Ezequiel 3 - Bible in Tzeltal de Oxchuc y Tenejapa

¹ Jich la yalbon: —Ja'at winic, we'a te ts'ibubil jun in to, ora me ya xba ac'opon te nación Israele —xi'.

² La jam que, jich la yac'bon jwe' te ts'ibubil june.

³ La yalbon xan: —Bic'a te ts'ibubil jun ya cac'bate, nojesa ach'ujt' a —xi'. Te jo'one la jwe', mero chi' la caiy jichuc chab.

⁴ Jich la yalbon: —Baan, albeya te lum Israel te bila ya jc'an ya calbeye.

⁵ Ma ba ya jticunat bael ta stojol lum te mero chujc'ul sc'ope, o te ma chicanuc ta aiyele, melel ja' ya jticunat bael ta stojol te lum Israele.

⁶ Ma ba ya jticunat bael ta stojol nacionetic te mero bayalique, te mero chujc'ul ya xc'opojic te ma xju' awu'un sna'beyel swentaile. Te yacuc jticunat bael ta stojolic te yantic nacionetic, ya me yich'bat ta muc' ac'op te jichuque.

⁷ Yan te lum Israele, ma ba ya sc'an ya yich'bat ta muc' ac'op, melel ma sc'an ya yich'onic ta muc' jo'on. Ta spisil te lum Israel mero tulan yo'tanic soc mero tulan te sjolique.

⁸ C'ax tulan me asit-awelaw ya cac'at uuc, jich te bit'il stuquelique.

⁹ C'ax tulan me ya xc'oat cu'un, jich me ya xc'oat cu'un te bit'il stulanil te diamante, soc c'axem atulanil a te bit'il te tone. Ma me xiwat ta stojolic, soc ma me xnijc' awo'tan yu'un te bi yilel ya spas sitic ta atojole, manchuc teme mero tulan ya yac' sbaique —xi'.

¹⁰ Patil jich la yalbon: —Aiya me awaiy ta lec spisil te bila ya calbate, soc ac'a me ta awo'tan.

¹¹ Baan ila awil ta spisil te alumal te ic'otic bael ta mosoile. Manchuc me ya yich'at ta wenta o ma'uc, pero jich me xawalbey yaiyic: “Jich ya yal te Cajwaltique”, xaat me ta stojolic —xi'.

¹² Te yip yu'el te Diose la sjachon jajch'el. Ta jpat la caiy ay chicnaj buen tulan c'op te jich la yal: —¡Albeya yutsilal te Cajwaltic te ay ta ch'ulchane! —xi'.

¹³ Jich ta aiyel la caiy te sc'op te xiq'uic te bila cuxajtic te ya sta sba soc te yantique, soc nix te sc'opic te ruedaetic yu'unique, jich sc'opic te bit'il tulan te nijq'uele.

¹⁴ Te yip yu'el te Dios la sjachon jajch'el, la sloq'ueson tey a. Pero yacon ta mel-o'tan bael, soc jchajp la caiy a te co'tane, pero te Cajwaltic tulan la stsacon ta sc'ab.

¹⁵ C'oon ta lum Tel Abib ta sti'il te muc'ja' Quebar, te banti nainemic te israeletic te ic'otic bael ta mosoile. Juqueb c'aal jalajon tey a, ma ba la jna' bila ya sc'an ya jpas, soc ma ba la jna' bila ya sc'an ya cal.

Dios la yac' ta j'il-q'uinal Ezequiel

¹⁶ C'alal c'ax te juqueb c'aale, tal ta jtojol te Cajwaltic, jich la yalbon:

¹⁷ —Ja'at winic, jo'on la cac'atix ta j'il-q'uinal yu'un lum Israel. Teme ay ya calbat c'ope, ya sc'an te ya awalbey yaiyic te bila ya calbate, swenta yu'un jich me ya xjultesbot yo'tanic a.

¹⁸ Teme repente ay ya calbey sc'oplal yu'un ya xlaj jtul mach'a amen yo'tan, pero teme ma ba ya ac'opone soc teme ma ba ya awalbey yaiy te ya yijq'uitay te amen yat'ele swenta jich ya xju' ya xcuxin xane, ya me xlaj yu'un te smule, pero ja'at me ya quich'at ta c'op yu'un.

¹⁹ Pero teme ya awalbey te mach'a amen yo'tane, teme ja' nix ma la sc'an la yijq'uitay te amen yat'ele, jich me ya xlaj yu'un te smule, pero ya me xcuxinat te ja'ate.

²⁰ Soc teme repente ay winic te toj yo'tane, pero teme ay la yijq'uitay te toj-o'tanile, teme ja' jajch' spas te bila amen ta pasele, teme la cac' ta swenta lajel yu'une, teme ma ba la awalbeye, ya me xlaj yu'un te smule. Ma me ba ya quich'bey ta wenta te bila lec la spase, puersa me ya xlaj yu'un te smule, pero ja'at me ya quich'at ta c'op yu'un te ya xlaje.

²¹ Pero teme la awalbey te winic te ma lecuc te ya sle smule, teme jich la yijq'uitay sleel smule, ya me xcuxin xan, melel la yich' ta muc' te bila la awalbeye. Jichat uuc ya me xcuxinat —xi'.

Uma'ub Ezequiel

²² Te Cajwaltic la yac' tel sc'ab ta jtojol, jich la yalbon: —Jajch'an, loc'an bael ta spamlej, tey me ya jc'oponat a —xi'.

²³ Jich jajch'on bael, loc'on bael ta spamlej. Tey la quilbey xojobil yutsilal a te Cajwaltique, jich nix te bit'il la quilbey ta sti'il muc'ja' Quebar. La jtinan jba coel c'alal ta lum.

²⁴ Pero te yip yu'el te Diose la yu'uninon, la yac' tejc'ajucon. Jich te Cajwaltic la sc'oponon, jich la yalbon: —Baan maca aba ta ana.

²⁵ Ya awich' c'olel ta lazo, swenta yu'un jich me ma ba ya xloc'at soc ma ba ya ajoin a te alumale.

²⁶ Soc ya me cac' te ya slap' sba ta yutil awe' te awaq'ue, uma' me ya xjilat. Ma me xju' ya xcomawanat ta stojolic, manchuc me mero tulan yo'tan te lume.

²⁷ Pero teme ay bi ya jc'an ya calbate, ya cac' xc'opojat, jich me ya awalbey ta stojolic: “Jich ya yal te Cajwaltique”, xaat me ta stojolic. Te mach'a ya sc'an ya yaiy stojole, ac'a yaiy; pero te mach'a ma sc'an ya yaiy stojole, ma me xyaiy stojol. Melel mero tulan yo'tan ya yac' sba te lume —xi' te Cajwaltique.