Ezequiel 22 - Bible in Tzeltal de Oxchuc y Tenejapa

Jmilawaletic te lum Jerusalén

¹ Te Cajwaltic la sc'oponon, jich la yalbon:

² —Ja'at winic, ya me awal mandal te bila castigoil ya xc'otix ta stojol te jmilawal lume. Ya me awalbey ta jamal spisil te bitic ilaybil sba spasoje.

³ Jich me ya awalbey: “Jich ya yal te Cajwaltique: ‘Ja'ex yajwal lum te ya amil abaique, soc te ya apas loc'ombaetic te ya sboltesexe. ¡Ya xc'otix aworail!

⁴ Ja' amulinejic te la amilic yantic, soc ja' amulinejic te la apas awajcananique, te ja' la sboltesexe. Ja'ex nix ya awac' noptsajuc aworailic, soc ja'ex nix ya awac' sta yorail te slajibal c'aal awu'unique. Ja' yu'un, jo'on me ya cac' te ya x'ochex ta bolc'optayel yu'un te lumetic, ta spisil te nacionetic ya me x'och slabanex.

⁵ Te mach'atic nopol aye soc te mach'atic c'ubul ayic ta atojolique, ya me stse'luyex. Ja'ex muc'ul lumex pujq'uem ac'oplalic ta scaj te awajcananic, soc ta scaj te xyal xmo awo'tanique.

⁶ Tey ayic a te ajwaliletic yu'un Israel te nainemic ta awolilic, te ya spasic bayal ta jchajp miltombae.

⁷ Te alumale ma xyich'ic ta muc' te sme'-statique, ya yuts'inic te jyanlumetique, ya yac'bey swocol te me'ba alaletique soc te me'ba antsetique.

⁸ Ma xyich'bonic ta muc' te ch'ul awilaletic cu'une, ni ja'uc ya yich'bonic ta muc' te sc'aalelal cux-o'tanil cu'une.

⁹ Ay ya spasic lot swenta jich ya x'ac'ot ta lajel yu'un a te yantique. Ay ya xwe'ic-x'uch'ajic ta witsetic ta yich'el ta muc' te loc'ombaetique. Ay ya spasic te bitic mero ilaybil sbae.

¹⁰ Ay mach'a ya yantsin xcha'me', soc ya sta sba soc yinam te c'alal ya yil xchamel swenta jujun u.

¹¹ Ay mach'atic ya spas mulwej soc te spat-xujq'ue, ay mach'a ya yantsin yalib, te mero q'uexlaltic sbae, ay mach'a ya yantsin te mach'a jun stat soque.

¹² Te alumale ay ya xchon sbaic yu'un ya smilic yantic. Ya sc'anbey sjol staq'uin te c'alal ya yac' ta majanele, ya slo'lay ta sc'ajc'al te spat-xujq'ue, ya xch'ayon ta yo'tanic. Jo'on Ajwalilon te jich caloje.

¹³ ‘Mero ilinem co'tan yu'un te ya awaiyic uts'inwanej soc milaw.

¹⁴ Ma me xacuy te ya xju' ya acomon te c'alal ya cac'bat castigo. Jo'on Ajwalilon te jich caloje, ya me cac' c'otuc ta pasel.

¹⁵ Ya me jpuquex bael ta spisil yantic nacionetic, ya me jpuquex bael ta yantic lumq'uinal. Jc'axel me ya jlecubtesex te bit'il bolobenexe.

¹⁶ Ya awaq'uic bolobuc jc'oplal ta stojol yantic nacionetic, pero ya me sna'ic te jo'on Ajwalilon’, xi' te Cajwaltic,” uta me —xi'.

¹⁷ Te Cajwaltic la sc'oponon, jich la yalbon:

¹⁸ —Te lum Israel jich c'oem ta jtojol te bit'il te cobre, estaño, hierro, soc plomo te ja' scomenal te plata te ya xjil ta horno te c'alal ya yich' aq'uel ta c'ajq'ue.

¹⁹ Ja' yu'un jo'on Ajwalilon, yacon ta yalel: Melel te ja'exe, jich c'oemexix te bit'il sobrail te bitic ma xtuunixe, ja' yu'un ya me xba jtsobex ta yolil Jerusalén.

²⁰ Jich te bit'il plata, cobre, hierro, plomo, soc estaño, te ya yich' aq'uel ta horno, te patil ya yich' xijbeyel te sc'aal yu'un ya x'ulub.

²¹ Jich me ya jpas, ya me jtiles jajch'el te sc'ajc'al te quilimbae. Ya me jtsobex ochel swenta yu'un ya me cultesex c'oem ta yolil te lume.

²² Jich te bit'il ya yich' ultesel ta horno te plata, jich me ya awich'ic ultesel c'oem uuc ta yolil te lume. Jich me ya ana'ic a te jo'on Ajwalilon, te la jt'omes bael quilimba swenta castigo ta atojolique —xi'.

²³ Te Cajwaltic la sc'oponon, jich la yalbon:

²⁴ —Ja'at winic, albeya te Israele: “Jich c'oemat te bit'il lumq'uinal te yich'oj castigo; ma ba ya xtal ja'al, soc ma me ayuc ja' tey a.

²⁵ Melel te ajwaliletic yu'un te lumq'uinale, jich c'oemic te bit'il león-chojetic te ya x'awunique, soc te ya stuch' ta ti'el te ti'bal yu'une. Ya sbic' ta sq'uinalic c'oem te ants-winiquetic, soc ya yelc'anbey staq'uinic soc yantic sc'ulejalic. Ya yaq'uic jiluc ta me'ba antsil tsobol antsetic.

²⁶ Te sacerdoteetic yu'un te lumq'uinal, ya yixlanbonic te p'ijubtesel cu'une. Ya sjinbonic sc'oplal te bila ch'ultesbil ya cale; pajal sc'oplal c'oem yu'unic te bila ch'ultesbil soc te bila ma ch'ultesbiluque. Soc ma ba ya yac'bey snop yantic bit'il ay ta na'el te bila lec sc'oplal soc te bila boloben sc'oplale. Ma xyac' yo'tanic ta sna'el soc ta yich'el ta muc' te sc'aalelal cux-o'tanil cu'une, soc la sboltesbonic jc'oplal ta yolilic.

²⁷ Te ajwaliletic yu'un te lumq'uinal pajal soc ja'mal ts'i'etic te ya stuch' ta ti'el te sti'balique. Chapalic yu'un ya smalbeyic xch'ich'el yantic, chapalic yu'un ya smilic ants-winiquetic, yu'un jich ya sta sc'ulejalic a.

²⁸ Te j'alwanejetic yu'unic ya smuc ta yo'tanic te bila smelelile; ja' pajalic soc te mach'atic ya sbonic pajq'ue. Ya yalic te ay bila ac'bot yilic ta sc'opique. Te bila ya yalique, ma xc'ot ta pasel. Ya yalic ta jamal: “Jich la yal te Cajwaltique”, xiic. Pero te jo'one ma'yuc bila caloj.

²⁹ Te yajwal lume yat'elinejic elec' soc uts'inwanej. Ya yac'bey swocolic te me'baetique soc te mach'atic ma'yuc bila ay yu'unic. Ya yuts'inic te jyanlumetique, soc ya spasbeyic te bila ma stojiluque

³⁰ La jleix ta yolilic te mach'a ay bila lec ya spasbey ta stojol te lume, te yacuc stejc'an sba ta c'op cu'un ta stojol te lume, swenta yu'un jich ma ba ya jlajin a te jichuque. Pero ma'yuc banti jtaoj.

³¹ Ja' yu'un la jt'omesbeyix bael ta stojolic te castigo cu'une, la jlajinix ta swenta sc'ajc'al quilimba, swenta yu'un jich me ya cac'bey sna'ic te bi yilel yat'el spasojique. Jo'on Ajwalilon te jich caloje”, uta me —xi' te Cajwaltique.