeletique.

⁴ “Te ja'ate ya me amejts'an aba ta q'uexen, ya me acuchbey smul te lum Israele.

⁵ Ya xjalajat ta metslej lajuneb ma xloc' jbajc' (390) c'aal tey a. Te jujun c'aale, jujun me ja'wil c'oem yu'un te smul Israele.

⁶ Te c'alal ya xts'acaj awu'un te sc'aalelal ya me amejts'an aba ta awa'el. Ya me awac' c'otuc ta atojol te smul Judá cha'winic (40) c'aal, jujun c'aal swenta jujun ja'wil mulil c'oem.

⁷ Ya me awac' bael asit ta stojol Jerusalén, joytaybil ta contro. Ya me at'axan te ac'abe, ya me xc'opojat ta jwenta ta stojol, swenta scontroinel.

⁸ Aiya me awaiy, ya me jchucat ta lazo, swenta yu'un ma ba ya atij aba a, ja' to teme ts'acaj te jayeb c'aal yacat ta wocole.

⁹ “Ich'a jtebuc trigo, cebada, mijo, avena, haba soc lenteja. Capa spisil ta jun nax oxom, pasa waj a. Ja' me ya awe' ta xc'axel te lajuneb ma xloc' jbajc' (390) c'aal te metselat ta q'uexene.

¹⁰ Ya me ap'isbey yorail te ya xwe'ate, jun cuarto kilo te ya xju' ya awe' ta jujun c'aale.

¹¹ Ja' nix jich te ja'e, ya me ap'isbey yorail te ya awuch'e, ja' nax me te olil litro ta jujun c'aale.

¹² Te awe'ele ja' me te jpejch' cebada, tac'ajtesbil ta sc'aal stsa' ants-winique. Tey me ya apas a te banti ya yilat te alumale —xi'.

¹³ Ora c'opoj xan te Cajwaltique, jich la yal: —Jich me amen we'elil ya swe'ic te israeletic ta nacionetic te banti ya cac' bael ta nainele —xi'.

¹⁴ La jac'bey te jo'one: —Pero Cajwal, te jayebix c'aal te cuxulon ta q'uinale, ma'yuc bi ora jpicoj te bila amene. Soc ma'yuc bi ora jti'ojbey sbaq'uetal chambalam te stuquel nax lajeme, o ja' te chambalam yich'oj milel yu'un yantic jti'awal chambalame. Jc'axel ma'yuc bi ora jpasoj caiy prueba sbaq'uetal chambalam te bolobene —xoon ta stojol.

¹⁵ Jich la yalbon: —Bueno, jichuc, ya xju' ya atuuntes stsa' wacax, ma x'atuuntes stsa' ants-winic yu'un ya atac'ajtes a te awaje —xi'.

¹⁶ Patil jich la yalbon: —Ya me cac' bael wi'nal, ma me ayuc bayal we'elil ta Jerusalén ya xc'ot. Te we'elil yu'un juju-jtul p'isbil nax me, te ants-winiquetic ay me swocolic a ya xwe'ic. Te ja'e p'isbil me ya yuch'ic, soc ay me swocolic ta xiwel a ya yuch'ic.

¹⁷ Ma me xwejt' bayal ja' soc we'elil yu'unic, soc talel c'axel me ya yil sbaic te ay swocolic yu'un xiwele. Ta scaj smulic, cuxulic me a ya xjajch'ic ta c'a'el —xi'.